KNAPK-p siulittaasuata tullia tunuartitaasoq

Kalaallit Nunaanni Aalisartut Piniartullu Kattuffiata KNAPK-p siulittaasuata tullia Aslak Jensen, KNAPK-p siulittaasuata tulliatut ingerlaannartumik atuutilersumik tunuartitaavoq.

KNAPK tusagassiorfinnut nalunaarummi taama ilisimatitsivoq.

Siulersuisuunerit Aslak W. Jensenip inuit qarasaasiakkut naapittarfiini namminissarsiorluni kattuffiup sulinera pillugu saqqummertuartarnera pitsaanngitsutut isigineqarpoq, KNAPK tusagassiorfinnut nalunaarummi ilaatigut allappoq.

Siulittaasup tullia oqaasiinnartigut allakkatigullu mianersoqqussummik siusinnerusukkut tunineqarnikuusoq KNAPK-mi siulersuisut nalunaarutigaat.

Siulersuisut siulittaasuat Nikkulaat Jeremiassen ima oqarpoq:

- Kattuffiup malittarisassaani ersarissumik allaqqavoq kattuffiup avammut kiinnertarnerani siulittaasoq taannaasoq oqaaseqartartoq. Inuit qarasaasiatigut oqallittarfianni killeqanngitsumik oqariartuuteqartarnermigut Aslak W. Jensenip akisussaaffimi pisussaaffimmilu ilaanik sumiginnaavoq, Nikkulaat Jeremiassen ugguaqisoq oqarpoq, nangillunilu:

- Taamatut pisoqarnera ulluinnarsiutaanngilaq, taamaattumik tunuartitsinissamik aalajangerniarneq imaannaanngilaq. Kattuffiup sulinermini ataatsimoorluni ingerlanissaa pingaaruteqarpoq, aamma ataatsimeersuarnermi anguniakkat timitalerniarlugit sulineq akisussaaffillu nalornisinneqassanngillat, Nikkulaat Jeremiassen oqarpoq.

Kina KNAPK-p siulittaasuata tulliatut inississanersoq KNAPK-p tusagassiorfinnut nalunaarutaani ilisimatitsissutigineqanngilaq.