Hashi pillugu eqqartuussinermi ullut pingajuat: Uppernarsaatit unnerluutigineqartunut atassuserneqarsinnaappat?

Eqqartuussisoqarfik Sermersuumi hashi 14 killu anngiortumik eqqunneqariaraluartoq pillugu ullut pingajussaani suliaqartoqarpoq.

Eqqartuussinermi ullumikkut unnerluussisussaatitaasup suliamut atatillugu uppernarsaatissaatai peqqissaarluinnartumik eqqartorneqartussaapput.

Angut 25-nik ukiulik arnallu marluk 20-nik 24-nillu ukioqartut ataatsimoorlutik unnerluutigineqarput, taakku 2022-mi decembarimit siorna apriilimut hashimik 14 kiilumik anngiortumik eqqusseriarsimasutut pasineqarput.

Unnerluussisussaatitaasup uppernarsaatinik eqqartuineq akunnernik tallimanik sivisussuseqassasoq eqqartuussinerup ulluata pingajuata aallartinnginnerani aarlerisaarutigereernikuuaa.

Oqarasuaatit soqutiginaateqartut

Oqarasuaatit oqarasuaatillu normui arlallit suliap ingerlanerani tamarmi unnerluussisussaatitaasumut pingaarutilimmik inissisimapput.

Unnerluussisussaatitaasup oqarasuaatit normui assigiinngitsut ilisimannittutut nassuiaateqartunut arlaleriarluni apeqqutiginikuuai. Aamma ataasinngornermi ilisimannittut nassuiaateqarneranni unnerluussisussaatitaasup normut assigiinngitsut oqarasuaatillu arsaarinnissutaasut apeqqusertarlugillu pingaarluinnartuutippai.

Taamaammat unnerluussisussaatitaasup oqarasuaatit sisamat oqarasuaatillu normui arlallit inunnut suliamut attuumassuteqartunut imaluunniit unnerluutigineqartunut pingasunut qanoq toqqaannartumik atassuteqarsorinerlugit uppernarsaaserniarlugu piffissartorfigingaatsiarpaa.

Oqarasuaatip normua immikkut ittoq oqarasuaatini tamani atuuttoq biilini nummerpladetulli uppernarsaasiisinnaasoq aqqutigalugu tamanna pivoq.

Taamaammat unnerluussisussaatitaasup uppernarsaatinik nalunaajaaneranut pingaaruteqarput, taassumalu tulleriaarlugit nassuiarpai.

Tamakku tamarmik oqarasuaammik piginnittup sumiissimaneranik, kimut attaveqarsimaneranik, oqarasuaatinut allanut aamma oqarasuaatit normuinut suliamut soqutiginaateqartunut sianersimaneranik imaluunniit sms-ersimaneranik erseqqissaanerupput.

Unnerluutigineqartut akornanni attaveqatigiinneq?

Akunnerup aappaata affaa qaangiuttoq unnerluussisussaatitaasup oqarasuaat angummut 25-nik ukiulimmut pigitinneqartoq tikippaa.

Unnerluutigineqartulli tamanna ataasinngornermi ilisimannittutut nassuiaateqarnermini eqqunnginnerarpaa.

Oqarasuaatip eqqartorneqarnerani oqarasuaammit tassannga inuit marluk suliamut attuumassuteqartut attavigineqarsimasut saqqummiunneqarpoq. Oqarasuaatip normuata aappaa anngiortumik eqqusseriartuusorineqartup, hashimik 4 kiilumik nassataqarluni Nuummi mittarfimmi siorna marsimi tigusarineqartup pigaa.

Taassumali ilisimannittutut ippassaq nassuiaateqarnermini unnerluutigineqartut pingasut arlaannaalluunniit ilisarisimanagu oqaatigaa.

Illersuisusut naammaginninngitsut

Ullup qeqqata missaani arnap 20-nik ukiullip eqqartuussissuserinermi illersuisua, Jannik Isidor unnerluussisussaatitaasup uppernarsaataanik naammaginninngilaq.

- Unnerluussisussaatitaasup tungaanit tigussaasumik uppernarsaatissaqanngilaq. Pasilliut politiit misissuinerminni aallaavigisaat taamaallaat uppernarsaatiginiarneqarpoq, pasilliutaasullu uanga illersukkannut tunngatillugu annikitsuararsuupput.

- Piareersimaffiginngisatsinnik tupaallaatigisinnaasannik tusagaqanngilanga, taamaammat illersukkama pinngitsuutinneqarnissaa suli isumalluarfigaara, taanna oqarpoq.

Angutip unnerluutigineqartup illersuisuata, Thomas Vildmandip unnerluussisussaatitaasup uppernarsaatigisai aamma ilorrisimaarutiginngilai.

- Unnerluussisussaatitaasoq ullumikkut uppernarsaasiisorinngilara, taamaammat pinngitsuutitsinissamik suli piumasaqaateqarpunga, taanna oqarpoq.

Unnerluussisussaatitaasoq eqqartuussivimmut uppernarsaatissiilluarsimanersoq suliap sisamanngornermi tallimanngornermilu nanginneqarnerani paasinarsiumaarpoq.