Takornarissanik kiffartuussisut annertunerusumik kalaallinit pigineqalernissaanik inatsisissatut siunnersuut Inatsisartuni partiinit tamanit tapersersorneqarpasippoq.

Inatsisissatut siunnersuutip siunertaraa suliffeqarfiit takornarianik kiffartuussinermik suliaqartut inunnit ukiuni tallimani kingullerni Kalaallit Nunaanni najugaqartussaanerat akileraartartussaanerallu.

Nunami najugaqartut 51 procentimik piginnittussaanerat tigussaalluinnartumik piumasaqaataavoq. Tamassumalu Kalaallit Nunaanni takornarialerinermut Kalaallit Nunaata avataaneersut aningaasaliissuteqarsinnaanerannik ajornarsisippaa.

Aningaasarsiornerup tungaatigut ilisimasallit arlallit aamma takornarialerinermik suliffeqarfiit ilaat nunanut allanut attaveqartut ilatsisissatut siunnersuut pillugu aarlerisaaripput.

Topas taakkununnga ilaavoq. 90-ikkut qeqqanili Kalaallit Nunaannut takornarianik  angallassisarsimasoq ukiullu ingerlanerani akunnittarfinnut umiarsuaatileqatigiiffinnullu amerlasuunik aningaasaliissuteqartarsimalluni.

Angallassinermi suliffeqarfimmut angisuumut pisortaasoq Michael Højgaard aperigaanni isumaqarpoq avataaniit aningaasaliisussarsiornermt killilersuineq ernumanartoq, tassami nunaqartuniit takornarialerinermut aningaasaleerusussuseq siusinnerusukkut annertugisassaasimanngilaq.

- Suliffeqarfinnut tuniniarneqartunut Kalaallit Nunaanni najugaqarsimasunit pisiarineqartarput Kalaallit Nunaannimi aningaasanik naammattunik akiliutiginnittoqarsinnaanngimmat. Taamaattumiguna uagut pisiarisinnaasimagigut, oqarpoq.

Ukiut qulikkaat kingullit ingerlaneranni Qeqertarsuup tunuani hotellinut aamma umiarsuaatileqatigiiffiit Disko Line, Blue Ice Explorer aamma Nuuk Water Taxi Topasip aningaasaliiffigai.

Nunami maani takornarialerinerup ineriartortinnissaanut aningaasaliissutit pisariaqartut, Michael Højgaard oqarpoq.

- Aningaasaliiffigisavut aallartimmata allanit ingerlatsisoqangaanngilaq. Kiffartuussatsinnut pitsaasumik sullissilluarsinnaajumalluta ilannguppugut, taanna oqarpoq.

2016-imili Hotel Icefjord Ilulissaniittoq Topasip pisiaraa. Siusinnerusukkut innuttaasunit pigineqarsimagaluarpoq. Assi © : Aske Martinus

Kalaallit Nunaata aningaasaqarneranut avataaniit aningaasaliinerit iluaqutaapput 

Topasip Kalaallit Nunaanni aningaasalerusussuseqarnera kiffartussatik angalanermik misigisaqarluarfiusumiiginnanngilaq. Taamaattumillu takornarianut Kalaallit Nunaannut angalanissaanik isumagereerlugit sooq takornariarneranni aamma najugaqartinniassanngillat angallanneqarsinnaanerallu aamma isumannaarlugit?  

Taamaattumik Michael Højgaardip isertuunnianngilaa aningaasaliissutit aningaasarsiorluarniarnermik siunertaqarmata. Asuli pinngilagut, inuussutissarsiuummik ingerlatsivugut, oqarpoq. 

Nunatsinnili takornariaqarnermi inuussutissarsiuteqartut arlallit KNR-ip oqaloqatigisimasai Topasimut suliffeqarfippassuanullu isornartorsiortarput. Topas inituallaartoq sumiiffinnilu iliuuseqarnerit ipisittarai isumaqarput. 

