Inuit pingasut hashimik anngiortumik eqqussisimannginnerartut
Assaat tunui kakiorsimasut tujuulup qasertumik taartumik qalipaateqartup ataani takuneqarsinnaapput. Angut qasukkarsimalluni assani paarlallugit nalunaajaasussat sassarsimasarfiup issiavittaani qernertumi issiavoq, unnerluussisorlu isigalugu.
Angut 25-nik ukiulik hashimik anngiortumik eqqussueriarsimaneq pillugu suliami annertuumi Eqqartuussisoqarfik Sermersuumi ullumi suliarineqalersumi unnerluutigineqartut pingasut ilagaat.
Unnerluutigineqartut issiavianni arnat marluk 20-t sinnerlugit ukioqartut issiaqatigai. Inuusuttut pingasut ‘peqatigiillutik' hashimik 14 kiilumik allamut ingerlatitseqqinnissamut siunertaqarlutik nunatsinnut mittarfik aqqutigalugu anngiortumik eqqusseriarsimasutut pasineqarput.
Pinngitsuunerartut
Unnerluutigineqartut tamarmik pinngitsuunerarput, taakkulu illersuisuisa pinngitsuutinneqarnissaat piumasarigaat eqqartuussinerup aallarteqqammernerani oqaatigineqarpoq.
Tamanna unnerluussisussaatitaasut angummut 25-nik ukiulimmut arnamullu 20-nik ukiulimmut atatillugu piumasaqaatitaqanngitsumik ukiunik marlunnik qaammatinillu arfinilinnik pineqaatissinneqarsimasunut inissiisarfimmiittussanngortitsiniarnerannut akerliliivoq.
Unnerluutigineqartoq kingulleq arnaq 24-nik ukiulik piumasaqaatitaqanngitsumik ukiuni pingasuni pineqaatissinneqarsimasunut inissiisarfimmiittussanngortinneqassasoq unnerluussisussaatitaasut isumaqarput.
Naak suliaq ilungersunaraluartoq inimi eqqartuussiffiusumi eqqissisimasoqarpoq, suliamik eqqartuussissuserisut, tamarmik suliami paasissutissanik allagaateqartut oqaloqatigiittarput. Eqqartuussinerli aallartimmat silaannaq allanngorpoq.
Oqaaseqarpianngitsut
Politiit marluk, unnerluutigineqartut pingasut, illersuisui, eqqartuussisoq eqqartuusseqataasullu pingasut suliamilu unnerluussisussaatitaasoq eqqartuussivimmi najuupput.
Unnerluussisussaatitaasoq siulliulluni oqaaseqarmat angut 25-nik ukiulik eqqissiveqarani issiavoq. Sigguni arlaleriarluni isugutsersarpai, itisuumillu iisisarluni issiavimmini ukamarpoq. Nalunaajaasussat sassarsimasarfianni arnat marluk issiaqatiginerannut sanilliullugu eqqissiviilliornerorpasippoq.
Unnerluutigineqartut pingasut tulleriiaallutik nalunaajaasussat sassarsimasarfiannukarlutik suliami pissutsinut tallimanut nassuiaateqariartortarput.
Arnalli marluk eqqartuussivimmi oqaaseqarpallaanngillaq, taakkumi arlaannaalluunniit oqaaseqarumanngilaq, illersuisummili apeqqutaat taamaallat akisarlugit.
Imminut ilisarisimannginnerartut
Arnat marluk siorna Danmarkimi akunnittarfimmeeqatigiinnertik sioqqullugu naapinnikuusimanatik inoqutinullu attaveqaqatigiiffitsigut 2016-imili ‘imminnut nalunngilersimallutik’ tamarmik nassuiaatigaat.
Arnalli marluk angut 25-nik ukiulik peqatigisimasaattut unnerluutigineqaqataasoq ilisarisimanagu nassuiaatigaat.
Eqqartuussivimmi suliaq marlunngornermi nangeqqinneqassaaq, tassanilu ilisimannittutut nassuiaateqartoqassalluni. Arnaq 20-nik ukiullip arnaa, takornariaqartitsivimmit ilisimannittoq, politeeq kiisalu angut siorna marsip 17-iani hashimik anngiortumik eqqussuisutut tigusarineqartoq nassuiaateqartussat ilagaat. Angut suliami matumani anngiortumik eqqussuisartuusorineqarpoq.
