Qimmit qimuttut pillugit: Avammut niuffataalersinnaapput

Kalaallit piniartut isertitaqaatigilluarsinnaasaminnik nutaamik niuffateqarsinnaalerataannaapput. 

Tassa nunatsinni qimmit qimuttut 2000-p kingornali ikiliartuinnartuusut matumani pineqarput.

Ikiliartuinnarnerallu qimuttunik qimmeqarnerup assersuutigalugu qamuteralaateqarnerminngarnit akisuneruneranik pisariuneruneranillu ilaatigut pissuteqarpoq.

Nunatsinnili qimmit qimuttut Issittumi nunani allani piumaneqaqisut, nunatsinni qimminik qimuttunik ilisimatusartoq Københavns Universitetimeersoq Emilie Andersen-Ranberg oqarpoq. Qimmimmi qimuttut sumik peqquteqarnersumik nunatsinniinnaq nuliarusuttarnerannik ilaatigut pissuteqarpoq.

- Qimmit qimuttut piumaneqaqaat. Timikkut piginnaasaat, aammali ukiut 1000-t matuma siorna qimminut naleqqiullugit akusaannginnerunerat, pissutaavoq. Tassa taamaammat Issittumi nunani allani issittortaliusuni ingammik Canadami, Alaskami, aammali Norgemi, Sverigemi, Baltikumimi Polenimilu, piumaneqaqaat.

Nalitoqisut

Qimmeq qimuttoq ataaseq 10.000 koruuniiniit 15.000-koruunilersillugu niuffataasinnaakutsoortoq, ilisimatusartoq oqarpoq.

Qimuttunik qimmeqarneq piginnittuinut taamaalilluni imminut akilersinnaanerulersinnaavoq –  niuffataalissappatalu ikiliartorunnaarnerannik kinguneqartussaassalluni.

Assersuutigalugumi Walesimi aamma asseqanngilluinnartunik nersutaatinik ungoorisartunik qimmiliusumi assigisaanik pisoqarsimasoq, Emilie Andersen-Ranberg oqarpoq.

Tappavanimi nersutaatinik ungoorisartunik qimmiutillit iluanaaruteqaatigilluartakkaminik qimminik nittartakkakkut akitsorterussilluni avammut niuffateqartalersimasortaqarput.

- Qimmimi ilaat qaammatinik aqqaneq-marlunnik utoqqaassusilik 28.000 pundilersillugu, tassa 250.000 koruunit missaannik akilersillugu tunivaa. Imaanngilarli oqartunga qimmit qimuttut taama akilersinneqarsinnaasut, taamaannerali asseqanngilluinnarnerannik iluanaaruteqarfiulluartumillu niuffataasinnaanerannik ersersitsivoq.

Uumasunut nakorsat qaammarsaanerlu

Nunatsinnili qimmit qimuttut niuffataalersinnaatinnagit qimuttunik qimmeqarfinni uumasunik nakorsiaassisarfimmik pilersitseqqaartoqartariarpoq.

Qimmimmi qimuttut nunamut allamut eqqunneqarsinnaalertinnagit peqqissuunerannik uppersaasernissaannut akiuussusersuiffiusartussamik uumasunik nakorsiaassisarfeqarnissaq pisariaqarpoq.

Nunatsinnilu uumasunut nakorsassaalatsisarneq nunatsinni uumasunik nakorsiaassisarfimmik pilersitsinissamik sapiuttoqartarneranik pissuteqarsinnaasoq, Emilie Andersen-Ranberg oqarpoq.

- Uumasunimmi Kalaallit Nunaanni nakorsiaassisarfeqarneq ilumut imminut akilersinnaaneranik nalornissuteqarneq pissutaanerpaasarunarpoq; tassa qimuttunik qimmillit akiliillutik ilumut nakorsiuussisassanersut.

- Uumasunut nakorsarpaalunnik kajumissutsimik suliaqartartuusunik tamatuminnga eqqartueqatiseqartarpunga, ulluinnarnilu allanut suliaqariartortarnerup saniatigut piffissap ilaannaani ammasartussamik uumasunillu nakorsiaassisarfimmik ammaaneq imminut akilersinnaassasorikutsoorpara.

Kalaallillu inuusuit uumasunut nakorsanngorniarnissamik kajumileqqullugit uumasunut nakorsanngorniatut ilinniakkamik qaammarsaavigineqarnerunissaat pisariaqartoq, Emilie Andersen-Ranberg aamma isumaqarpoq.

- Kalaallit uumasunut nakorsatut ilinniarsimasut ikittuararsuupput. Tamanna qimuttunik qimmeqarfimmeersut uumasunut nakorsanngorniatut ilinniariarlutik angerlarlutik sulinissamik kajumittut ikittuararsuunerannut sunniuteqarpoq. Kajumilertinneqartigatillu uumasunut nakorsanngorniarnissamik soqutiginnilertortaqaleriaannaanavianngillat.

Aalisarnermut Piniarnermullu Naalakkersuisoq uumasunut nakorsassaalatsisarneq qimmillu qimuttut niuffataalersinnaanerat pillugit oqaloqatigiumagaluarparput, sulili taanna naalakkersuisoqarfillu akissuteqarnatik.