Naalakkersuisut saarulliit akii KNAPK-mut isumaqatigiinniutiginianngikkaat

Aalisartut piniartullu saarulliit akiisa qaffanneqarnissaa pissutigalugu nunatsinni illoqarfinni arlalinni akerliussutsimik takutitsipput.

KNAPK-p siulittaasuata, Nikkulaat Jeremiassenip oqarnera naapertorlugu akerliussutsimik takutitsineq aningaasanut inatsisip isumaqatigiinniutigineqarnerani sunniuteqarnerpaaniarneq pillugu aaqqissuunneqarpoq.

Aningaasaqarnermut naalakkersuisup, Erik Jensenip (S) aappaagumut aningaasanut inatsisissamut tunngaviusoq isumaqatigiissut aqqaneq-marlunnik qupperneqartoq ataasinngormat ullaap tungaani saqqummiuppaa – saarulliillu akii ataasinnguamilluunniit eqqaaneqanngillat.

Politikerit aalisartunut ikiullutik saarulliit akiinut sunniuteqarnavianngitsut Erik Jensenip tusagassiortunik katersortitsinerup kingorna KNR-imut oqaatigaa.

- Soorunami partiinut tamanut aamma apuuppoq, taamaattumillu aamma oqaloqatiginninnerit aamma assigiinngitsunik periarfissarsiuussinerit ujartuiffiusumik inissisimasimapput, akinut tunngassuteqartut allallu ilaatigut oqariartuutigineqartut allanik suliassanik massakkut ingerlatsimmata, naammagittaalliuteqarnikuummata taanna utaqqimaarparput, Erik Jensen oqarpoq.

Suli neriuuteqartoq

Naak Erik Jensen akuliunnissaminut itigartitsigaluartoq. KNAPK-p siulittaasua suli neriuppoq. Taassuma aningasanut inatsisisaq pillugu ataasinngornermi isumaqatigiissummi saarullit akii ilaatinneqanngimmata uggornarnerarpaa, aningaasanulli inatsit sapaatit akunnerata tulliani taasissutigineqartinnagu tusarneqarnissartik suli neriuutigaa.

- Pakatsinarpoq aamma nassiussivugut aningaasanut inatsimmut 2024-imut pulateriarneqarsinnaasunik, aammalu una aningaasaqarnermut naalakkersuisoq nammineerluni akerliussutsimik takutitsereernerup kingorna nammineerluni maannga kattuffimmut ornippaatigut aammalu oqaloqatigiinnissaq ataatsimeeqatigiinnissarlu periarfissarsiuutissallugit nammineerluni neriorsuilluni, Nikkulaat Jeremiassen oqarpoq.

Nunatsinni aalisartut piniartullu Royal Greenlandillu isumaqatiginninniartartussaagaluartut Naalakkersuisut isumaqatiginninniartarnerat immaqa tupigutsannarsinnaagaluarpoq.

Ingammik KNAPK aalisartut piniartullu illersorniarlugit isumaqatiginninniartarnissamik suliaqartartussatut pilersitaagaluartoq.

Nikkulaat Jeremiassenillu Naalakkersuisunut saaffiginnittarnertik ajornartorsiutitut isiginngilaa, saaffissartimmi ataasiinnaasoq taanna oqarpoq.

- Tassa uani inuiaqatigiit pigisaat eqqarsaatigalugit Royal Greenland tassani pineqarpoq. isumaqatiginiarsinnaannginnatsigit pisussaammata tassunga akulerussinnaallutik imaluunniit akulerussinnaasutuaallutik taamaammat taakkununnga saaffiginnittarpugut saaffiginninnissaat siunertaralutigu, KNAPK-p siulittaasua oqarpoq.

Naammagittaalliuteqarneq uniffiliisoq

Aalisarnermulli naalakkersuisup, Kim Kielsenip (S) Erik Jensenillu Atuisoqarnermut Unammilleqatigiinnermullu Aqutsisoqarfimmut unammilleqatigiinnermut annikinnerulersitsisutut kisermaassisutullu ingerlatsisoqarneraalluni naammagittaalliuuteqartillugu aalisartut sinnerlugit isumaqatigiinniarniarnatik oqaatigaat. Naammagittaalliuteqarneq taanna KNAPK-p nammineq aallartitaraa.

Atuisoqarnermut Unammilleqatigiinnermullu Aqutsisoqarfiup suliaq aningaasanut inatsisip isumaqatigiissutigineqarluni naammassineqannginnerani tassa novembarip 15-iaatinnagu naammassisimanissaa naatsorsuutiginagu KNR-imut nalunaarutigaa.

Taamaammat KNAPK maanna nikeriarsinnaajunnaarpoq. Taamaakkaluartorli siulittaasup, Nikkulaat Jeremiassenip aalisartut Royal Greenlandimik unnerluussinerat ugguutiginngilaa:

- Royal Greenlandip iliuuserisai kukkusuusut isumaqaratta kisermaassisuunerarlugu naammagittaalliutigaarput. Aamma uagut iliuuserisarput kukkunerusoq oqarfigineqanngilagut. Inatsit tunngavigalugu naammagittaalliuummik nassiussivugut, taanna oqarpoq.