Manuminap arfinilinnik ukioqarluni neqaajartereernermi kingorna toquvoq. Politikerillu peqqissutsimut oqaaseqartartut, pisoq aallaavigalugu eqqarsariaallapput, kukkuneeqqat annertuumik kinguneqarsinnaanerat pillugit Nunatsinni Peqqinnissaqarfimmut apeqqusiillutik.

Manuminallu toqunera nunatsinni peqqinneq pillugu isiginneriaatsimut allannguutaasumik kinguneqartariaqaraluartoq, Demokraatit peqqinneq pillugu oqaaseqartartuat Bjørk Lange Olsen maanna aamma akuliulluni isummerpoq:

- Pisoq alianartorujussuuvoq attortinnarlunilu.Pisoq ajornerpaamik kinguneqarpoq. Angajoqqaajusunut taama ajortigisumik misigisaqartitaaneq takorloorsinnaanngilluinnarpara oqarpoq nangillunilu:

Periutsit iluaqutaasussat pilersinneqassapput

Ilaqutariit alianartumik annaasaqarnerisa kingorna Peqqinnissaqarfiup iliuuserisai inuiaqatigiittut akuerineqarsinnaanngitsutut isigalugit qisuariarfigai:  

- Taama alianartigisumik pisoqartillugu, akisussaasut nipangiinnarnerat imminnullu mattunnerat iluaqutaanngitsutut misigaara. Angajoqqaajusummi tamanna misigivaat imalu nangilluni.

- Tamatumalu kinguneraa angajoqqaajusut naammattumik isumagineqannginnerat erserpoq. Ikiorluarneqarsimasariaqaraluarput, nalaataqarnerminni annertunerusumik pitsaanerusumillu ikiorserneqarsimasussaagaluartut misigaara. 

Ilaqutariit pisumik alianartumik nalaataqartillugit ikiorneqarnissamik pisariaqartitsisut pisumut nukissaqaqqullugit periutsinik aalajangersimasunik imaaliallaannaq ikiuutaasinnaasunik pilersitsisoqartariaqartoq, Bjørk Lange Olsen isumaqarpoq.

- Ilaqutariit ikiorneqarnissaminnut assigiinngitsorpassuarnut saaffiginneqattaartarsimapput ikiorneqarsinnaasimanatillu. Panimmi toqunera sioqqullugu,toqunerani aamma toqunerata kingorna sumiginnarneqarsimasut tusaasinnaavara, oqarpoq nangillunilu.

-  Taamaattussaanngilaq. Taama pisoqartillugu isumagineqarluartussaapput, tamanna qularnanngilaq, Bjørk Lange Olsen oqarpoq.

Suliaq paasiuminaatsoq

Aaqqiissutissalli qanoq ittuunera oqaatigissallugu ajornartoq taassuma nassuerutigaa. Politiikerilli aaqqiissussaasut oqaatigaa, aaqqiiniarnerli ajornaatsuinnaneq ajortoq, Bjørk Lange Olsen oqaluttuarpoq.

-  Tamanna qularutissaanngilaq. Politikerimmi taassaapput Peqqinnissaqarfiup anguniagassaanik pitsaassusaanillu aalajangiisussat. Kisianni imaanngilaq suliassaq oqitsuusoq, taanna taama oqarpoq, imalu nangilluni.

- Apeqqut imaannaanngitsuuvoq. Qanorpiarmi iliortoqassanersoq amerlasuut qularutigigaat isumaqarpunga. Ajornartorsiutip qanoq aaqqinneqarnissaanut iliuusissat aalajangersimasut ilisimaneqanngillat, unammilligassarpassuaqarpoq, paasiuminaatsorujussuullunilu.

Sulialli pisariunerujussua aporfiginagu peqqinnissaqarfiup ajorluinnartumik ingerlasup iliuuseqarfigineqarnissaa tikillugu sorsuuteqarniarnini Bjørk Lange Olsenip oqaatigaa.

Pingaartumik Manuminap Peqqinnissaqarfimmiit nakkutigineqarnermini toqunera eqqarsaatigissagaanni.

-Angajoqqatummi paasisinnaanngilluinnarpara, meeqqap arfinilinnik ukiullip suliaritereernermi kingorna ullorpassuarni aammik meriutarnera nalinginnaasutut isigineqarsinnaammat, ulorianarsinnaasoq ilisimagaluarlugu. Angajoqqaat saaffiginninniariartut nakorsamit misissorneqartussaagaluarpoq.

Arlaleriarujussuarluta peqqissutsimut naalakkersuisoq Mimi Karlsen apersorusullugu saaffigaarput, maannamullu apersorneqarusunngilaq.