Jackie juullimut ikiorsiissutissanik 736.500 koruuninik katersisoq

Jackie Lyng uummatigissuuvoq.

Tassami suliffeqarfiit arlallit inuillu ataasiakkaat tapeerusuttorpassuit katersinermini ikiuunnerisigut, kisimiittut ilaqutariippassuillu Nuummiittut ilimagisaannit nuannernerusumik juullisiorsinnaatilerpai.

Jackie Lyng, pisortaq suliffeqarfinnik - Vandrehuset.com aamma Nuuk City Invest Aps – pigisalik, illoqarfitsinni aningaasaqarnikkut ikiorsertarialinnut iluaqutaasussanik aningaasanik katersinermi siuttuuvoq. Isumaqarpormi amerlaqisut ikiorsertariaqartut.

- Ajoraluartumimmi inuiaqatigiinni aningaasaqarneq pitsaanerpaffissaminiinngitsoq erseqqeqaaq. Isertitaqarpianngitsut, nunatta aningaasakilliorneranit sunnerneqarsimanerat malunnaqaaq. Inuussutissat assartuinermilu akit qaffanneqarnikuupput, suullu tamarmik ingerlalluartutut oqaatigineqarsinnaanngillat.

Tamanna pillugu suliffeqarfiit namminersortullu attavigiortorpai, tapiisussatut isumaqatigiissusiorfiginiarlugit aningaasanillu katersineq aallartillugu. Tapersersuineq annertoqaaq. Sapaaatit-akunneranni ataasiinnarmi suliffeqarfiit annerit minnerillu tapiissutaat 736.500 koruuninngorsimapput.

- Ajasooqaanga, suliffeqarfiutillit namminersortullu taama amerlatigisut taama amerlatigisunik katersisinnaammata. Pingaartumik Brugseni, amerlangasartunik 200.000 koruuninik tunissuteqartoq. Inuiaqatigiinni akisussaassuseqarneq taamaalillugu takutilluarneqartoq, naak piffissami matumani inuuniarneq erloqinalaarsinnaagaluartoq, takutinneqarpoq. Jackie Lyng oqarpoq.

Nuannaarlunilu aliasuppoq

Jackie Lyng-ip oqaluttuaraa, juullimut ikiorsiissutissanik perusullutik qinnuteqartut 400-simasut. Amerlanerpaallutik qinnuteeqartuupput anaanat kisimiillutik meeqqaminnik perorsaasut.

- Aningaasat amerlanerpaartaat anaananut kisimiittunut ilinniartuusunullu tutsinneqassapput. Meeqqammi eqqarsaatigineruakka. Pisariartippaammi juullimi nerisarissaarnissaq aammami tunissutisinissaqarnissaat qulakkeerniarparput, oqarpoq.

Qinnuteqaatimmi ilarpassui oqartulluanik alianartunik, Jackie Lyng-ip attortinnarisimaqisaanik, ilaqarput.

- Suliffeqarfippassuit inuillu namminneq tapeerusunnerat nuannaarutigigaluaqalugu, aliasuutigeqaara ilaqutariit taama amerlatigisut ikiorneqarnissaminnik pisariaqartitsimmata. Oqaluttuammi tigusakka arlallit attortissutigeqaakka.

Jackie Lyng-ip juullimut atatillugu ikiorsertariaqarneq ukiuni tullerni  pisariaarutissasorinngilaa. Taamaattumik katersuiniartarneq aappaagumiit annertusarniarpaa aaqqissugaanerutillugulu.

- Aningaasaateqarfimmik pilersitsinissara siunniuppara. Aningaasaateqarfik taanna angerlarsimaffeqanngitsunut inunnullu akissaatikitsunut juulleriartornerani ikiuinernut atorneqassaaq. Piffissarmi taanna inuppassuarnut artornarnerpaasarmat.