Angutip 53-inik ukiullip ikiaroornartunik iioraasimanini toqqutigigaa
Qaqortumi angut 53-inik ukiulik oktobarip 20-ani toquvoq. Taanna ikiaroornartunik poortornikunik iioraasimavoq, taakkulu erlaviinut katersuussimapput aseruuttoorninilu toqqutigaa.
Kalaallit Nunaanni Politiit tusagassiutinut taama nalunaaruteqarput.
Juunimiit ullumimut inuit katillugit pingasut ikiaroornartunik nunatsinnut eqqusseriarnertik toqqutigaat. Tamanna alianarlunilu ernumanartoqartoq, politikommisæri, Malik Sandgreen oqarpoq.
- Tamanna alianarluinnarpoq, kingumunaasit ikiaroornartumik eqqusseriaraluarneq inuup inuuneranik naleqarpoq.ukioq mannaannaq pingajussaa taamatut toqusoqarpoq, tamannalu soorunami ernumalersitsivoq, amerlanerujartuinnartummi inuunertik taamatut navianartorsiortittarpaat, Malik Sandgreen oqarpoq.
Politiit ilanngaaserisullu nunatsinnut ikiaroornartunik eqqusseriartarneq unitsinniarlugu annertuumik maanna suleqatigiissuteqarput.
Ikiaroornartumik iioraalluni eqqusseriarneq inuunermik ulorianartorsiortitsisarpoq
Ikiaroornartumik eqqusseriarniarluni aalajangeraanni inuunermik navianartorsiortitsinerussaaq, nunatsinni nakorsaaneq Henrik L Hansen eqqaasitsivoq.
- Sunaluunniit poortorneqarsimasoq erlaviup iluani nippussinnaavoq. Taamaalisoqartillugu inuup inuunera sukkasuumik navianartorsiorfimmut pisarpoq, assersuutigalugu inalugaq qissallassinnaavoq allatulluunniit ulorianartorsiortoqarsinnaavoq, Henrik L. Hansen oqarpoq.
Ikiaroornartunik iioraasimalluni ikiaroornartut puuisa putunerisigut aamma toqquteqartoqartarpoq.
Ikaroornartunik nunatsinnut eqqusseriaraluartut maannamut 42-t ukioq manna tigusarineqarsimapput, taakkunannga amerlanersaat hashimik eqqusseriaraluartuullutik. Siornamut naleqqiullugu pingasoriaammik amerlisimapput.
Hashi 97,4 kiilu ukioq manna maannamut arsaarinnissutigineqarpoq. Ukiunut kingullernut tallimanut agguaqatigiissillugit taakku amerlanerujussuupput, tassami ukiumut agguaqatigiissillugit 64 kiilu eqqussoriaraluarneqartut arsaarinnissutaasarsimammata.
Tamanna politiit 2021-imi nalunaarsugaanni takuneqarsinnaavoq.
