9. klassimi atuartut Nuummeersut app-i isumassarsiartik Londonimi saqqummersinniaraat
- Angajoqqaatta avatangiisinut mianerisaqarnerulerlutillu mingutsitsinnginnerunissaat suliniutigaarput. Uanga nammineq angerlarsimaffinni anaanaga nerisassarpassuarnik eqqaaginnaavittartoq isumaqarpunga, Ellen Jeppesen Nuuk International Friskolemi 9. klassimi atuartoq oqarpoq.
Taassuma atuaqatinilu app-i nerisassanik qerititsivimmiittunik pisoqalivallaalersunik nammineq kalerriisartussaq ineriartortippaat.
- Taamaammat ajornartorsiummik nalaattariikkatsinnik sammisaqarniarluta aalajangerpugut, Ellen Jeppesen nerisassanik eqqaasarnerup samminissaanik toqqaanertik pillugu oqarpoq.
Atuartunullu tamanna pissanganartumik unammillernarsimavoq, eqqarsaatigisaanniilli aamma ajornarnerusimalluni.
- Suli ineriartortinneqanngitsumik nassaarniarneq ajornakusoorpoq, atuartut oqarput.
Suli ineriartortitassaasoq
App-i suli ineriartortiassaasoq naammassillugu ineriartortinneqassaguni tuluttoortuunissaa ilimanarpoq.
Taanna ilinniartitaaneq pillugu suliniummi ineriartortinneqarpoq, atuartut tassani eqqarsaatersullassissunik piorsaaneq aqqutigalugu aaqqiissuteqarniartussaapput. Atuartullu nunat avannarliit ilinniartitaaneq pillugu suliniuteqarnermi CRAFT-imik tassa Creating Really Advanced Future Thinkers tassalu siunissaq pillugu eqqarsaatersullaqqissunik piorsaanermik unammisitsisoqarnerani peqataapput.
App-i taanna nunanut 146-inut Londonimi peqataasunut januaarip naalernerani saqqummiunneqassaaq.
Atuartullu angalanissaminnut qilanaarput:
- Inuusuttuararsuuvugut, taamaakkaluartorli Londoniliassaagut. Tamanna illoqarfeeqqatsinnit atuarfitsinniillu nunarsuatsinni allannguuteqaqataasutut uatsinnut misititsissasoraara, Ellen Jeppesen oqarpoq.
Atuartulli arfineq-marluk taakku angalanissaminnut aningaasanik amigaateqarput. Taakku angajoqqaatik peqatigalugit suliffeqarfinnut assigiinngitsunut aningaasaliisinnaasunut saaffiginnittaqattaaleruttorput.
Atuartut angalanissaminnut missingersuutigisaminnik 98.000 koruuniusunit maannamut 54.000 koruunit katersoreersimavaat.