KNAPK-mi siulittaasup tullia nutaamik inuttalerneqarpoq
Aalisartut piniartullu kattuffiat KNAPK tusagassiutinut nalunaarummi taama allappoq.
KNAPK-p Siulersuisuuneri, 69-inik ukiulik Niels Lorentzen siulittaasup tulliatut tallimanngorneq juulip ulluisa 26-ani toqqarpaat. Ataatsimiinnermi qinersinikkut qinerneqarluni. Taamaasilluni Aslak V. Jensenip martsimi ukioq manna KNAPK-miit tunuartinneqarnerata kingorna inissisimaffik inuttalerneqarluni.
-Nuannaarutigaara KNAPK-mi Siulersuisuunerni siulittaasup tulliatut inissisimaffik pillugu toqqaasoqarmat, taamaasillunilu eqqissilluni nalornisuerullunilu sulisoqarsinnaalerluni. Niels Lorentzen ukiorpassuarni KNAPK-p Siulersuisuunerini suleqataasarpoq, aamma Siulersuisuunerit misilittagaqarluartumik suleqateqarput, tamannalu KNAPK-tut ittumi kattuffimmi pisariaqartinneqarpoq. KNAPK-p siulittaasua Nikkulaat Jeremiassen taama oqarpoq.
Niels Lorentzen Imarsiornermut Ilinniarfimmi ilinniartitsisutut soraarneruvoq, tassanilu qanittoq tikillugu tullersortitut ilinniartitsisutullu Paamiuni atorfeqarnikuuvoq. Aalisariutini naalakkatut 1. grad ilinniagaqarpoq. KNAPK-p Saattussanut Siunnersuisoqatigiivini aamma siulittaasuuvoq.
Siusinnerusukkut aalisariutini naalakkatut, umiarsuarmi piginnittutut aamma ukiut 40-it sinnerlugit aalisartutut misilittagaqarpoq.
KNAPK-p Piniarnermut Siunnersuisoqatigiivini ilaasortaq 59-inik ukiulik aalisartoq piniartorlu Knud Mølgaard Sisimiuneersoq, siulersuisuunernut sinniisutut aamma inissippoq.
