Issittumi qimussertarnerup tammatsaaliornissaanut suleqataanissaminut kissaateqarpoq
Ilisimatuut, suliffeqarfinneersut, piniartut, aalisartut, takornarianik angallassisartut qimussertartullu assigiinngitsut Sisimiuni sapaatip-akunnerata siuliani katerisimaartut Naalakkersuisut nalunaarutigaat, Kalaallit Nunaanni nunanilu issittuni qimmit qimussertarnerlu qanoq tammatsaaliorneqarsinnaanersut ilaatigut eqqartorneqarluni.
Kultureqarnermut naalakkersuisoq Doris Jakobsen qimussit pillugit Sisimiuni sapaatip-akunnerata naanerani katerisimaartoqarnerani peqataavoq:
- Naalakkersuisutut nunatsinni aammalumi nunani avannarlermioqatitsinni kulturikkut pingaartinneqartup Qimussip eriagisassatut illersorneqarnissaanut tapersiinissaq pingaartippara, kiisalu siunertamut taassumunnga suleqataajumasut qanimut suleqatigilluarnissai ammaffigalugu, Doris Jakobsen taama oqarpoq.
Qimussertarnerup tammatsaaliornissaanut suliniutissatut siunnersuutit assigiinngitsut katerisimaarnermi saqqummiunneqarput.
Ilisimatusarnerup silarsuaanit aamma suliniuteqartoqarpoq. Københavnimmi Universitetiata ukioq manna novembarimi nalunaarutigaa kalaallit danskillu ilisimatuussutsikkut misissuinermi suleqatigiinnerisigut qimuttoqarneq qimuttoqarnermilu periuseq siunissami attanneqarsinnaanissaat qulakkeerniarneqartoq.
Suliniutip taaguutaa tassaavoq QIMMEQ, qimmip qimuttup piorsarsimassutsikkut isumaa kiisalu sananeqaatimigut ineriartornera ilaatigut paasiniarneqassalluni.
