Canadami naalakkersuisut qimminik qimuttunik toqoraasoqarneranut utoqqatserniartut
Canadami naalakkersuisut Nunavimmi qimminik qimuttunik 1000-nit amerlanerusunik 1950-ikkut qiteqqunnerannit 1960-ikkut naalernerisa tungaannut toqoraasoqarneranut pisortatigoortumik maanna utoqqatsernialerput.
Canadap nunap inoqqaavisa pillugit ministeriata Gary Anandasangareep sapaatit akunnerata massuma ingerlanerani tamanna ilisimatitsissutigaa. CBC News taama allaaserisaqarpoq.
Canadami naalagaaffiup politiivisa RCMP-mik taaguutillit, qimmit qimuttut 1000-nit amerlanerusut 1950-ikkut qiteqqunnerannit 60-ikkut naalernerisa tungaannut toqorarpaat.
Naggueqatigiit Inuit akornanni amerlasuut qimmiisa toqorarneqarneqarmata piniariarsinnaajunnaarlutillu sikukkut aalisariarsinnaajunnaarsitaasut, Nunavimmi naggueqatigiit Inuit suliniaqatigiiffiata Makivviup præsidentiata Piita Aatamip CBC-mut oqaatigaa.
Naggueqatigiit Inuit kulturiannut aamma sunniuteqarnerluppoq, tassani inuit nunaqarfinni najugaqarsinnaajunnaarput, piliniarsinnaajunnaarlutillu, tamannalu pillugu inoqarfinnut annernut nuuttariaqarlutik, kulturiannut tamanna sunniutipiloqarluni. Nammineersinnaajunnaarsitaapput, inuuniarnermikkullu ilaatigut ajornartorsiuteqalerput, ilaat assersuutigalugu imerajuttunngorlutik, Piita Aatami oqarpoq.
Taarsiivigitittoqassasoq
Qimmit qimuttut Canadama naalakkersuisunit inunnut ulorianartuunerarneqarput, kiisisartuunerarneqarlutik, tamannalu pillugu toqunneqartariaqartut.
Naggueqatigiilli Inuit akerlianik oqarput Inuit illoqarfinnut nuutsikkusullugit qimmit toqorarneqartut, innuttaasunik aqutsineq ilaatigut pisariillisarneqarniartoq.
Nunavik, Canadami nunp immikkoortuani Quebecimiippoq. Quebecimi naalakkersuisut naggueqatigiit Inuit qimmiisa qimuttut toqorarneqarnerannut 2011-mili utoqqatsereerput, Makivvillu 15 millionit koruuninik taarsiivigineqarluni. Aningaasat taakku naggueqatigiit Inuit oqaasiisa kulturiallu pillugu qaammarsaasoqarnissaanut atorneqarput.
Nunavummi naggueqatigiit Inuit qimmiisa qimuttut toqorarneqarnerat Canadami naalakkersuisunit 2019-imi utoqqatserfigineqarpoq, Nunavimmiullu maanna tassa utoqqatserfigineqalerlutik.
Nunavimmiut pisortatigoortumik qaammatip massuma ingerlanerani utoqqatserfigineqassapput, inoqutigiillu ataasiakkaat qimmiminnik annaasaqartut taarsiivigineqarumaarput, naggueqatigiillu Inuit inuusuttaat qimmit qimuttut pillugit aamma ilinniartinneqarnissaannut aningaasaliisoqarniartoq.
