Arnaq eqqusseriaraluartutut ingerlaannaq pineqaatissinneqartoq
Arnaq 34-nik ukiulik hashimik 1,4 kilomik nassartoq Sisimiunut ingerlaarluni Kangerlussuakkoortoq arfininngormat tigusarineqarpoq.
Hashi timaanut nipittartumik aalajangiunneqarsimasoq erluanullu mangunneqarsimasoq Kalaallit Nunaanni Politiini pigaartut pisortaat Bjørn Bjerregaard ataasinngornermi ullaakkut ilisimatitsivoq.
- Arnaq arfininngormat tigusarivarput hashimik 1 kilomik 455 gramimillu nassartoq, pinerluuteqarsimasunullu inissiisarfimmiinnissamut ingerlaannartumik ippassaq pineqaatissinneqarluni, Bjørn Bjerregaard oqarpoq.
Qaammatinik tallimanik pineqaatissinneqarpoq.
Arnaq eqqusseriarsimasutut eqqartuunneqareeraluarluni iperarneqarsimasoq pigaartut pisortaat oqaluttuarpoq. Kingusinnerusukkut pineqaatissinneqarnerminik atuisussaaneranik tamanna pissuteqarpoq.
- Arnap ingerlaannaq pineqaatissinneqarnerminik atuisussaannginneranut pissutaavoq pineqaatissiineq naammattumik sivisussuseqanngimmat. Toqqaannartumik pineqaatissiissummik atuissagaanni piffissaliunneqartoq aalajangersimasumik sivisussusilerneqarsimassaaq, taamaammallu taamannak aalajangiisoqarsimassalluni, Bjørn Bjerregaard oqarpoq.
Arnaq assingusumik pinerluuteqarsimasutut politiinit ilisimaneqanngilaq. Pineqaatissinneqarnerminik atuisussanngornissaminut taamaammat utaqqiinnassasoq politiit ilisimatitsipput.
Arnat arlallit
Timiminni toqqorsillutik eqqusseriarsimasutut tigusarineqartut kingulliit marluk arnaapput. Arnap 34-nik ukiullip saniatigut arnaq 50-ikkunnik ukiulik hashimik iioraasimasoq sisamanngormat tigusarineqarpoq.
Arnaq 19-inik ukiulik hashimik eqqusseriaraluartoq 29. septembari unitsinneqarpoq.
Ajornartorsiut tamanna annertusiartortoq politiit kisitsisaataanni takuneqarsinnaavoq. Kalaallit Nunaanni hashi katillugu 129 kilomik oqimaassuseqartoq 2022-mi arsaarinnissutigineqarpoq. Tamanna 2021-mut sanilliullugu pingajorarterutingajaanik annertuseriarneruvoq, taamani 97 kilo sinneqartoq politiinit arsaarinnissutigineqarmat.
Aanngajaarniutinik iiooraalluni eqqussiniarneq ukioq manna inuunermik naleqanngilaq, 2022-mili inuit pingasut iioraallutik eqqusseriaraluarnertik toqqutigaat.
