Nannumik siumuineq: Nunakkut pisunnialersaartunut siunnersuutitsialaat pingasut

Nannunik Kujataanut tikiuttoqartarnera tusarnartaanngilaq. Nannunilli Kujataanut ukioq manna tikiutttoqarnerungaatsiarpoq aasaq manna sikorsuaqarneroqineranik pissuteqartumik.

Nannullu takornarianit asiarpiartanngitsunillu toqqissiviilliuutaasarput.

Nunatsinniliuna nunakkut pisunniartilluni suut sillimaffigisarialiusut?

Apeqqut taanna akiuminaappoq. Nunatsinnimi takornarianut innutaasunullu asiarnialersaartunut pisortatigoortumik najoqqutassaqanngilaq.

Taamaammat taakkununnga siunnersuutitsialaat pingasut takornarilerisut ilaat oqartussallu oqaloqatigisareerlugit allaatigisami uani sammivagut.

1) Sumiiffigisappit inui aperikkit

Takornariartitseqatigiiffik Blue Ice Explorer Kujataani asiarnialersaartunik sullissinermik ukiorpassuarni misilittagaqarpoq. Nannunik siumuisoqarsimaneranik naalarnisarlutik sullitatillu aamma taamaalioqqusaritik, Blue Ice Explorerimeersoq Steen Svendsen oqarpoq.

- Sumiiffigisappit inui aperikkit Facebookimiluunniit alaatsinaaguk nannumik sumiiffigisanni eqqaaniluunniit siumuisoqarsimanersoq. Taamaattoqarsimatillugu tusarsaalertortarpoq, Steen Svendsen oqarpoq.

Nannumik siumuisoqarsimatillugu Blue Ice Explorer nannumik siumuiffiusumukannginnissaq siumuiffiusimasulluunniit eqqaanukannginnissaq innersuussutigisarpaat.

2) Aallaasisarit ajunaalernermiluunniit seqqortaasisarit

Ullorpaalunni asiarniaruit taava aallaasisassasutit minnerpaatulluunniit ajunaalernermi seqqortaasisassasutit, Kalaallit Nunaanni politiit aamma Blue Ice Explorer innersuussutigaat.

 - Nannumik qimaasaarissutaasinnaasunik isumannaallisaasisartariaqarpoq. Soorlu qoqernartuusinnaapput. Ajunaalernermi kalerrisaarutaasinnaapput (soorlu seqqortaataasinnaapput, aaqq.)) aallaalluunniit, Steen Svendsen oqarpoq.

Blue Ice Explorer takornarialerisullu allat aallaasinik ajunaalernermilu seqqortaatinik attartortitsisarput.

- Nunatsinni illoqarfiit arlaannaanniluunniit aallaasisisoqarsinnaavoq, aallaasilli nunatsinni pisiat nunamut allamut eqqunneqaqqusaannginnerat eqqaamasariaqarpoq, politiit oqarput.

3) Qanillattussanngilluinnarpat

Siunnersuut kingulleq tassaavoq nanumik siumugaqaruit qanillattussanngilluinnarit. Visit Greenlandimi asiartilluni nannumik siumuigaanni nanorlu siumugaq upanninniarpasilissagaluarpat qanoq iliornissamik najoqqutassiornikuuvoq “Nannunik takunninnermi najoqqutassaq”-mik taallugu najoqqutassiaq naalakkersuisut saqqummiussaat aallaavigalugu.

• Nannup arajutsippatit: Arriillioqqissaarlutit, nipaarsaaqqissaarlutit takutinnaveersaaqqissaarlutillu qimaagit.
• Nanoq takoreeraluarlutit nikinngippat: Arriillioqqissaarlutit nipaarsaaqqissaarlutillu saniporsorlutit nakkutigeqqissaajutigalugu qimaagit.
• Nanoq alapernaallunilu taqissorluni palliguppat: Tallitit silukkit nipiliorlutillu. Nilliagit nipiliorilluunniit. Aallaasit ajunaalernermiluunniit seqqortaatit imassaleruk.
• Nannup upanniarpasippatit:  Ajunaalernermi kalerisaarummik nannup tungaanut seqqorit. Imminut illersortariaqalissaguit aallaariaannaanissaanut sillimagit. Nannup upanniinnarpatit qungaserorniarsariuk.
• Nannup upappatit: Sakkuusinnaasumik sumilluunniit soorlu savimmik ajaappissannilluunniit akioruk. Qingaatigut aamma/imaluunniit isaatigut sakkortuumik isimmittaruk. Imminut illersorumallutit niaqqut pukutsullu sullatsaalikkit.
• Qimaasimaguit: Oqarasuaat angallattagaq, VHF-radio oqarasuaalluunniit qaamataasiamut attavilik atorlugu ikiortissarsiorit.

Aalisarnermut nakkutilliisoqarfik nannumik siumuisoqartillugu pinartoqaraangat ornigutilertornissamut upalungaarsimasoqartoq, Aalisarnermut Piniarnermullu Naalakkersuisoqarfik KNR-imut ilisimatitsivoq.

Naalakkersuisoqarfiup upalungaarsimasui 48 25 20-mut sianerfigalugit ulloq unnuarlu attavigineqarsinnaapput.

Kikkulluunniilli nannumik siumuisut siumugaat upanninniarpasippat upannippalluunniit naalakkersuisoqarfimmit akuerineqaqqaanngikkaluarlutik imminnut illersorumallutik aallaannissinnaatitaapput.