Angut 35-nik ukiulik hashimik eqqusseriarnermut ulluni arfinilinni tigummigallarneqartoq
Naqqiissut: Ilanngutassiami siullermi angut januaarip arfineq-aappaani tigusarineqartoq allassimagaluarpoq. Tamanna kukkuneruvoq, novembarip ulluisa arfineq-aappaat pineqarpoq.
Kalaallit Nunaanni Politiit angut 35-nik ukiulik hashinik poortukkanik eqqusseriaraluartoq Kangerlussuarmi ataasinngornermi 7. novembari tigusaraat.
Inatsit tunngaviusoq naapertorlugu marlunngormat killisiorneqarpoq akunnernilu 72-ini tigummigallarneqarluni.
Kalaallit Nunaanni Politiit KNR-imut taama ilisimatitsipput.
AAMMA ATUARUK Aaja Chemnitzip hashimik eqqussuiffinni scannerit amerlisikkusukkai
Angut ullumi killisioqqinneqarpoq ullunilu arfinilinni tigummigallagassanngorteqqinneqarluni – tassa 17. novembarip tungaanut.
Pingasut toqusut
Aanngajaarniutinik eqqusseriartut amerlisimapput.
Angut hashit poortukkat inalugaani katersuussimanerannik pissuteqartumik Qaqortumi 20. oktobari toquvoq.
Aqajaqqumini aanngajaarniutinik eqqusseriaraluarlutik juunimili toqquteqartut pingajoraat.
AAMMA ATUARUK Angutip 53-inik ukiullip ikiaroornartunik iioraasimanini toqqutigigaa
Ikiaroornartunik nunatsinnut eqqusseriaraluartut maannamut 43-t ukioq manna tigusarineqarsimapput, taakkunannga amerlanersaat hashimik eqqusseriaraluartuullutik. Siornamut naleqqiullugu pingasoriaammik amerlisimapput.
Hashi 97,4 kiilu ukioq manna maannamut arsaarinnissutigineqarpoq. Ukiunut kingullernut tallimanut agguaqatigiissillugit taakku amerlanerujussuupput, tassami ukiumut agguaqatigiissillugit 64 kiilu eqqussoriaraluarneqartut arsaarinnissutaasarsimammata.
Tamanna politiit 2021-imi nalunaarsugaanni takuneqarsinnaavoq.