KNAPK: Kim Kielsenip pakatsisippaatigut
KNAPK saarulliit akiisa appartinneqarnikuuneri pillugit Inatsisartut ataatsimiittarfiata silataani akerliussutsimik pingasunngornermi takutitsimmat, aalisarnermut naalakkersuisoq Kim Kielsen naalakkersuisullu allat najuupput.
Kalaallit Nunaanni Aalisartut Piniartullu Kattuffiata (KNAPK) siulittaasua, Nikkulaat Jeremiassen akerliussutsimik takutitsinerisa aqaguani Nuummi allaffiani sisamanngornermi oqaloqatigaarput.
Nunatta aalisartuisa akerliussutsimik takutitsinerat naalakkersuinikkut pissaanillit aalisartunut ikiorsiinissaannik Royal Greenlandilu saarulliit akiinik qaffaaqqusinissaannik kinguneqassasoq, KNAPK-p ilaasortaasalu neriuutigisimagaluarpaat.
Naalakkersuinikkulli pissaanillit tassa taamaaliunngillat. Taamaammat Nikkulaat Jeremiassen akerliussutsimik takutitsinerat pillugu oqaloqatigaarput. Aalisarnermut naalakkersuisup, Kim Kielsenip, Qanoruumit apersorneqarnera qimerluujutigaarput, saarulliillu akiinik qaffaanissamik pilersaaruteqarnani Kim Kielsen erseqqissaavoq.
Taassuma apersorneqarnera Nikkulaat Jeremiassenip oqaaseqarnani isiginnaarmagu aalassappoq. Kim Kielsenimmi akissutaanut kissaammerlunilu pakatsivoq.
- Aalisarnermut naalakkersuisup nutaap tigulluassagaatsigut naatsorsuutigisimagaluarpara, Kisianni taannaannaq isumalluutigigaanni pakatsinaqaaq, Nikkulaat Jeremiasen oqarpoq.
Aalisartut naalakkersuisoq alla isumalluarfigigaat
Aalisartut piniartullu aningaasaqarnermut naalakkersuisoq, Erik Jensen, isumalluarfiginerugaat, KNAPK-p siulittaasua oqarpoq. Illuatungeriit taakku naapinnissamik isumaqatigiissutereersimallutik, siulittaasoq oqarpoq:
- Tassa massakkut aningaasaqarnermut naalakkersuisup periarfissiinera utaqqimaassavarput. Taanna takoriartigu oqaloqateqarnermi qanoq alloriartoqarsinnaanersoq, Nikkulaat Jeremiassen oqarpoq.
Kim Kielsen Qanoruumit tamannarpiaq pillugu apersorneqarami Erik Jensen aamma innersuuppaa. Naalakkersuisormi Kim Kielsen aalisarnermut tunngasuni akisussaasuuvoq, aningaasaqarnermulli naalakkersuisoq, Erik Jensen, Namminersorlutik Oqartussat piginneqatigiiffiinut tunngasuni akisussaasuuvoq.
KNAPK-mmi aalisartullu alla, tassa Erik Jensen, isumalluarfigerpasikkaat erserpoq:
- Soorlu oqartunga akerliussutsimik takutitsinerup aalisartut piniartullu maanaannaq inissitaanngilaq. Aningaasanununa inatsisissap suliarineqarnera nalerorlugu tassunga pulatitseriarnissaq eqqarsaatigalugu akerliussutsimik takutitsisoqartoq, Nikkulaat Jeremiassen oqarpoq nangillunilu:
- Taamaattumik piginnittut saaffigigaluarpagut uani piginnittuussusertik aallaavigalugu akuliuteqqullugit. Aamma suli neriunneq uninngilaq, aamma neriuutigivarput suli.
