- Taanna isumaqarpunga unneqqarinnerunngitsoq.

Aalisartut piniartullu kattuffiata, KNAPK-p siulittaasua, Nikkulaat Jeremiassen Aalisarnermut Piniarnermullu naalakkersuisup, Kim Kielsenip (Siumut) aalisarneq pillugu inatsit pillugu oqaluuserinninneranut atatillugu taama oqarpoq.

Inatsit Inatsisartuni ullumikkut siullermeerneqarluni oqaluuserineqassaaq.

KNR-ip Nikkulaat Jeremiassen KNAPK-p Nuummi umiarsualimmut qanittumi allaffiani naapippaa.

Taannalu nuannaanngilaq.

Taanna politikerinit putusaarneqartutut misigisimallunilu aalisarnermut inatsisissamut siunnersuut akuerinngilaa.

- Inatsisissaq tamaat akuerinngilarput, taanna oqarpoq.

Peqatigiiffiup aalisarnermi pisassiissutit qanoq agguaanneqarnissaat pingaartumik naammasimaanngilaa, aamma inatsip sinerissap qanittuani aalisarnermut sineriammilu nunaqarfimmut qanoq kinguneqarnissaa ernumassutigigalugu.

Aalisartut piniartullu kattuffiata allarpassuit assigalugit ernumassutiminnik nassiussigaangamik aalisarnermullu inatsisissaq pillugu akerliliigaangamik tusaaneqartanngitsutut misigisimapput.

- Tusarniaanermi sinerissamit ilanngukkusutatsinnik nassiussivugut, arlaannaannulluunniilli qanilleriarsimanngimmata taanna tamaat akuerinngilarput, Nikkulaat Jeremiassen oqarpoq.

Naalakkersuisup aalisartut putusaarai

Aalisarnermut piniarnermullu naalakkersuisoq, Kim Kielsen (Siumut) aalisarneq pillugu inatsisissaq pillugu saqqummiigaangami unneqqarittanngitsoq Nikkulaat Jeremiassen isumaqarpoq.

- Oqarsinnaavunga uukapaatitsinermilluunniit ilaatigut oqartoq, taanna oqarpoq.

Aalisarnermut piniarnermullu Naalakkersuisoqarfiup aalisarneq pillugu inatsissaq pillugu sapaatit akunnerini arfineq-pingasuni tusarniaasoqareersorlu Kim Kielsen tusagassiortunik januaarimi katersortitsivoq.

Kommuninit, aalisartunit ilisimatusartuniillu isornartorsiuisoqangaatsiarpoq.

Ilisimatusartut aalisarneq pillugu inatsit aalisarnermi sulisukinneruneranik tunitsiviillu matoornerannik kinguneqassasoq isornartorsiuinerminni oqaatigaat.

Kim Kielsenip isornartorsiuinerit tusagassiortunik katersortitsinermini itigartitsissutigai, ilisimatusartullu isornartorsiuinerat paatsiveerussaariniarnerarlugu.

- Taamaattut paatsiveerussaanerit allatigullu tulluanngitsutut isigaakka. Taama ersaritsigisumik oqassuunga. Uani pingaartupilussuugami aalisartoq kinaluunniit aalisarnermut inatsisissami toqqissilluni – pisinnaatitaaffini pisussaaffinilu – aamma tassa takusinnaassagai. Uagut naalakkersuisooqatigiinni aalisartunik nungusaanianngilagut, taanna taamani oqarpoq.

Tamanna pututitsiniaanerusoq Nikkulaat Jeremiassen isumaqarpoq. Naalakkersuisummi aalisarnermut inatsimmut oqaaseqaataat atuaqqissaaraanni aalisarnermi inuussutissarsiornermi suliffissat ikiulissasut allassimavoq.

- Inatsisissaq oqaasertallu misissoraanni taamaaqqinnaarpoq, Nikkulaat Jeremiassen oqarpoq, nangillunilu:

- Soorlu aamma ilisimatuut uatsitulli paasigaat. Taamaattumik isumaqarpunga eqqunngilluinnartumik ulorianarluinnaqqinnaartumillu siammarterisoqartoq.

Nuna tamakkerlugu akerliussutsimik takutitsineq

Aalisartut piniartullu kattuffiat nuna tamakkerlugu ullumi akerliussutsimik takutitsiniarlutik nalunaaruteqarpoq. Allagartarsuit natermi piareersimapput. Pisuujunerusut pisunngornerunissaat umiatsiaararsortukinnerulernissaalu aarlerisaarutigaat.

Aalisarneq pillugu inatsit akuerineqassappat pisassiissutillu annikillineqassappata taama pisoqarnissaa KNAPK-p siulittaasuata ernumassutigaa.

KNAPK-p siulittaasuata oqarnera naapertorlugu ilaasortarpassuit aalisarsinnaajunnaassapput. Sinerissami tunitvisiit matuneqarpata tamanna nunaqarfinni ilaqutariippassuarnut ”annertuumik kingunerluuteqassasoq”, taassuma erseqqissaatigaa.

- Taamaammat siooranaataa annertoorujussuuvoq.

Kattuffilli aatsaat siullermeerluni akerliussutsimik takutitsilinngilaq.

Aalisartut kingullermik novembarip aallaqqaataani saarulliit akiisa appariartornerat pissutigalugu akerliussutsimik takutitsipput.

Maniitsumi aalisartut tusaaneqanngitsutut misigisimagamik aalisarnermut ataatsimiititaliarsuup isumaliutissiissutaa januaarimi ikuallappaat.

Ullumikkut akerliussutsimik takutitsineq Royal Greenlandip saani tunitsinermut akit appariartornerat akerleralugu aallartissaaq kingornalu Inatsisartunut aalisarneq pillugu inatsit akerliussutsimik takutitsiffigiartorneqassalluni.

Nikkulaat Jeremiassenip politikerit ullumikkut akerliussutsimik takutitsinermi ukkatarinninnerulersitsinissaat neriuutigaa.

- Kusanartunik oqaatsinik anngussuiffigineqartarpugut, allaat maanga malilluta oqaloqatigineqartarluta. Kisianni taanna qaangiukkaangat susoqaqqinneq ajorpoq, taanna oqarpoq.

- Neriuppugut suleqatigineqarlutalu tusaaneqassalluta, massakkut tusaaneqannginnatta.

Aalisarnermut naalakkersuisup Kim Kielsenip (Siumut) apersorniarnera periarfissanngilaq. Taanna aatsaat aqagu apersorneqarsinnaalluni KNR-imut paasissutissiivoq.