Isornartorsiuisut ilagaat Jan Cortsen Iluliarmiu. Ilulissat Local Guide takornarianik sullissisuusoq pigivaa Ilulissat Excursonimilu takornarianik sullissisunit 14-init pigineqartumi pisortaalluni.

- Oqaloqatigigaangatsigit ammasoqanngilaq. Nammineq angallataateqarput sulisoqarutillu. Arlaat isumaqatigiissusiorfigeqqammerpara, ukiut arfinillit ingerlareersullu, KNR-imut oqarpoq.

Suliffeqarfiit takornarialerisut Kalaallit Nunaanni innuttaasunit anginerusumik pigineqassasutut piumasarineratigut isornartorsiuinerit taamaattorpiaat takornarialerinermut inatsisissatut siunnersuutip naaffissarsiuussiffigai.

Michael Højgaardilli takornarianik kiffartuussinerup ineriartorneranut inatsisissatut siunnersuut kigaallassaataassasoq ernummatigaa. Nunanit allanit aningaasaliissutit suliffinnik amerlanerusunik pilersitseqataasimammata malitsigisaanillu nunatta karsianut isaatitsineranut tapersersuilluarmata eqqaasitsissutigaa.

Topas assersuutitsialaasoq isumaqarpoq.

- Suliffeqarfiit sisamat piginneqataaffigisavut Kalaallit Nunaanneersuupput Kalaallit Nunaannullu akileraartartuullutik. Sulisuvut Kalaallit Nunaannut aamma akileraartarput, piginnittullu iluanaarutaarsartunit tunineqanngisaannarsimanerat erseqqissarlugu, taarsiullugu angallatinut nutaanut hotelinullu allisitsinernut aningaasaliissutigineqartarsimallutik. 

- Iluanaarutigisat aningaasaleeqqinninnernut atorneqartarput. Tassa Kalaallit Nunaanniiginnarput Michael Højgaard oqarpoq.

Nuuk Water Taxami piginnittut amerlanersaat innuttaasuupput, Michael Højgaardili oqarpoq suliffeqarfimmut aningaasaliisimallutik Nuuk Water Taxi alliartornissaminut nammineq aningaalissinnaanngimmat. Assi © : Greenland Water Taxi

Takornarialerinermut najugaqartut peqataanerussapput

Massakkutut inissisimaneratut 51 procentimik Kalaallit Nunaanni innuttaasumit pigineqarnissaanut Topas naammassinnissinnanngilaq.

Inatsisilli massakkutut isikkoqarluni akuerineqarpat Michael Højgaardip neriorsuutigaa aaqqissutissaqarumaartoq taamaalilluni Topas amma siunissami Kalaallit Nunaanni takornarianik sullissisut akornaniiginnassammat.

Takornariartunik sullissinerup aningaasatigut iluaqusiineranik innuttaasut amerlanerusut siunissami  iluaquserneqassasut neriuutigaa.

- Innuttaasunik sulisussarsiorneq pimoorulluinnarparput. Uagutsinnulli sapernarsimaqaaq. Vietnamimiit Danmarkimiillu ajoraluartumik atorfinitsisariaqartarpugut. Ajuusaarnaqaaq. Tassa uani iluarsisassaqarpugut, oqarpoq. 

Kiffartuussinermi neqeroorutigisinnaasassat naammassineqarsinnaanerat qulakkeerniarlugu Topasip suliassat kivinniartarsimavai, taamaakkaluartorli innuttaasunik Topas suleqateqarusuttorujussuuvoq Michael Højgaardip aamma naqissuserpaa.

-Qimussiussinerit innuttaasunit pisiarisareerpavut, arlaat pisulluni angalaffissaqartitsippat qujarutigissaqigipput ilimanarluinnarpoq. Pilersinnikuusavut pilersinneqarput allanit neqeroorutigineqanngimmata, oqarpoq.