Hashi pillugu eqqartuussissut: Inuusuttut pingasut pineqaatissinneqarsimasunut inissiisarfimmiissapput

Eqqartuunneqarpoq, eqqartuunneqarpoq aamma eqqartuunneqarpoq.

Inuusuttut 20-t sinnerlugit ukiullit hashimik 14 kiilumik ingerlatitseqqiinissamik siunertaqarlutik nunatsinnut mittarfiit aqqutigalugit anngiortumik eqqusseriarsimasutut pissutsini arlalinni unnerluutigineqarneranni taama aalajangiisoqarpoq.

Suliaq Eqqartuussisoqarfik Sermersuumi sapaatip akunnera naallugu suliarineqarpoq, eqqartuussullu maanna nalunaarutigineqarpoq.

Inuit katillugit pingasut sapaatip akunnerani matumani unnerluutigineqarput. Angut 25-nik ukiulik, arnaq 24-nik ukiulik arnarlu 20-nik ukiulik.

Taakku tamarmik pissutsini tamani pinngitsuunerarput, taamaallaat angutip 25-nik ukiulik pineqaatissinneqarsimasut inissiisarfimmi hashimik 5,47 grammimik tigummiaqarsimasutut pisuutinneqarluni.

Angut 25-nik ukiulik arnarlu 20-nik ukiulik piumasaqaatitaqanngitsumik ukiuni marlunni qaammatinilu arfinilinni pineqaatissinneqarsimasunut inissiisarfimmiittussanngortinneqarput.

Arnaq 24-nik ukiulik piumasaqaatitaqanngitsumik ukiuni pingasuni pineqaatissinneqarsimasunut inissiisarfimmiittussanngortinneqarpoq.

Eqqartuussiviup taamaalilluni illersuisut pinngitsuutitsinissamik piumasaqaateqaraluartut unnerluussisussaatitaasup piumasaqaataa malippaa.

Aaqqissuulluakkamik anngiortumik eqqussuineq

Eqqartuussiviup hashimik anngiortumik eqqussuinerup aaqqissuulluagaanerata pineqarnera pingaartuutippaa. Hashi inuiaqatigiinnut tuniniarneqarsimagaluaruni tamanna inuiaqatigiinnut kingunerluuteqangaatsiassagaluarpoq.

Illersuisup unnerluussisussaatitaasullu Carlo Louis Gildsig Petersenimut aamma Jarina Steenholdtimut tunngatillugu eqqartuussut suliassanngorteqqinniarnerlugu eqqarsarsarfissaqarfiginiarpaat.

20-nik ukiullip Pipaluk Kimmernaq Olsen Rasmussenip eqqartuussut pinngitsuutinneqarnissamik piumasaqarluni eqqartuussut Nunatta Eqqartuussisuuneqarfianut erngertumik ingerlateqqinneqartussanngortippaa, unnerluussisussaatitaasullu sukannernerulersinniarlugu akerliilluni suliassanngorteqqippaa.

Suliaq ilungersunarluinnartuummat unnerluussisussaatitaasut ajugaanissaat pingaaruteqarsimasimasoq unnerluussisup, Brian Viholtip eqqartuussutip nalunaarutigineqarnerata kingorna KNR-imut oqaatigaa. Taassumali hashi 14 kiilu annertunersoq oqaaseqarfigerusunngilaa.

- Suliaq tunulequtaasunut tunngassuteqarmat pingaaruteqarpoq. Annertussusaa pingaarnerutinngilara, kisianni tunulequtaasut ingerlatitsiinnarsinnaajunnaarsinneqarnissaat pingaarnerutippara, taanna oqarpoq, nangillunilu:

- Eqqartuussut ilorrisimaarutigilluinnarpara. Inuusuttut aamma eqqarsaatinniipput, aamma aaqqissuussamik pinerluuteqannginnermi eqqarsarluaqqaartoqartarnissaa neriuutigaara.

Arnalli 20-nik ukiullip illersuisuata, Jannik Isidorip eqqartuussut ilorrisimaarutiginngilaa.

- Unnerluussissut naapertorlugu eqqartuunneqarnera tupaallaatigingaatsiarpara, uppernarsaatimmi naammanngitsut isumaqarpunga. Taamaammat Nunatta Eqqartuussisuuneqarfianut ingerlateqqipparput, tassani pinngitsuutitsisoqarnissaa naatsorsuutigaara.

Anngiortumik eqqussisussamut akiliuteqarneq

Inuit pingasut pinerluuteqaqataasut arlallit kikkuuneri ilisimaneqanngitsut suleqatigalugit hashimik ’allamut ingerlatitseqqinnissaq siunertaralugu’ anngiortumik eqqussuinissamik aaqqissuisimasutut eqqartuunneqarput.

Angut hashimik 4 kiilumik tigummiaqartoq Nuummi mittarfimmi siorna marsimi unitsinneqarpoq.

Arnaq 24-nik ukiulik angullu 25-nik ukiulik angutip Danmarkimit nunatsinnut angalanissaanik peqqusisimasutut, pilersaarusiorsimasutut, akiliisimasutut aaqqissuussisimasutullu eqqartuunneqarput.

Inuit taakku pingasut ullut pingasut qaangiutiinnartut – tassa siorna marsip 20-anit apriilip aallartinneranut Københavnimit nunatsinnut Nuummi, Aasianni Ilulissanilu mittarfiit aqqutigalugit hashimik allamik 4 kiilumik eqqusseriaqqikkaluartutut eqqartuunneqarput.

Taamannali iluatsinngilaq. Angutip 25-nik ukiullip marsip 22-ani tigusarineqarlunilu tigummigallarneqalernera ilaatigut pissutaasoq, unnerluussissummi allassimavoq.

2023-mi apriilimi arnat marluk unnerluutigineqartut anngiortumik eqqusseriaqqipput, tassanilu inuk alla Danmarkimit nunatsinnut angalanermini hashi 5 kiilungajak nassataralugu angalasimalluni. Inuk taanna Kangerlussuup mittarfiani unitsinneqarpoq.

Tamatuma saniatigut Carlo Louis Gildsig Petersenimit oqarasuaatit pingasut, hashi 5,47 grammi, puusiat silaannaartakkat aaqqatillu ataasiaannarlugit atortakkat arsaarinnissutigineqarput.

Jarina Steenholdtimit oqarasuaat aamma arsaarinnissutigineqarpoq.