Qimmit qimuttut toqorarneqarsimanerannut Canada utoqqatserpoq: Taarsiivigineqartussanngorput

Maannalu Canadamiik tusagaqassaagut. Canadami oqartussat qimmit qimuttut 1000-t missaanniittut ukiuni 100-likkuutaani toqorarneqartarsimanerat pillugu utoqqatserput.

Nunat inoqqaavi ukiuni 50-ngajanni utoqqatserfigineqarnissaminnik utaqqereersullu katersortarfimmi Nunat inoqqaavisa ministeriannit Gary Anandasangareemit, Canadami oqartussat sinnerlugit utoqqatserfigineqarput.

50-kkut qiteqqutilerneraniit 60-kkut naajartorneranut naalagaaffiup politiivisa RCMP-p qimmit qimuttut 1000-t sinnerlugit nunaqarfimmi Kangiqsujuaq-mi qimminik qimuttunik toqutsisimanerannut utoqqatserneruvoq.

Qimminik qimuttunik toqoraaneq Inuit inuunerannut inuussutissarsiornissaannullu sequmiisuusoq Piita Aatami, Makivvik Korporation-mi præsidenti nutaarsiassaqartitsivimmut CBC News-mut taama oqarpoq.

- Inuit piniariarsinnaajunnaarlutillu aalisariarsinnaajunnaaramik imigassamik ajornartorsiuteqalerput piitsunngorlutillu.

- Oqartussat sinnerlugit Canadarmiullu tamaasa sinnerlugit utoqqatserpunga, utoqqatserpunga, neriuppugut isumakkeerfigisinnaajumaaritsigut, ministeri oqarpoq.

Tatigeqatigiinnissamut peqquserlunneruvoq annertooq, utoqqatserniarnerlu aamma taamak sivisutigisariaqanngikkaluarpoq.

Ministerip sanianiipput RCMP-mi politiiusut, taakkua aamma utoqqatsernertik ersersikkusuppaat.

Taarsiivigineqassapput

Ministerillu Gary Anandasangareep oqalugiaatini naaginnaraalu katersortarfimmi inuit katersuussimasut nikuillutik assatik pattaappaat.

Nunavimmilu Inuit utoqqatserfigineqarnerminnut atatillugu taarsiivigineqassasut Piita Aatamip CBC News-mut oqaatigaa, taarsiiviginninnissarlu aningaasanik 45 millionit dollarsinik naleqassangatinneqarpoq, tassa 230 millionit koruuninik naleqarlutik.

Aningaasallu ilaqutariinnut qimmiuteqarnikunut, suliniutinullu assigiinngitsunut, Nunavimmilu qimmip qimuttup kultuurillu uterteqqinneqarnissaanut atussapput.