Hashi pillugu eqqartuussinermi ullut sisamaat: Uppernarsaatit naammanngitsut illersuisut oqarput

Eqqartuussisoqarfik Sermersummi ullumikkut eqqartuussisoqannginnerani imermut kannit ulikkaaqqapput, kaffisorfiillu pappiusut kaffimik imaqarlutik.

Inuusuttut 20-t sinnerlugit ukioqartut mittarfiit aqqutigalugit hashimik 14 kiilumik ingerlatitseqqinnissamik siunertaqarlutik anngiortumik eqqusseriarsimasutut unnerluutigineqarnerisa naammassineqarnissaanut ulloq ataasiinnanngorpoq.

Nalunaaqutaq qulingiluanngortoq eqqartuussisoq eqqartuusseqataasullu iserput. Isersimasullu tamarmik nikuipput.

“Takanna ingeriarlusi,” eqqartuussisoq oqarpoq.

Sisamanngornermi ulloq ullunut siuliinut sanilliullugu sivikinnerungaatsiartumik pilersaarusiugaavoq.

Ullumikkut unnerluussisussaatitaasut illersuisullu suliap qanoq aalajangiiffigineqarnissaanut tunngavilersuuteqartussaapput. Tamatumalu kingorna susoqarnissaanut eqqartuussisoq apeqqutaaginnalissaaq.

Unnerluussisussaatitaasoq aalajangiusimasoq

Unnerluussisussaatitaasoq siulliulluni tunngavilersuuteqarpoq. Taassuma uppernarsaatit sapaatip akunnera ingerlanerani saqqummiussani tunngavigai.

Tupaallaatigisassaanngitsumillu unnerluussisussaatitaasup angutip 25-nik ukiullip arnallu 24-nik 20-nillu ukiullip pissutsini tamani pisuutinneqarnissaanut uppernarsaatit naammattut ataatsimoortumik nalilerpaa.

Unnerluussisussaatitaasup videoliaq eqqartuussivimmi takutinneqarsimasut ilaatigut pingaartuutippaa. Videoliaq Nuup mittarfiani videoliutikkut nakkutilliissummit immiussaavoq, tassanilu unnerluussisussaatitaasup angut 25-nik ukiulik, unnerluutigineqartoq mittarfiup biilinut unittarfianit marsip 17-iani ullup qeqqata nalaani ingerlasuusoraa.

Unnerluussisussaatitaasup oqarnera naapertorlugu tamanna politiit marluk mittarfimmut piffissami tassani apuunnerminni 25-nik ukiulimmik taassuminnga biilimiittumik ilisarinnissimaneraanerannut naapertuuppoq. Politiit suliami matumani pinerluuteqaqataasorineqartoq hashimik nassataqartoq unitsinneqarsimasoq pillugu aggersarneqarsimapput.

Unnerluussummut tunngatillugu unnerluutigineqartut pingasut anngiortumik eqqussinissamut atatillugu suleqatigiissimanerannut bankimit allagartaq, angalanermut uppernarsaatit inoqatinut attaveqaatit assigiinngitsut arnallu marluk imminnut ilisarisimasariittut Danmarkimullu piffissami assigiillutik angalasimanerat naammattumik uppernarsaataasinnaasut unnerluussisussaatitaasut isumaqarput.

Unnerluussisussaatitaasut angutip 25-nik ukiullip arnallu 20-nik ukiullip piumasaqaatitaqanngitsumik ukiuni marlunni qaammatinilu arfinilinni pineqaatissinneqarsimasunut inissiisarfimmiittussanngortitsinissaq piumasaqaatitut aalajangiusimavaa. Aamma arnap 24-nik ukiullip piumasaqaatitaqanngitsumik ukiuni pingasuni pineqaatissinneqarsimasunut inissiisarfimmiittussanngortinneqarnissaanut piumasaqaatini aalajangiusimavaa. Taassuma unnerluutigineqartut pingasut anngiortumik eqqusseriarnerat ataatsimoorussaanera pilersaarusiugaaneralu pissutsinut sukannernerulersitsisorai.

Uppernarsaasiinera annikitsoq

Illersuisut pingasut naggataani tunngavilersuuteqarput.

Taakku pingasuullutik assigiimmik oqariartuuteqarput, tassa unnerluussisussaatitaasoq naammattumik uppernarsaasiinngitsoq, taamaattumik pissutsinik tallimanit sisamani pinngitsuutitsisoqarnissaa piumasaraat. Pissut ataasiinnaq eqqartuussiffiussasoq tassaavoq angut 25-nik ukiulik pinerluuteqarsimasunut inissiisarfimmi hashimik 5,47 grammimik tigummiaqarluni pisuutinneqarluni eqqartuunneqareermat.

Illersuisut unnerluussissut oqaasertaliinerlu pingaarnerutippaat.

Unnerluussummi uniffiit, naggatit oqaatsillu tamarmik unnerluussisumit uppernarsarneqarsinnaasariaqartut, arnap 24-nik ukiullip angutillu 25-nik ukiullip illersui oqarput. Unnerluussisorlu taamaaliorsimanngitsoraat.

- Uppernarsaateqanngilaq, kisianni politiit pasilliutit misissuinerminni tunngavigisaat. Taakkulu naammanngitsut illersuisut naggasiillutik oqaaseqarnerminni oqaatigaat.

Unnerluutigineqartut pingasut akornanni ‘peqatigiinniapiluttoqarsimaneranut’ uppernarsaateqanngissoraat. SMS-ikkut Snapchatikkullu allaqatigiinnerit naammattumik uppernarsaataanngillat.

Nuummi Mittarfiup biilinut unittarfianit videoliamut siusinnerusukkut eqqaaneqartumut atatillugu 25-nik ukiullip illersuisuata angut biilinik uninnera takutinneqarani biilimilli ingerlatsisoq taamaallaat takutinneqartoq maluginiarpaa.

Tamatuma saniatigut illersuisup oqarasuaatinut paasissutissat unnerluussisussaatitaasup pingasunngornermi piffissaq sivisooq atorlugu eqqartugai inuit unnerluutigineqartut akornanni attaveqaqatigiittoqarsimaneranut tunngavigineqarsinnaanngitsorai.

Nalunaaqutaq 11.25 eqqartuussineq taamaatinneqarpoq, eqqartuussisullu siunersioqatigiikkiartorlutik. Tamanna qanoq inerneqarnersoq aqagu eqqartuussutip suaarutigineqarnerani paasinarsissaaq.