Narsarsuarmi sikunik alapernaarsuiffik matuneqalersoq
Qaammatit arlaqanngitsut qaangiuppata Kalaallit Nunaata kujataani sinerissap qanittuani sapaatip akunneranut marloriarluni qulimiguulinnik sikunik nakkutilliisoqartarunnaassaaq.
AAMMA ATUARUK Qaammataasat qulimiguullit taarsissavaat
Danskit Silasiorfiata DMI'p Narsarsuarmi Sikunik nakkutilliinermik suliaqarnini novembarimi Københavnimiit ingerlattalissavaa. DMI-mi silasiortoq tullersortaasorlu Søren Olufsen taama oqaluttuarpoq.
- Qaammataasaniit paasissutissat sukumiisorujussuit qulimiguulimmit assilisatulli ersaritsigisut ullutsinni pissarsiarisarpagut. Qaammataasat qulaattarneri qulimiguulinniit akulikinnerupput, radarsatellittet atorlugit silassaq misissorsinnaasarparput. Tassa imaappoq qaammataasat qulimiguulittut silamik naalangaqanngillat.
Kalaallit Nunaanni sikunik alapernaarsuiffiup 1959-imili Narsarsuarmi angerlarsimaffeqarsimasup oqaluttuassartaa taamaalilluni naavoq.
AAMMA ATUARUK Isforskere får glæde af spionsatelitter
Teknologiilli nutaap qaammataasani atorneqartup siku Kalaallit Nunaata avataaniittoq tamakkerlugu ajornanngittunnguamik nalunaarsorsinnaavaa.
- Qaammataasat assilisaat atortillugit Kalaallit Nunaat tamakkerlugu takuneqarsinnaasarpoq. Piumaguttalu Kalaallit Nunaat tamakkerlugu kangerluit sikui nalunaarsorsinnaallugit, Søren Olufsen oqarpoq.
Taamaaliorsinnaalissaguttali immikkut aningaasaliisoqartariaqassaaq.
DMI'p Kujataani sikunik nalunaarsuinermut ullumikkut ukiumut 12 millioner koruunit atortarpai.
AAMMA ATUARUK Illersornissaqarfiup issittumi suliassai pillugit nalunaarusiaq saqqummiunneqartoq
Søren Olufsenilu naapertorlugu Kalaallit Nunaat tamakkissagaanni taakku marloriaataat atorneqartariaqassapput.
- Umiarsuit angalasut sikusiornermik nalunaarsuinermillu ikiorserneqarnissamik assorsuaq soqutiginnittarput. Kialuunniit ilisimavaa silap pissusaa allanngoriartortoq umiartornermilu ileqqut allanngortut. Taamaattumik soqutigineqaleraluttuinnarpugut. Maannamut akiliisitsineq atortarparput. Kalaallit Nunaalli tamakkerlugu sikunik nalunaarsuisalissagutta arlaatigut aningaasaliisoqartariaqarpoq, Søren Olufsen oqarpoq.
