Politiit ullormut nalunaarutaat: Nuummi tillinniartoqarlunilu aserorterisoqartoq

Kalaallit Nunaanni Politiit Nuummi atuareersunut paaqqinnittarfimmi Aqqalummi tillinniartoqarneranik kalerrissaarutip aallartissimaneranik unnuaq nalunaaqutaq marluk qaangerlugit sisamat qaangilaaraa nalunaarfigineqarput.

- Tillinniat marluk tigusarineqarput, aappaa 15-it inorlugit ukiulik aappaalu 15-it sinnerlugit ukiulik, Preben Kleist, Kalaallit Nunaanni Politiit pigaartuisa pisortaat oqarpoq.

Tigusarineqartut marluk inunnik isumaginnittoqarfimmut tunniunneqarut pigaartut pisortaata ilisimatitsissutigaa.

Nuummi unnuaq aamma aserorterisoqarsimavoq, naluttarfik Malik-mi matu aserorneqarsimalluni.

Naluttarfimmi aserorterisoqarneranik nalunaarut nalunaaqutaq sisamat qaangerlugit tanneq sisamat tunniunneqarpoq, politillu ornigutipallapput inullu ataaseq tassani tigusaralugu.

- Pasisat pingasut pillugit suli suliassaqarpugut, Preben Kleist.

Naluttarfik Malik-mi suna taarsigassaaneranik nalunaarut politiit suli tigusaqarsimanngillat.

Saassussisoqarneranik takunnissimasunik suli ujartuisoqartoq

Ullup unnuallu kingulliup ingerlanerani pisut saniatigut, nukappiaqqap 16-inik ukiullip Sisimiuni persuttarneqarnera politiit misissuiffigileruttorpaat.

16-inik ukiulik sapaammut unnuaani nalunaaquttap marluk pingasullu akornanni saassunneqarpoq.

- Taama sakkortutigisumik persuttaasoqarneranik takunnissimasinnaasunik soorunami ujartuivugut, pigaartut pisortaat Preben Kleist oqarpoq.

Persuttaasoqarneranik takunnissimaguit, pisumulluunniit arlaatigut ilisimasaqaruit Sisimiuni politiinut saaffiginnissinnaavut. Sisimiuni politiit oqaarasuaataasa normoraat 70 13 22.