Politiit ullormut nalunaarutaat: Angut imigassartorsimatilluni biilersimasutut pasineqartoq
Sapaammiit ataasinngornermut ulloq unnuarlu kingulleq ataatsimut isigalugu eqqissisimaffioqisoq, Kalaallit Nunaanni Politiit pigaartuisa pisortaat Jeppe Andsager ilisimatitsivoq.
- Nalunaarutiginninnerit amerlassusaat qiviaraanni, ulloq unnuarlu kingulleq ataatsimut isigalugu eqqissisimaffioqaaq.
Sapaammili ualikkut ataatsip missaani pinartoqartoq, taanna aamma oqarpoq.
- Nuummi Qinngorpumi Nuffinni paggittoqartoq ullukkut ataasinngorluinnalertoq nalunaarfigineqaratta ornigutilertorput, Jeppe Andsager oqarpoq.
Erseqqissumik nalunaarutiginnittoq
Politiilli paggittoqarfiusumut anngutinngitsulluunniit biilinik tassannga ingerlasoqartoq nalunaarfigineqaqqipput.
- Biilit nalunaarsornerannut qanoq normoqarnersut, qanoq ittuunersut suullu tungaanukarnersut nalunaaruteqartup ilisimatimmatigu biilinik ingerlasutut nalunaarutigineqartoq kingunitsiannguagut unitsipparput, politiit pigaartuisa pisortaat oqarpoq.
Unitsinneqartoq angut inuusuttoq 21-nik ukiulik imigassartorsimagunartoq paasinarsivoq. Taamaammat imigassartorsimatilluni biilersimasutut pasineqarpoq, taassumalu aava qanoq aalakoornartortaqartiginersoq politiit aaversinneranit paasisaqarsiipput.
Paggittoqarneranik nalunaarutiginninneq isumamineeritsik angulli 21-nik ukiulik biilertilluni politiinit unitsitaasoq imigassartorsimatilluni biilersimatut sapaatit akunnerata naanerani pasineqartuni pingajuusoq, politiit pigaartuisa pisortaat oqarpoq.
