Ukiumoortumik uteqqiineq: KNAPK nipisat suaannik tunisinermi akit pillugit ilimasaareqqippoq
Aasinaasiit.
Upernalermat nipisat suaannik tunisinermi akit KNAPK-mit suaartaatigineqaleqqipput.
Pisoq tusareersimasorigukku taava tupinnarpallaanngilaq. Ukiummi tamarluinnaasa taama pisoqartarpoq.
Nipisat suaanik tunisinermi akit, imaluunniit aalisartut kattuffiata KNAPK-p aalisakkanillu tunisassiorfissuup Royal Greenlandip akinik suli isumaqatissuteqarsimannginnerat, ukioq manna suannik tunisisoqarsinnaaneranik aammaarluni qulalersitsivoq.
KNAPK-p siulittaasuata Nikkulaat Jeremiassenip tamanna oqaatigaa:
- Una suleqatigiissinnaanermut tunngatillugu, ajunngitsumik ingerlasoq isumaqarpunga. Ajornartorsiulli uaaniippoq, akimut tunngasumik eqqartuisoqarusunngimmat, taanna oqarpoq.
Aalisartut kattuffiata oqarnera naapertorlugu nipisat suaannik tunisinermi akinik isumaqatiginninniarusullutik Royal Greenlandimut saaffiginnissutertik suli qisuariarfigineqarsimanngilaq.
Akinillu isumaqatigiissuteqartoqartinnagu nipisannialerniaratik KNAPK-miit aammaarlutik oqaatigaat.
- Royal Greenland A/S-ip tamatigut utaqqineqartarnera naammalerpoq. Nuna tamakkerlugu akerliulluni aporaannersuarmik aallartitsilerpugut, KNAPK-p siulittaasua tusagassiorfinnut sisamanngormat nalunaarummi oqarpoq.
Soorlu ukioq kingulleq taamatoqqissaaq pisoqartoq.
Akit pillugit isumaqatigiinniartoqanngilaq
Royal Greendimiilli isumaqatigiinniartoqannginnera oqaatigineqarpoq:
- Massakkoqqissaaq isumaqatigiinniartoqanngilaq, Royal Greenlandip attaveqaqatigiinnermut pisortaa Merete Lindstrøm oqarpoq.
Nipisat suaannik pisiortortunut allanut unammillernermi equngasoqalrsinnaammat, akit pillugit isumaqatigiinniartaanngivillutik, taavalu aamma akit pillugit isumaqatigiisusiornissamik itigartitsisarsimalutik, taanna oqaluttuarpoq.
- Ukioq kingulleq aamma taama oqarpugut, siuliani aamma, ukioq manna aamma uteqqissavarput. Allanngortoqanngilaq.
Suleqatigiinnermi ajunngitsuuneranik Nikkulaat Jeremiassenip oqarnera, Merete Lindstrømip aamma oqaatigaa.
- Sapaatit akunnerani kingullermi oqariartuutigineqartutut ittumik takkuttoqaraangat tupaallannartaqaaq, Merete Lindstrøm oqarpq.
Politikerit saappai
Royal Greenlandi itigaramiuk, KNAPK-p siulittaasuata Nikkulaat Jeremiassenip politikerit saappai. Tamannali aamma iluatsippallaanngilaq:
- Allaat ima ilungersunartigivoq, akip minnerpaaffilernissaanut tunngatillugu Inatsisartunut Naalakkersuisunullu saaffiginnippugut, una aningaasanut inatsimmut ilanngutilaarsiuk, akit appasipppalllaarujussuarneri pissutigalugit. Taannaluunniit maannamut tigujumaneqanngilaq, Nikkulaat Jeremiassen oqarpoq.
Ataatsimut isigalugu Naalakkersuisut naatsorsuutissaannginnerarpai.
- Kattuffiup siulittaasuatut qinigaagamali, tungitsinnut alloriartoqanngilaq minnerpaannguamilluunniit, taanna oqarpoq.
Akerliulluni aporaannersuarmik taasartik qanorpiaq ingerlanneqassanersoq, KNAPK-mit tusagassiorfinnut nalunaarummi erseqqissarneqanngilaq. Sapaatilli akunnerini aggersuni aalajangerneqarumaartoq allaaserineqarpoq.
Nipisat suaanik tunisinermi akit pillugit isumaqatigiissuteqartoqanngimmat, nuna tamakkerlugu akerliussutsimik takutitsinissaq KNAPK-mit ukioq kingulleq ilimasaarutigineqarpoq. Aalisartullu akerliussutsimik takutitsiartorlutik aninngitsiarneranni KNAPK-p akit nutaat Royal Greenlandimit siunnersuutigineqartut akuerai.
2022-mi nipisat suaanik tunisinermi akit sivisuumik utaqqineqareermata akerliussutsimik takutitsisoqarpoq.
Ukioq manna nipisat suaanik tunisinermi akit Royal Greenlandimit aqagu nalunaarutigineqarumaartut, Merete Lindstrømip KNR-imut oqaatigaa.