Inuusuttut avatangiisini suliaqartut nunatta kujataani eqqagassanik 13 toninit oqimaannerusunik katersisut
Nunatta kujataani pinngortitaq kusanartutut ilisimaneqarpoq, kusananngitsoqarpoq: Eqqagassarpassuimmi nunami imaanilu amerliartorput.
Qassutit, kisat, uuliaasiviit, kisartorfiit, gummibådillu pisoqqat inuusuttut eqimattat Siu-Tsiumeersut nunatta kujataani illoqarfinni nunaqarfinnilu arfinilinni katersugaasa ilagaat.
Erik Kielsen Innovation South Greenlandimi aalisartunut piniartunullu siunnersortip inuusuttut katersinermut, aaqqissuusseqataaffigisaminut ikiuunnerat qujamasuutigaa.
- Inuusuttut tungaanniit pimoorussilluartoqarpoq. Uagutsinnut ikiuutaangaatsiarput, inuusuttullu pinngortitamiillutik inuiaqatigiinni allanngueqataasinnaanertik nuannaraat, taanna oqarpoq.
Pinngortitap nukingi utoqqatsissutissaanngitsut
Eqqagassanut puussat angisuut, big bagsinik taaneqartartut, 53-it katillugit eqqagassanik 13,1 tonimik oqimaassuseqartunik ulikkaarneqarput. Eqqagassat aalisartut piniartullu inissiivigisartagaasa eqqaanni ilaatigut nassaarineqarput.
Pinngortitami pissutsit eqqagassat siammartertarneranut pissutaasinnaasoq Erik Kielsenip erseqqissaatigaa. Assersuutigalugu aalisarnermut qassutit sikorsuarnit imaluunniit anorersuarneranit imaanukartinneqarsimasinnaapput.
- Kisianni sikaritsikorpassuit, eqqiluisaarnermut atortut allallu miserratigineqarsinnaanngitsumik inunnit eqqagaanerat isertuussassaanngilaq.
Aalisarnermut atortut dunkillu plastikkiusut nassaarineqarneranni pinngortitap nukingisa aamma pisuutinneqarnissaanut takussutissaqarpoq. Annerusunillu nassaarineqartunit qisussuaq imaanit qaqinneqarpoq, savimerngillu angisuut arlallit aamma imaanit qaqinneqarlutik.
Aalisartulli piniartullu eqqagassanik pinngortitamut qimatsisarnerat inuusuttut akisussaaffigaat?
- Aalisartut piniartullu peqatigiiffii eqqagassanik katersinermik aamma aaqqissuussisarput. Taakkulu akisussaaffimmik aamma tiguseqataangaatsiarlutik Narsami aalisartut piniartullu katersinermut aamma ilaatigut peqataangaatsiarput, Erik Kielsen oqarpoq.
Avatangiisit pillugit ataatsimoorneq
Aron Stach nunatta kujataata minguinnerulernissaa aamma nunaqarfiit illoqarfiillu nuannernerulernissaat pissutigalugit Siu-Tsiumit eqqagassanik katersinermut peqataavoq.
- Kujataa tikikkuminartoq angujumallugu, illoqarfik nunaqarfiillu nuannersuutikkusullugit, taanna oqarpoq.
Aron Stachip inuusuttut eqimattat peqatigalugit Qaqortumi eqqagassat 1,5 tonsit Narsamilu 5 tonsit ulluni pingasuni innuttaasut eqqagassanik katersinissamut peqataaqquneqarmata katersueqataaffigai. Taassumalu suliniut inuiaqatigiinnut sunniuteqarluartoq qularutiginngilaa.
- Inuiaqatitsinnut ikioqatigiinneq tapersersoqatigiinnerlu, Aron Stach oqarpoq.
Erik Kielsenillu inuusuttut eqqagassanik katerseqataasut suliniuteqaqataanermikkut oqariartuummik siammarterinissaat qularutiginngilaa. Ulluinnarnimi avatangiisinik paarsinerunissatsinnik pinngortitamullu eqqaajunnaartoqarnissaanik isumaqarpoq.
- Eqqagassat annertussusaannik ikilisaanissarput qimaraannginnissarpullu pingaarnerpaapput. Naatsumik oqaatigalugu katersineq iluatsilluarpoq, kisianni pinngortitarput paarinerussavarput, Erik Kielsen oqarpoq, nangillunilu eqqagassanik aappaagu katerseqqittoqarnissaa aalajangerneqareersoq oqaatigaa.
