Angut hashimik iioraasimasoq tigummigallagaasoq

Taamatut-aasiit pisoqarpoq.

Angut 20-t 30-llu akornanni ukiulik hashimik iioraasimasoq, anngiortumillu eqqusseriaraluartoq politiinit tigusarineqarpoq maannalu tigummigallagaalluni.

Kalaallit Nunaanni Politiit pigaartuisa pisortaat Malik Olesen KNR-imut arfininngornermi taama oqarpoq.

- Inuk Kangerlussuarmi ippassaq ullaakkut nalunaaqutaq qulit qaangilaarneranni tigusarineqarpoq, politiit pigaartuisa pisortaat ilisimatitsivoq.

Hashi angummit iiorarneqarsimasoq qanoq annertutigisoq eqquteriaraluarneqarnersoq politiit ilisimatitsissutigisinnaanngikkallarpaat.

- Inuttaa Kangerlussuarminngaanniit Nuummukaanneqarnikuuvoq, eqqartuussivimmullu ullaap tungaani sassartinneqarluni, maannalu tigummigallagalluni, Kalaallit Nunaanni Politiit pigaartuisa pisortaat Malik Olesen oqarpoq.

Angut ulluni pingasuni tigummigallagaasussanngortinneqarpoq.

Inuk alla Kangerlussuarmi sapaatit akunnerata kingulliup naanerani aamma tigusarineqarpoq. Pineqartoq tassaavoq arnaq 34-nik ukiulik. Hashi timimut nipittartumik aalajangiunneqarsimavoq erlummiillunilu. Taanna pineqaatissinneqarsimasunut inissiisarfimmi qaammatini tallimani inissinneqartussatut eqqartuunneqarpoq.

Inuit pingasut hashimik iioraasimallutik anngiortumik nunatsinnut siorna eqqusseriaraluartut toqupput.