Nuummi nammineq kajumissutsiminnik suliaqartut nerisassat sinnerinik Nuummi juulliaqqami agguaassasut
Juullisiorneq akisusinnaavoq.
Ukioq mannali Nuummi innuttaasut aningaasakilliortut saniatigut ikiorneqarsinnaapput.
Danskimmi suliniaqatigiiffiannit, Stop Spild Lokaltimit nammineq kajumissutiminnik suliaqartut nerisassat sinnikuinik decembarip 23-ani unnukkut akeqanngitsumik agguaassissapput.
Nerisassat pisiniarfinnit assersuutigalugu Brugsenimit juulliaqqami matoqqasussamit katersorneqassapput.
Nuummi Stop Spild Lokalimi ataqatigiissaarisoq, Ingrid Kjærgaard oqarpoq.
- Pisiniarfippassuit juullip kingorna matoqqarrattarput, nerisassanillu qaangiuttoortoqartarluni. Taamaammat nerisassat ullussaat qaangiutinnginnerani inunnut pisariaqartitsisunut agguaatissavagut, taanna oqarpoq.
Nillataartitsivimmit nerisassat nutaat
Taassuma nerisassat pissarsiarineqartut igitassaagaluartut ernumassutigineqassanngitsut ilanngullugu erseqqissaatigaa. Nerisassammi ajoquteqanngilluinnartuupput.
- Nerisassat ajortinnikuunatilluunniit oqunngillat. Ajunngilluinnartuupput, juullikkunnili qaangiuttussaagaluarput. Nerisassat pineqartut neqiupput, naatitat iffiorfimmiillu iffiukkat. Pisiniarfiit ulloq taanna sinnerisinnaasaat tamarmik.
Nuummilu Brugsenimi neqaarniap, Casper Petersenip tamatumanik taperserpaa.
- Inuussutissat nerisassiorfitsinni suliarineqartuupput. Nerisassat aannikuussapput, nersussuaqassaaq, puulukeqassaaq immaqalu aamma savaqalaassalluni. Taamammat nerisassat igaffitsinni iffiorfitsinnilu suliareriigaasapput. Aamma naatitanik ulluni marlunni matoqqanitsinni uninngatiinnarneqarsinnaanngitsunik ilaqalaassapput, taanna oqarpoq.
Tamanut ammasoq
Ingrid Kjærgaardip ilisimasai naapertorlugit Stop Spild Lokalt nunatsinni nerisassanik sinneruttussanik aatsaat siullermeertumik agguaasussaavoq. Taamaaliornissarli isumatsialaasoq, taanna oqarpoq.
- Nerisassarparujussuit ajoquteqanngikkaluartut nerineqarsinnaalluartullu pisiniarfinnit tunineqanngitsoornerat pissutigalugu ajoraluartumik igiinnarneqarlutik eqqaavimmiilertarput, taanna oqarpoq, nangillunilu:
- Tamatuma saniatigut ilisimavarput amerlasuut aningaasatigut inissisimanerliortut, taakkulu juullip nalaani ilungersornerulertarput. Taamaammat ikiueqataarusuppugut, pisariaqartitsisunullu tunniussilluta.
Nerisassanik agguaaneq nammineq kajumissutsiminnik suliaqartunit ingerlanneqartarpoq, Ingrid Kjærgaardillu ikiuussinnaanissani nuannaarutigaa.
- Nuannerluinnartuusoraara. Iliuuserineqarsinnaasormi ajornaatsunnguuvoq. Nerisassat pisiniarfiit sinnerivaat, uangalu akunnialunnik sinneqartoorlunga. Taamaammat inuit ilaat pitsaanerulaartumik juullisiorsinnaappata nuannissaaq, taakkumi uagutsinnit akeqanngitsumik nerisassanik pissarsisinnaassapput, taanna oqarpoq.
Nerisassanik agguaassineq Nuummi Frelsens Hærimi nal. 22 pissaaq – kikkullu tamarmik tikilluaqqusaasut, Ingrid Kjærgaard oqarpoq. Nerisassanimmi pissarsinissamut qinnuteqaqqaarnissaq assigisaanilluunniit iliuuseqaqqaarnissaq pisariaqanngilaq.
- Angerlarsimaffimmi inuit qanoq amerlatiginersut imaluunniit aningaasaqarnerat qanoq innersoq aperinavianngilagut. Pingaarnerpaarli tassaavoq nammineq isumaqaraanni pisariaqartitsilluni. Nerisassat suut pigissanerlutigit qulakkeersinnaanngilarput, taamaammat ulloq taanna takkukkaanni periarfissamik atuinerussaaq.