MIO Naalagaaffit Peqatigiinnut nassiussisoq: Taamaaliunngikkutta pitsanngortoqarnavianngimmat

Meeqqat pisinnaatitaaffiinik misissuisarfiup MIO-p nunatta peqqinnissaqarfiata meeqqanik ilaqutaanillu sumiginnaaneri arlallit itinerusumik misissuiffigisimavai. Suliat arfineq-pingasuupput, taakkunanngalu pingasut toqusoqarneranut tunngasuupput.

Suliat kukkunernik, sumiginnaanernik sulisullu peqannginnerannut tunngasuupput. Angajoqqaat, meeqqatik ikioqqugaluarlugit tusaaneqarusussimanngitsut maalaarutaat. 

Taakku tamarmik misissuinerit inernerinik aamma innersuussutinik qulingiluanik imaqartunik allakkiarineqarput.

Paasisalli – peqqinnissaqarfiup kukkuneri sumiginnaanerilu – ilungersunangaarmata, Namminersorlutik Oqartussaqarfissuarmut Inatsisartoqarfimmullu nassiussamik assingi Naalagaaffiit Peqatigiit Genèvemi allattoqarfiannut ilanngullugit nassiunniarpaat:

- Allakkiat uku allallu paasisimalikkagut Naalagaaffiit Peqatigiinni nunap inuiinut atatillugu immikkut nalunaaruteqartartunut aamma Naalagaaffiit Peqatigiinni Meeqqat pillugit ataatsimiititaliamut ullumi nassiuppagut, Aviâja Egede Lynge oqarpoq.

Peqqinnissaqarfimmi kukkunerit sumiginnaanerillu pillugit nalunaarutit ima ilungersunartigaat, allaat Kalaallit Nunaata inatsisaannut, nunarsuarmioqatigiit isumaqatigiissutaannut nammineq piumassutsitsinnik ilannguffigisimasatsinnut naapertunnatik, meeqqat oqaaseqartartuat oqarpoq.

Inatsisileritooq alla sulisittariaqartoq

MIO-mi sulisut misissuinermik nalaanni paasisatik, inatsisilerituumut immikkut ittumik inuttut pisinnaatitaaffinnik ilisimasalimmut, saqqummiussimavaat – naliliinissaa aamma ilaqutariit peqqinnissaqarfimmit eqqunngitsumik pineqartut qanoq iliuuseqarfigineqarsinnaanerat qulaajartinniarlugu.

Nunarsuarmioqatigiit isumaqatigiissutaannik malinninnissamik, kalaallit namminneq aamma imminnut pisussaaffilerlutik atsioqataaffigisimasaat eqqarsaatigalugu allagaqarput, qanoq iliornissartik aamma paaserusullugu.

- Immikkut ittumik ilisimasalimmut saqqummiinerput pingaaruteqaqaaq, MIO-mi meeqqat oqaaseqartartorisaat Aviâja Egede Lynge oqarpoq:

- Pisinnaatitaaffilerisuuvugummi. Suliatta tunngavii tamarmik inuttut pisinnaatitaaffinnut attuumassuteqarput. Nammineq inatsiseqaraluarluta Kalaallit Nunaat atsiugaqarnikuuvoq aamma nunarsuarmioqatigiit isumaqatigiissutaannik malinnittussatut nunarput pisussaaffilerlugu, oqarpoq nangillunilu:

- MIO-mit pisussaaffigaarput meeqqat peqqissuunissaat nakkutigissallugu. Taamaammat iliuuseqalertinnata inuttut pisinnaatitaaffiit pillugit inatsisilerituumik attaveqarnerput nalinginnaasuuvoq.

Peqqinnissaqarfiup sullissinerata pitsaannginnera paasiniarlugu inatsisinik ilinniarneq sivisooq aqqusaarsimasariaqanngilaq, taamaakkaluartoq, inuttut pisinnaatitaaffiit pillugit inatsisilerituup inerniliussai, MIO-mut apuussat, annilaarutaaqaat.

Naalagaaffiit Peqatigiit oqaluttuutissagaat

Kalaallit Nunaat nunarsuarmioqatigiit isumaqatigiisutaannut ilannguffigisimasaminnut malinninnissamut pisussaaffeqarpoq, pisussaaffinilu malinngippagu MIO pisussaaffeqarpoq pisunik ingerlatitseqqissalluni, meeqqat oqaaseqartartuat oqarpoq:

- Takugutsigu meeqqat pillugit isumaqatigiissummik malinninnissamut ajornartorsiuteqartoqartoq, soorunami nalunaarutigissavarput, oqarpoq nangillunilu:

- Inuttut pisinnaatitaaffiit eqqarsaatigalugit naapertuutinngitsutut isigisavut iliuuseqafigineqarniassammata taamaaliornitsigut aamma malugitinniartarpavut, oqarpoq.

Aviâja Egede Lyngep nunatsinni pissutsit qangalili iluarsineqarsimasuuppata, iluarsisariallit nalunaarusiaralugit Genèvemut nassiussimanavivanngikkaluarpai:

- Ajuusaaraluarpunga – oqaasissakka tulliit kusanarpallaanngimmata. Peqqinnissaqarfimmiliuna ajornartorsiuteqarneq ukiorpassuanngortuni atuuttoq. Paasinikuuaralu, nunatta avataaniit pissutsit eqqumaffigineqaleraangata aatsaat iliuuseqarnialertarneq, allannguiniarnerit ulapputigineqalerlutik, oqarpoq.