Inuit pingasut hashi 14 kiilu pillugu eqqartuussivimmi unnerluutigineqalersut

Ikiaroornartumik anngiortumik eqqusseriaraluarneq pillugu suliaq Eqqartuussisoqarfik Sermersuumi ataasinngorpat aallartinneqassaaq.

Arnat marluk 20-nik 24-nillu ukiullit kiisalu angut 25-nik ukiulik unnerluutigineqassapput. Pasineqartut pingasut unnerluussut naapertorlugu 2022-mi decembarimit siorna apriilip tungaanut hashimik katillugit 14 kiilumik anngiortumik eqqusseriarsimasutut pasineqarput.

Eqqornerusumik oqaatigalugu hashi 14.110,4 grammi sisamariarlugu anngiortumik eqquteriarneqarsimasoq pineqarpoq.

Pinerluuteqaqataasut ilisimaneqanngitsut

Unnerluussut naapertorlugu pasineqartut pingasut pinerluuteqaqataasut arlallit ilisimaneqanngitsut suleqatigalugit hashimik ’allamut ingerlatitseqqinnissaq siunertaralugu’ anngiortumik eqqussuinissamik aaqqissuisimapput.

Angut hashimik 4 kiilumik tigummiaqartoq Nuummi mittarfimmi siorna marsimi unitsinneqarpoq.

Unnerluussissut naapertorlugu arnaq pasineqartoq 24-nik ukiulik angullu 25-nik ukiulik pasineqartoq pinerluuteqaqataasut allat peqatigalugit angutip Danmarkip nunattalu akornanni angalanissaa pilersaarusiorpaat, akilerpaat aaqqissuullugulu.

Pingasunit ataaseq tigusarineqartoq

Ullut pingasut qaangiutiinnartut – tassa siorna marsip 20-anit apriilip aallartinneranut pasineqartut pingasut Københavnimit nunatsinnut Nuummi, Aasianni Ilulissanilu mittarfiit aqqutigalugit hashimik allamik 4 kiilumik eqqusseriaqqikkaluarput.

Taamannali iluatsinngilaq. Angutip 25-nik ukiullip marsip 22-ani tigusarineqarlunilu tigummigallarneqalernera ilaatigut pissutaasoq, unnerluussissummi allassimavoq.

Aaqqatit ataasiartakkat, puusiat silaannaartakkat iPhonelu

2023-mi apriilimi arnat marluk pasineqartut anngiortumik eqqusseriaqqipput, inuit pingajuat Danmarkimit nunatsinnut angalanermini hashi 5 kiilungajak nassataralugu angalasimasoq, unnerluussissummi allassimavoq. Inuk taanna Kangerlussuup mittarfiani unitsinneqarpoq.

Arnat marluk qanga tigusarineqarsimanersut allassimanngilaq. 20-nik ukiulik piumasaqaatitaqanngitsumik ukiuni marlunni qaammatinilu arfinilinni pineqaatissinneqarsimasunut inissiisarfimmiittussanngortinneqarsinnaavoq. 24-nillu ukiulik piumasaqaatitaqanngitsunik ukiuni pingasuni pineqaatissinneqarsimasunut inissiisarfimmiittussanngortinneqarsinnaalluni.

Tamatuma saniatigut arnamit 24-nik ukiulimmit IPhone 11 arsaarinnissutigineqarpoq.

Angut 25-nik ukiulik tigusarineqarmat IPhonet arlallit, oqimaassutsimut uuttuut digitaliusoq, aaqqatit ataasiartakkat, puusiat silaannaartakkat silaannaarsinermullu maskiina arsaarinnissutigineqarput. Angut politiit taperserneqassappata piumasaqaatitaqanngitsumik ukiuni marlunni affaanilu pineqaatissinneqarsimasunut inissiisarfimmiittussanngortinneqassaaq.

Tamatuma saniatigut unnerluutigineqartut suliami aningaasartuutinik akiligassinneqassasut unnerluussisussaatitaasut oqaatigaat.