Sineriammi tamarmi aalisartut Royal Greenlandimut akerliussutsimik takutitsinissamut piareertut

KNAPK-mi ilaasortat saarulliit aalisakkallu allat akiisa oktobarip qulingiluaannili tunisinermut akiinut 23 procentimik appaasoqarnera akerlissutsimik takutitsissutigissavaat.

Akerliussutsimik takutitsinissaq qinikkat iliuuseqanngikkunik aalisartorpassuit akiliisinnaajunnaaratarsinnaasut qinikkanut maluginiartinnissaanik siunertaqarpoq, aalisakkammi ilaatigut saarulliit 10,75 koruunimit 8,25 koruunimut appartinneqarpoq.

Taamaammat KNAPK-p immikkoortortaqarfii arlallit akerliussutsimik takutitsilernissaminnut allagartarsuarnik piareersaapput.

Narsami aalisartut piniartullu tunisinermi akinut nutaanut akerliunissaminnut piareersaleruttorput. Assi © : Frederik Jesen, Narsaq

Aalisartut piniartullu ullumi nalunaaqutaq 12.45 ilaatigut Nuummi Namminersorlutik Oqartussat Inatsisartullu ataatsimiittarfiannut ingerlaarnermik ilaqartumik akerlissutsimik takutitsissapput.

Illoqarfiit pingaarnersaanni kisimi akerliussutsimik takutitsisoqassanngilaq. Sineriap sinnerani aalisartut piniartullu akornanni aamma ilorrisimaanngillat. Taamaammat KNR-ip paasissutissarsiai naapertorlugit Narsami, Aasianni Qaqortumilu aamma akerliussutsimik takutitsisoqassaaq.

KNAPK-p Qaqortumi immikkoortortaqarfiani siulittaasup, Jens Peter Kielsenip oqarnera naapertorlugu Qaqortumi aalisartut piniartullu Royal Greenlandimut aamma akerliussutsimik takutitsissapput, tamatumali saniatigut aalisakkeriviup Arctic Prime Fisheriesip tunisinermi akinut appaaniarnani aalajangernera aamma nersualaarusuppaat.

Royal Greenlandip aalisakkerinermi inissisimanini atornerlullugu tunisinermi akinut appaasoq, KNAPK isumaqarpoq. Aki taanna kattuffiup appasippallaarsoraa.

Saarulliit akii oktobarip aallartinneraniit 23 procentimik apparput, tamannalu pissutigalugu aalisartut piniartullu ullumikkut akerliussutsimik takutitsissapput. Assi © : Frederik Jesen, Narsaq

Nuna tamakkerlugu akerliussutsimik takutitsivigineqartussat tassaapput  Royal Greenland, Polar Seafood kiisalu Naalakkersuisut. Tunitsiviit pineqartut kisermaassisutut suliffeqarfittut ingerlatsinerarlugit KNAPK-mit aamma isornartorsiorneqarput, kattuffiullu qinikkat iliuuseqartariaqarsorai, aalisartummi akiliisinnaajunnaarpata tamanna nunatta karsianut sunniuteqartussaammat.

- Akit appasippallaarnerisa nalaani ingerlatissat ikummatissallu akia qaffappat aammalu aningaasat pisissutigineqarsinnaaneri eqqarsaatigalugu inuiaqatigiinut tamarmut tunngavoq. Taamaalilluni nammineersinnaaneq imminut ikiorsinnaajunnaarneq killiffigineqassappat nunatta karsiata nappassinnaanngilaa. Taamaattumik qinikkat kivitsisariaqarput kivitseqataallutik ajornartorsiummillu qaangiiniaqataallutik, Nikkulaat Jeremiassen oqarpoq.

Taamaammat KNAPK-p siulittaasuata qinikkat akerliussutsimik takutitsinermik tigusilluarnissaat aamma neriuutigaa.

- Torersumik inuttaanut akisussaasunut anngussinermi neriuutigilluinnarpara siulittaasutut assammik isaasinerput tigulluassagaat suleqatigiinerlu aallartissasoq. Soorunami taanna pisimanngippat tassungaanaq unikkunnanngilaq, Nikkulaat Jeremiassen oqarpoq.

KNAPK-p Royal Greenland Atuisoqarnermut Unammilleqatigiinnermullu Aqutsisoqarfimmut aamma nalunaarutigaa.