Manuminap arfinilinnik ukiullip Dronning Ingridip Napparsimmavissuani sulisunit nakkutigineqartilluni toqunerata siornatigut, toqunerata nalaani aamma toqunerata kingornatigut ajorluinnartumik ingerlasoqarnera KNR-ip sapaatip akunnerini kingullerni ukkatariniarsimavaa.

Kisianni ilaqutaasut tusagassiuutinut oqaluttuarnissartik toqqartinnagu angajoqqaajusut MIO tassanilu meeqqat illersuisuasuat Aviâja Egede Lynge arlaleriarlutik ataatsimeeqatigaat. Meeqqat illersuisuisuata ataatsimiinnerit annertoqisumik misigisaqarfigai:

- Qanoq pisoqarnera alianaqaaq paasissaanngeqalunilu. Angajoqqaat kisimiilluinnarput, panitsillu ilisussaallugu, oqarpoq nangillunilu:

- Suliaqartoqarfimmut tatiginnillutik panitsik neqaarsinnissaanut pisariitsumut tunniuppaat illerfimmiittorlu utertillugu paasisinnaanngilaat, Aviâja Egede Lynge oqarpoq.

Manuminap angajoqqaavisa saaffiginninnerata nalaanerpiaq MIO piffissap ingerlanerani suliat tassunga assingusut nassaariniarsimavai.

Peqqoinnissaqarfimmi kukkunerit, sumiginnaanerit sulisullu peqannginneri ukkatariniarlugit taamaaliorpoq. Meeqqaminnik misissorneqarnissaa saaffginnissutigigaangamikku angajoqqaat soorlu iikkamut apuinnartartut.  

Suliat Manuminamik suliatut ittut amerlaqaat

Taamaattumik Manuminamik suliaq allat arfineq marluk ilagalugit MIO-mit misissorneqartutut taasat ilagaat ataasiinnaq, peqqinnissaqarfiup ilaqutariinnik sumiginnaaneranik ukkatarinnittunik – akulikippallaartumillu toqumik kinguneqartartunik:

- Una suliaq ataasiinnaanngilaq. Ajornartorsiutaavoq isummerfigisariaqartoq. Peqqinnissaqarfeqarpugut meeqqat inuunerannik akeqartumik, Aviâja Egede Lynge oqarpoq nangillunilu:

- Malunnartumik tassaapput meeqqat ikiortariaqartut qanoq pineqartarnerannik takussutissat. Angajoqqaat isumakuluutaannik tusaaniarneqanngillat. Naak tusarneqarnissartik ilungersuutigigaluarlugu – suliallu ilaanni arlalinni toqumik kinguneqartartuni, oqaluttuarpoq.  

Suliani arfineq pingasuni ullumi MIOp misissuinermini ullumi saqqummiussaani meeqqat pingasut peqqinnissaqarfiup sulisuinit paarineqartillutik toqupput. Taakkunannga pingasunit marluk naalungiarsuupput. Kingulleq tassaavoq Manumina, qanorlu ingerlanera amerlanerit nalunngilluarpaat.

Ukiorpassuarni unammilligassat

MIOp sulianik taamaattunik katersilerneranut peqqutaavoq meeqqat illersuisoqarfianni sivisuumik naalakuluutigineqarmat meeqqat peqqinnissaqarfimmi kukkusumik suliarineqartarnerat.

Aamma angajoqqaajusut ikiortissaasusartut tusarneqarnatik. Tamannalu MIOp  misissuinerani ilumoortuusoq paasineqarpoq. Taamaattumik suliassaavoq pingaarutilik, taamaattumillu MIOmut pingaaqaaq massakkut nipituuliuutigissallugu, oqariartuutip tusarneqarnissaa neriuutigalugu:

- Oqaaseqaatip matuma innuttaasuusugut nalunngilluagarput takutippa. Kukkusoqartartoq, innuttasullu amerlaqisut kingusinaarlutik ikiorneqartartut – imaluunniit ikiorneqanngisaannartut. Kisianni ajornartorsiut uaniippoq nunap sanngiinnersai pineqarmata. Meeqqat imminut illersorsinnanngillat, oqarpoq nangillunilu:

- Angajoqqaallu inuunerminni atugarliornerpaaffimminni maani nipituuliortussaanngillat. Uagut taamaaliortussaavugut. Tamannami pisussaaffigaarput, Aviâja Egede Lynge oqarpoq.

Politikerit ajornartorsiut siulliutittariaqarpaat

Taamaattumik aamma oqarpoq piffissanngortoq nunap politikerii sassartariaqalersut aaqqiinissamulu siunnersuusiorlutik.

Suliallu ataasiakkaat pillugit utoqqatsissutissarsiuinnarnatik – tassami massakkut allaffiisa qaanniipput suliat amerlaqisut peqqinnissaqarfiup meeqqanik sumiginnaaneranut tunngasunik, meeqqat politikerit taagajuttagaat nunatta siunissai:

- Meeqqat nammineq illersorsinnanngillat. Meeraqarpugullu annaasatsinnik. Taamaattumik tulleriiaarinermi salliutinneqartariaqarput. Nalunaarusiornissamut allamulluunniit utaqqissunneqarsinnanngillat. Pingaartorujussuuvoq akisussaafimmik massakkut tigusinissaq. Taamatu pisoqaqqinnginniassammat, oqarpoq nangillunilu:

- Aamma pingaaruteqaqaaq nuna siuttoqartariaqarmat innuttaasut isumassorneqarnerannik toqqissisimanissaannillu takutitsisunik. Tassami toqqissisimannginneq angajoqqaarpassuit misigisaat pigiinnarsinnanngilarput, Aviâja Egede Lynge oqarpoq.

Tassami meeqqat illersuisuata nassuerutigaa Manumina meeqqallu allat arfineq marluk pillugit suliat qaammatini kingullerni suliarisimasani attortiffigisimaqigamigit, taamaattumkillu pingaaqisoq peqqinnissaqarfimmmi ajornartorsiutit annertuut qanpq iliuuseqarfigineqartariaqartut: 

- Meeqqat pinngitsoorsinnaagaluakkatinnik toqusimasut pillugit suliat tigoqqikkusunngilakka.