Eqqagassalerineq grillerinermik nipilersortoqarneranillu kinguneqartoq
![](/sites/default/files/styles/image_934x467/public/article_images/sarfannguit_kim_grarup_630_1.jpg?itok=jMigLIt5)
Eqqagassat katersat grillerinermik nipilersortoqarneranillu taarserneqarsinnaasut kiap takorloorsinnaavaa?
Eqqumiippalaarsinnaavoq, kisianni Sarfannguani innuttaasut eqqagassat katersaat taakkuninnga taarserneqarput.
Royal Greenland KNI-lu tusagassiuutinut nalunaarummi allapput.
Sarfannguit unammisitsinermi 'Nunaqarfiga kusanartoq’-mi peqataavoq, tassani illoqarfinnik nunaqarfinnillu eqqiluitsuutitsinissamut ataatsimut akisussaaffeqarnissaq sammineqarpoq. Innuttaasut nunaqarfimminni piffissami kingullermi eqqagassanik katersillutillu torersaapput. Suliaqarnerlu Facebookikkut uppernaaserneqarpoq, peqataasummi torersaanermit assinik ingerlaavartumik siammarteripput.
Siunertarisaq torersaanermit annerusoq
Unammisitsinermi Royal Greenlandip KNI suleqatigaa, suliffeqarfiillu taakku marluk Sarfannguit nunaqarfiit peqataasut katillugit 16-iusut akornanni ajugaasutut toqqarpaat.
- Unammineq nuannersuutinniarlugu sapinngisamillu nunaqarfiit amerlanerpaat peqataatinniarlugit eqqugassaqartipparput, kisianni akisussaassuseqartumik eqqagassalerinissaq aamma nunaqarfiit amerlanerusut saligaatsuutinnissaat uani qitiutinneqarpoq, KNI-p sulisoqarnermut attaveqatigiinnermut piujuartitsinermullu pisortaa, Juliane Henningsen tusagassiuutinut nalunaarummi allappoq.
Grillerilluni nalliuttorsiutiginninnermi nipilersortartut Patrick Nuunulu appisimaassasut, suliffeqarfiit marluk tusagassiuutinut nalunaarummi allapput.