Illersornissaqarfiup issittumi suliassai pillugit nalunaarusiaq saqqummiunneqartoq
Illersornissaqarfiup issittumi suliassai pillugit nalunaarusiaq utaqqiloorneqartoq ullumi saqqummiunneqarmat, illersornissamut ministeri, Peter Christensen aamma nunanut allanut tunngasunut naalakkersuisoq, Vittus Qujaukitsoq, taama oqarput.
Saqqummiineq Københavnimi Illu Atlantikumi, Nordatlantens Bryggemi, pivoq, Savalimmiullu Danmarkimi sinniisuutitaat najuuppoq.
KNR-imiillu sapaatip-akunneranni kingullermi oqaluttuarisatsitut, nalunaarusiortuni qallunaallu naalakkersuisuinit inassutaavoq, illersornissaqarfiup issittumi suliassaanut Danmarkip ukiumut aningaasaliissutini siunissami ataavartussamik 120 millionit koruuniulersissagai.
Aningaasat amerlanersaat naalagaaffeqatigiit issittumi oqartussaaffiannik nakkutiginninnermut atorneqassapput, nakkutiginninneq qaammataasatigut annermik pissalluni. Taava aamma kalaallinik kajumittunik upalungaarsimasussanik pilersitsissapput, taakkualu illersornissaqarfimmik ingammik imaanik annaassiniartoqartillugu ikorfartuisassapput.
Tamannalu Vittus Qujaukitsup nuannaarutigaa:
- Isumaqarpunga illersornissaqarfiup nunatsinni iliuusai aningaasaqarnikkuinnnaangitsoq uuttortagassaasut. Tassami inassutit kingunerissavaat, nunatsinni inuusuttut innuttaasullumi allat illersornissaqarfiup suliaanut akuunerulersinneqarnerat.
- Illersornissaqarfiullu issittumi suliaanut annerusumik akisussaalernissarput isumaqassaqaaq, takussutissatuinnaanngitsoq, aammali tigussaasumik, nunanut allanut tunngasunut nalakkersuisoq oqarpoq.
