Danmarkimi kommunit kalaallit angajoqqaat meeraannik allamut inisseeratarnissamik suliani angajoqqaat piginnaasaannik misissuutit pillugit suliaq aaqqiagiinngissutaaneruleriaqqippoq. Danmarkimi kommunit misissuutinik taakkuninnga atuinerannut Nuummi Københavnimilu qaammammi matumani akerliussutsimik arlaleriarluni takutitsisoqarpoq.

Misissuutilli taakkua aatsaat isornartorsiorneqaleqqajanngillat. Danmarkimimi kommunit misissuutinik taakkuninnga kalaallinut angajoqqaanut suli atuinerat, Folketingimi ilaasortat nunatsinneersut marluk, tassa Siumumeersup Aki-Matilda Høegh-Damip aamma IA-meersup Aaja Chemnitzip ukiuni kingullerni isornartorsiortarpaat.

Taamaammat danskit isumaginninnermut ministeriat Sophie Hæstorp Andersen (S) tamatumani suliaq pillugu ulluni makkunani siunersioqatisereqqippaat.

- Suliaq paamaarussaavallaaqaaq, Aaja Chemnitz oqarpoq.

- Naalagaaffik suliaq taanna pillugu akisussaaffimmik tigusinerusariaqarpoq, taamaammallu siunersioqatiserinnippugut, taanna oqarpoq.

Angajoqqaammi piginnaasaannik misissuutit aaqqiaginngissutaaqisut nunat killerneersuusut kulturiannut naleqqussarlugit suliaapput. Taamaammat kalaallinut ilaqutariinnut naleqqutinngitsutut, immikkut ilisimasalinnit arlalinnit nalilerneqarnikuupput

Danskit isumaginninnermut 2021-mi ministeriat suliaq taanna pillugu taamanikkut aamma siunersioqatiserineqarpoq.

Taamaakkaluartoq susoqarpiarneq ajortoq, Aki-Matilda Høegh-Dam oqarpoq.

- Utaqqiloornikuuarput. Paragraf 20-nik ataatsimiititaliamullu apeqquteqaqattaarnikuuvugut, ministerilu siunersioqatigisareerlugu. Taamaammat oqalligineqaleruttornera atorluarlugu oqaluusereqqinnissaa pingaaruteqarpoq.

- Suliarmi aaqqiivigisariaqarparput, taanna oqarpoq.

Ministerip allagaqarnera kinguneqangaassasorinngikkaa

Meeqqanut inuusuttunullu naalakkersuisoq Aqqaluaq B. Egede (IA) danskillu isumaginninnermut ministeriat Sophie Hæstorp Andersen (S) suliaq taanna pillugu qaammammi matumani ataatsimiipput.

Isumaginninnermut ministerip Danmarkimi kommunit misissuutinik pineqartunik kalaallinut angajoqqaanut atuiunnaaqqusilluni allagaqarnissi neriorsuutigisimagaa, Aqqaluaq B. Egede ataatsimeereernerminni oqarpoq.

Ministerilumi allagaqarpoq. Danmarkimili kommunit misissuutinik taakkuninnga atuiunnaaqqusinermik allagaqarfiginagit misissuutinilli atuiuinnaarnissamik isumaliutiginneqqusinermik allagaqarfigisimagini, isumaginninnermut ministeri KNR-imut akissummini allappoq. Kommunimmi suliani taamaattuni qanoq suleriuseqarnissamik inatsisit naapertorlugit nammineq aalajangiisinnaatitaammata, ministeri kommunit qanoq iliornissaannut akuliusinnaatitaanngilaq.

- Naalakkersuisut Naalagaaffimmut kimigiisernerat pitsaasuusoraara. Suliamummi tassunga akuliunnissaq aamma piffissanngorpoq, Aaja Chemnitz oqarpoq.

Isumaginninnermulli ministerip kommuninut allagaqarnera IA-meersup kinguneqangaassasorinngilaa.

- Allamut inissiinerpassuit unitsinneqariataarnissaannik naatsorsuuteqartorsuunngilanga. Kommunit 98-it namminneerlutik aalajangiisussaanerat sanngeequtaavoq. Misissuutimmi taakkua (FKU, aaqq.)) atorunnaartariaqarmata, kommunit tamatumani ilumoorussinissartik akisussaaffigaat, Aaja Chemnitz oqarpoq.

Isumaginninnermut ministeriulli taama akissuteqarnera, Aki-Matilda Høegh-Damip aamma tupaallaatigivallaanngilaa.

Isumaginninnermut ministerip Danmarkimi kommuninut taama allagaqarnera naammassoraajuk?

- Nalileruminaatsilaarpara. Misissuutilli taakkua kalaallinut naleqqutinngitsutut taasariaqarpagut, naleqqutinnginnerannullu arlalinnik aamma uppernarsaateqarpoq. Taamaammat (Danmarkimi kommunit, aaqq.)) misissuutinik allanik atuilertariaqarput.

- Allamulli inissiinissamik suliani FKU-mik tunngaveqartumik naliliinerluttoqarsimanersoq eqqarsaatigeqqinneqartariaqarpoq. Tamakkulu ministerip nalunaarutaani ilaanngillat, Aki-Matilda Høegh-Dam oqarpoq.

Kommunit eqqortunik najoqqutassaqassasut

Danmarkimi kommunit kattuffiat Kommunernes Landsforening suliaq pillugu apersorumagaluarparput, iluatsinnanili.  

Danmarkimi kommunit isumaginninnermut ministerip misissuutinik taakkuninnga kalaallinut angajoqqaanut atuiuinnaarnissamik isumaliutiginneqqusinera malinniarneraat apererusukkaluarparput. Ilaatigut Danmarkimi inuttut pisinnaatitaaffiit pillugit ilisimatusarfik misissutiinik taakkuninnga kalaallinut angajoqqaanut atuiunnaaqqusereeraluartoq Danmarkimi kommunit misissuutinik taakkuninnga sooq suli atuisortaqarnersut aamma apererusukkaluarparput.

Kommunernes Landsforeningip isumaginninnermut ataatsimiititaliaata siulittaasua Ulrik Wilbek KNR-imut akissumminni ima allappoq:

- Suliassaqarfimmut tassunga aqutsisoqarfimmiit tusarsiivugut suliassallu salliutinneqarnissaa kaammattuutigeqaarput, kommunit angajoqqaat piginnaasaannik misiliinermut eqqortunik najoqqutassaqalertornissaat qularnaarsinnaaqqullugu. Taamaattoqarnissaa isumaginninnermut ministeritulli tamatumunnga akisussaasuusutulli pingaartipparput.  Danmarkimi Naammagittaalliuteqartarfik suliamik taassuminnga aamma anngussivigineqaqqunaqaaq, kommunip angajoqqaat piginnaasaannik tamakkiisumik misissuisimanngineranik naammagittaalliutaasinnaasunik itigartitsinnginniassammat.