Arnaq eqqusseriaraluarluni tigusaasoq
Kalaallit Nunaanni Politiit sisamanngornermi ullaap tungaa arnaq 50-ikkunnik ukiulik hashimik eqqusseriaraluartoq tigusaraat.
Taama pigaartut pisortaat Preben Kleist tallimanngornermi ullaakkut oqarpoq.
Arnaq Kangerlussuup mittarfiani tigusarineqarpoq ippassaq nal. 11.30 missaani. Kingorna scannerneqarpoq tigusarineqarlunilu paasineqarmat hashimik ilumioqartoq.
- Hashimik ilumioqartoq scannerinerup takutimmagu tigusaraarput.
- Ullaaq manna tikillugu tigummigallarparput haship tamarmi timaanit anillassimanissaa qulakkeerniarlugu, Preben Kleist oqaluttuarpoq.
Arnaq iperarneqaraluarluni eqqartuussivimmukarnissani naatsorsuutigisinnaavaa suliami suli pasineqarmat. Suliami misissuineq pissutigalugu politiit annertunerusumik paasissutissiisinnaanngillat.
Amerliartortut - annertusiartortut
Hashimik ilumioqarluni eqqusseriaraluartuni arnaq kisiartaanngivippoq. Politiit arnamik 19-inik ukiulimmik hashimik timiminiititsilluni eqqusseriaraluartumik sapaatip akunnera matuma siorna tigusarinnipput.
Siorna oktobarimi angut ilumoqarluni eqqusseriaraluarluni aanngajaarniutit inalugaani katersuummata toquvoq.
Siorna juunimit novembarimut eqqusseriaraluarlutik toqusuni pingajuuvoq.
Kalaallit Nunaanni hash 2022-mi 129 kiilu arsaarinnissutigineqarpoq. 2021-mut sanilliullugu pingajorarterutingajaanik amerlanerullutik taamani 97 kiilungajaat politiinit arsaarinnissutigineqarmata.
Arnaq ippassaq tigusarineqartoq qaqugu eqqartuunneqassanersoq nalorninarallarpoq. Hashi qanoq annertutigisoq eqquteriarsimaneraa aamma nalorninarpoq.
