Hashi pillugu eqqartuussinermi ullup aappaa: Angajoqqaat marluk ilisimannittutut aggersarneqartut

Ini eqqartuussiffik nipaappoq. Ima nipaatsigaaq allaat kappoqqutip nakkarnera tusaaneqarsinnaalluni. Nalunaaqutaq 8.45-nngorpoq eqqartuussinerlu nalunaaqutaq qulingiluanut aallartittussaalluni, inimili eqqartuussiffiusussami pissangasoqarlunilu isumalioruluttoqartoq malunnarpoq. Ippassamut suliami illuatungeriit akornanni oqaloqatigiilaarfiusumut sanilliullugu ullumikkut oqaluttoqanngilaq.

Eqqartuussisoqarfik Sermersuumi hashimik 14 kiilumik anngiortumik eqqusseriarsimaneq pillugu ulluni makkunani suliaqartoqarpoq, inuillu pingasut unnerluutigineqarlutik.

Taakku ataatsimoorlutik qaammat tallimat ingerlaneranni hashimik 14 kiilumik nunatsinnut anngiortumik eqqusseriarsimasutut unnerluutigineqarput.

Eqqartuussinerup ulluata aappaa ilisimannittut nassuiaateqarnerannut atorneqarpoq. Ilisimannittut katillugit arfineq-marluk aggersarneqarput.

Politeeq, angutip 25-nik ukiullip ataataa, arnap 20-nik ukiullip anaanaa kiisalu suliami anngiortumik eqqussuisuusorineqartoq ilisimannittut ilagaat.

Arlalinnit ilisarineqartoq

Ilisimannittutut aggersarneqartut angut 25-nik ukiulik unnerluutigineqartoq arlalinnit ilisarineqartoq erngertumik erseqqarissisinneqarpoq.

'Angut ikani issiasoq ilisarisinnaaviuk?' Unnerlussisussaatitaasoq angutip 25-nik ukiullip tungaanut tikkuarluni ilisimannittunut arlalinnut aperivoq.

Akissutaallu assigiipput.

Ilisimannittut unnerluutigineqartumut isigalugit sikimisaarput aappimik akisarput.

25-nik ukiulik ilisimannittunut ilisarinnittunut sakkortuumik isiginninngikkaangami alartarpoq. Arlaleriarluni ilisimannittut nassuiaateqarneranni ersersitsinani alarluni illersuisuminut isussuttarpoq.

Inimi pissangasoqarnera malunnartoq

Ilisimannittut arlallit eqqissisimallutillu tatitupput, kisianni angut inuusuttoq aappilarujuttumik tujuuluaralik ilisimannittut nassuiaateqartarfiannukarmat pissanganarsisoqarpoq.

- Angut unnerluutigineqartoq ilisarisinnaaviuk?, taanna siullit ilaattut taama aperineqarpoq.

- Naamik, ingerlaannaq akivoq.

- Kinaanera nalunngiliuk?, unnerluutiginnittoq apereqqippoq.

- Naamik, ilisimannittutut nassuiaateqartoq akivoq.

- Aningaasanik pissarsiffiginikuuiuk?

- Naamik.

- Inummit allamit aningaasannannikuuvunga, kisianni kimut ingerlateqqinnerlugit naluara.

Ilisimannittulli angut 25-nik ukiulik festernermi naapinnikuusimallugu ilassisarsimallugulu uppernarsarpaa. Allatulli attaveqarnatik.

Ilisimannittoq nassuiaateqarnermini allagaatinik takutitsivigineqarpoq, taakku ilisimannittup kontoanut nuussinernik takutitsipput.

Oqalutsip atortorissaarutaa siutiminit talerperlermit saamimmut illuartiutigalugu assani aalatippai, taamaalillunilu unnerluussisup pappiaqqat saaminut ilisai isigilluarsinnaalerlugit.

Unnerluussisussaatitaasorli paasisaqarnerunngilaq, ilisimannittummi nassuiaatini tassa 25-nik ukiulimmit unnerluutigineqartumit aningaasanik tigusaqarsimanani attatiinnarpaa.

Taamaammat ilisimannittoq sivitsunngitsoq ingerlavoq, ilisimannittorlu nutaaq isertinneqarluni.

Anaanaasoq ataataasorlu nassuiaateqartussatut isertinneqartut

Tassa 25-nik ukiullip unnerluutigineqartup ataataa. Inuusuttup unnerluutigineqartup angunni nassuiaateqarnissap aallartinnginnerani eqippaa.

Ingimmalli eqqartuussisup ataataasoq unnerluutigineqartumut qanigisaagami nassuiaateqarnissamut pisussaatitaanngitsoq ilisimatippaa.

- Taamaappat nassuiaateqarusunngilanga, angut naatsumik oqarpoq, isernerminiillu minutsialuit qaangiutiinnartut inimit aneqqilluni.

Angajoqqaaq alla ilisimannittut arfineq-marlussaattut kingullertullu isertinneqarpoq. Tassa arnap 20-nik ukiullip arnaa.

Taanna videokkut attaveqarnikkut Nuummi pinerluuteqarsimasunut inissiisarfimmit inissinneqarfigisimasaminit toqqaannartumik attaveqarpoq, arnaq 20-nik ukiulik paniusoq allatulli isiginnaarummut saapput. Annikitsumik qungujulavoq.

Ilisimannittoq unnerluutigineqartumut qanigisaasuugami oqaaseqarnissaminut pisussaatitaanngitsoq aamma ilisimatinneqarpoq.

- Taamaappat oqaaseqarnianngilanga, taanna oqarpoq.

Tamanna inimi eqqissisimajunnaarsitsilaarpoq.

Aarlerinartartoq

Unnerluussisussaatitaasoq arnamut unnerluutigineqartup aappaanut tassa 24-nik ukiulimmut tunngatillugu apeqquteqarniaraluarpoq.

Arnalli marluk illersuisui ilanngupput, taakkulu pissutsit imminnut qanippallaaqimmata immikkoortitsisoqarsinnaannginnerarpaat.

- Unnerluussisussaatitaasut ataatsimoortitsilluni unnerluutiginninniaraangata tamanna aarlerinartortaasinnaasarpoq, illersuisup aappaa oqarpoq.

Oqallittoqalaareerluni anaanaasup oqaaseqannginniarnera unnerluussisussaatitaasup akueraa.

Nalunaaqutaq 15.17 eqqartuussineq taamaatinneqarpoq.

Unnerluussisussaatitaasoq illersuisulluunniit ullumikkut eqqartuussinerup kingorna oqaaseqarusunngillat. Eqqartuussineq aqagu nanginneqaqqissaaq, tassanilu uppernarsaatit sammineqassallutik. Unnerluussisussaatitaasup ullup ilarujussua uppernarsaatinik saqqummiinermut atussavaa.