Aalisarnerup siunissaa, nunatta aningaasaqarnera aamma inuiaqatigiit tassani pineqarput. 

Naatsumik oqaatigalugu: Aalisarnermut inatsisissap tusamasaallunilu tusaamanerlugaasup ukioq manna naammassineqarnissaa nunatsinnut aalajangiisumik pingaaruteqarpoq. Oqariartuut taanna politikerinit, ilisimatusartunit aalisartunillu ukioq kingullerli tusartualerparput, aamma siornaak. 

Aalisarnermut inatsisissatut siunnersuut sisamanngornermi Inatsisartuni politikerinit siullermeerlugu oqallisigineqassaaq. Ukioq kingulleq ukiaanerani ataatsimiinnermi siullermeerneqanngitsoormat, ilumut ukioq manna iluatsinnissaa apeqqutigerusunnarpoq. 

- Inatsit ajornartorsiuterpassuaqarluarpoq ajorluinnartumillu kinguneqarsinnaalluni, taamaattorli maanna iluatsinnissaannik eqqarsartoqarnera malugisinnaavara, inuiaqatigiit pissusaat pillugu Ilismatusarfimmi ilisimatusartoq Birger Poppel taama oqarpoq. 

Inuiaqatigiit pissusaat pillugu ilisimatusartuunermi sanitigut Birger Poppel aalisarneq aalisarnermullu inatsisissaq pillugu ilisimasaqangaatsiarpoq. Suliarmi taanna pillugu ukiut 30-t sinnerlugit suliaqarpoq. 

Taanna aamma ilisimatusartut allat tallimat peqatigalugit, Inatsisissatut siunnersuut pillugu tusarniaanermi isornartorsiuillutik akissuteqarlutik januaarimi allagaqartunut ilaavoq. 

Aalisarnermut inatsisissap ukioq manna iluatsinnissaanik ilimasunnerminik aperineqarami eqqarsaqqaarpoq. 

- Qularisorujussuuara, akivoq nangillunilu: 

- Qanoq pisoqarnissaa ilisimanngilarput, inatsisip uuma kingunissaai aamma ilisimanngilagut. 

Inatsit tamatigoortoq 

Aalisarnermik suliaqartut soqutigisaqartullu assigiinngitsut amerlasuut inatsisissami kalluarneqarnerat, naammassiniarnerata ajornakusoorneranut peqqutaaqataavoq. Umiatsiaararsortuniit suliffeqarfissuarnut kilisaataatilinnut aningaasarsiornikkut isaatitsilluartunut, kikkunnummi tamanut kalluaavoq. 

2023-mi aalisarnermit nunanut allanut tunissassiat 5 milliardit koruuninik naleqarsimasut Nunatta Naatsorsueqqissaartarfiani atuarneqarsinnaavoq. Ukioq kingulleq nunatta nunanut allanut tunisassiai tamakkerlugit sanilliukkaanni, taakku 6 milliardit koruuninik naleqarput, taamaammallu aalisarneq isaatitsiffiunerpaavoq. 

- Inoqutigiinnut amerlasuunut suliffeqarfiillu aningaasaqarnerinut aalisarneq pingaarutilerujussuuvoq. Nunami suliffissaqarnermut nunanullu allanut tunisassiornermut pingaaruteqarpoq, taamaammallu inuiaqatigiit aningaasaqarnerannut pingaaruteqarluni, taanna oqarpoq. 

Taakku saniatigut piujuartitsinissamut piumasaqaatit assigiinngitsut arlallit aamma qulakkeerneqartussaapput, Birger Poppel oqarpoq. 

Uumasoqassuseq imaanilu avatangiisinik innarliinnginnissaq eqqumaffigisassaapput, aamma nunaqarfeqarpoq aalisarnermik inuuniutilinnit napatinneqartunik.

- Inatsimmi ataatsimi ajornartorsiutit unammillernartullu aalisarnermut tunngasut tamarmik ataatsikkut aaqqinniarneqarput, Birger Poppel oqarpoq. 

Naatsumik oqaatigalugu aalisakkat kisimik pineqanngillat, tamaammallu aalisarnermut inatsisissaq taama pingaartigaaq taassuma oqaatigaa. 

Aalisarnermut inatsisissaq tuaviuussaq

Inatsisissatut siunnersuutip siullermeerneqarnissaani aalisartut nammineq pigisassanik pisassiisalernissamik (IOK) siunertaqarnerup taassumalu kingunerisassaata annertunerpaamik avissaartuussutaasinnaanera Birger Poppelip ilimagaa. 

Aalisartut nammineerlutik pigiinnagassaannik pisassiisalernerup kingunerisaanik, sinerissap qanittuani aalisartut affaannanngorlutik ikilinissaat ilisimatusartut ilimagaat.  

Kisianni tassa kingunerisa nalinginik kisitsisoqarnissaa siunnersuutinullu allaanerusunik siunnersuusiortoqarnissaa amigaataasut Birger Poppel isumaqarpoq. 

Inatsisiliortoqarnissaanillu piumassuseqarnerup tuaviuussamik aalajangiisoqarneranik kinguneqannginnissaa, akerlianilli piffissaqarluarluni sulisoqarnissaa taassuma neriuutigaa, 

- Neriuppunga qunusuissuseqartoqassasoq ima oqarsinnaasunik: "Maanga killereerpugut, ajornartorsiutit paasiniarnissaat ingerlateqqitsigu taavalu inatsisissap aappasaaneerneqarnissaa pingajussaaneerneqarnissaalu ataatsimiinnermi allami ingerlateqqillugu". taanna oqarpoq.