Inuusuttut nunatsinni ilinniarusuttut
Ilisimatusarfimmi ilinniarneqarsinnaasuni aqqanilinni 205-it ilinnialernissamut akuerineqaramik, aatsaat taama amerlatigipput, maannamut kisitsisit takutippaat.
Tamannalu rektorip Gitte Adler Reimerip nuannaarutigisorujussuuaa.
AAMMA ATUARUK Ilisimatusarfimmi inatsisilerituutut ilinniartoqarsinnaalersoq
- Qujamasuutigisorujussuuarput, aamma nuannaaqaagut, maani Ilisimatusarfimmi ilinniarnissaq taama soqutigineqartigimmat, taannalu tulluusimaarutigeqaarput. Aamma inuusuttuaqqat nunartik qimannagu Ilisimatusarfimmi ilinniarsinnaanissamut periarfissaqartitaanertik atorluaraat takuneqarsinnaavoq, Gitte Adler Reimer oqarpoq.
Ilisimatusarfimmi 2008-imi ilinniarneqarsinnaasut arfineq-pingasuupput, ukioq mannalu aqqaniliullutik. Taakkunani inatsisilerituunngorniarfik nutaanut ilaavoq. Ilinniarneqarsinnaasullu ukiut ingerlanerini amerliartorsimanerat, ilinniarlutik aallartittussat amerliartornerannut pissutaasoq, rektori isumaqarpoq.
AAMMA ATUARUK Ilisimatusarfimmi allagartartaartitsilersut
- Aamma soorunami Ilisimatusarfiup ilisimaneqarlualersimanera inuusuttuniillu ilinniarfigissallugu pilerigineqarsimammat.
Taamali pilerigineqartiginera unammilligassaqartitsivoq.
- Massakkut tattoqilersimavugut, inissaaleqilersimavugut. Ilimmarfik mikivallaalersimavoq.
Peqqissaasunngorniarfik Ilisimatusarfimmut julimi nuunneqarpoq, Gitte Adler Reimerillu aamma ilinniartitsisunngorniarfik Ilisimatusarfimmut nuunneqassasoq kissaatigaa.
AAMMA ATUARUK Piareersimaffigisassat arlaqartut
Ilinniartunulli amerlasoorujussuarnut tapiliussatut Ilisimatusarfimmi ilinniarneqarsinnaasut campusimut ataatsimut katersorneqarnissaat maanna piviusorsiunngilaq.
Taamaattoqassappammi ilinniartut sulisullu amerlasoorujussuussapput, taamaattoqarnissaanullu Ilimmarfik maannakkut mikivallaarpoq.
- Ilisimatusarfillu piffissaq ungasinngitsoq allilerneqassasoq neriuutigaarput, Ilisimatusarfimmi rektori Gitte Adler Reimer oqarpoq.
