Inuussutissat sinnerinik agguaassineq iluatsilluarpoq
Juulli tassaavoq piffissaq ileqqutoqqanik ulikkaartoq.
Nuummili najugaqartut ukiormanna allaalaartumik misiliipput. Juulliararmi aqaguttoq aatsaavissuaq, niuertarfiit nioqqutissaataat asioriaannaat sinnerussat atorluarneqarput - Frelsens Hærip Nuummi illutaaniit unnukkut nalunaaqutaq 22.00 agguaanneqalermata.
Pisorlu ilutsilluartoq, Ingrid Kjærgaard, ’Stop Spild Lokalt i Nuuk’-mi ataqatigiissaarisoq oqarpoq:
- Assorsuaq iluatsilluarpoq. Qasserpiaat takkunnersut kisitsisaatiginngilarput. 200-lli missaanniittut nerisassanik akeqanngitsunik aallerunarput. Iluatsilluaqaaq, oqarpoq.
Nerisassanik agguaassinnginnermi inuussutissat assigiinngitsut 300 kiilut katersorneqarsimapput – tassaanerullutik iffiukkat neqillu - Ingrid Kjærgaard oqaluttuarpoq:
- Taamaammat oqarsinnaavugut inuussutissarpassuit iginneqaannartussaagaluartut allanut iluaqutissanngortissimallugit, oqarpoq.
Iluatsitsissanersoq nalornisigisimagaat
Kajumissutsiminnik suliniuteqartut agguaalertinnatik suliniutertik iluatsissanersoq nalornissutigisimavaat, Ingrid Kjærgaard oqaluttuarpoq:
- Suna ilimagissanerlugu nalornisigaarput. Inuussutissat tamakkerneqarsinnaanersut ernumassutigisimagaluarparput, agguaanissarput tusarneqarsimanersoq allallu apeqquseraluarpavut, oqarpoq nangillunilu:
- Kisianni tassa inuit unnuk naallugu allaffigeqattaarpaatigut – allaat agguaassereersugut.
Inuussutissat, igiinnarneqartussaagaluit, niuertarfinnit juullikkunni matoqqasussaneersuupput:
- Inuit qulit kajumissutsiminnik ikiuukkiartorput. Taava Brugsenit illoqarfimmittoq Natalia aamma Qinngorpumiittoq inuussutissanik aallarfigaagut.
- Matulernerisa nalaanni ornigunniarluta isumaqatigiissutigereerlutigit, inuussutissat juullikkunni uninngaannarlutik asiuinnartussaagaluit – igiinneqarlutillu – aajortorpavut.
Neriuppunga allallit peqataasalersinnaasut
- Nuannaarutiginngitsoorsinnaanngilarput, Frelsens Hærip illuanukarlutik amerlaqisut nerisassanik – niuertarfiit eqqaaviinut igiinnarneqartussaagaluanik – aallersinnaammata.
Suliniut taama iluatsitsigimmat Ingrid Kjærgaardip naatsorsuutigaa, inuussutissanik igiinnarneqartussaagaluanik aappaagu agguaasseqqinniarumaarlutik.
Taama oqariarluni niuertarfinnut allanut, ukioq manna ikiuutinngitsunut kajumissaaruteqarpoq:
- Agguaasseqqinnissarput aappaagu neriuutigeqaarput. Neriuutigalugulu niuertarfiit amerlanerit peqataarusussinnaassasut.
- Brugseni kisimi ukioq manna suliniummut tapersiilluni tunisisuuvoq. Taamaattumik niuertut arlallit aappaagu ilanngunnissaat neriuutigaarput.