Juullip Nipitittagaa oqaluttuaannanngulerpoq: Ileqqoq nammineq atorneerukkiartortoq
Kulturimik suliniuteqartarfik matulerpoq.
Juullip Nipitittagaata julemærkeliarititami 50-issaat oktobarip 25-anni saqqummersissavaa. Kisianni 50-issaajunera nalliuttorsiutaaginnassanngilaq. Aamma tassaassaaq juullip nipitittagaata saqqummersinneqarneranut atatillugu pisartut ileqquliussimasat naggataamik aaqqissuunneqarnissaat.
Juullip Nipitittagaa ukiuni 50-ini pioreerluni uninniarpoq.
- Juullip nipitittagai tunisartakkat ikiliartuinnavissimapput, ajoraluartumik. Aamma misilikkaluarparput internetti aqqutigalugu juullip nipitittagaanik aallersinnaalerneq, kisianni ilimagisatsitut tunisaavallaarsimanngilaq. Taamaammat siulersuisuni aalajangerpugut ukiut 50-it angunerini naggasiiniarluta, Helena Jensen, Juullip nipitittagaata siulersuisuini siulittaasoq oqarpoq.
Saqqummeqqaarami soqutigineqarsimaqaaq
1974-imi aallartippoq. Helena Jensenip oqaatigaa juullip nipitittagaa siulleq saqqummersoq assorsuaq soqutigineqarsimasoq. Allaat sinneqartoorutit millioni sinneqarsimallutik. Sinneqartoorutit kalaallinut eqqumiitsuliortunut kulturilerisunullu tutsinneqarput.
- Aallarteqqaarmat soqutigineqaqaaq. Jens Rosingip tuttuaqqamik, Qaasuitsup ulloriaanik, Asaluusanik aqissimillu titartagaa ima nuannarineqartigaaq allaat nungullugu tunisaalluni. Naqiteqqinneqartariaqarsimallunilu, Helena Jensen oqarpoq.
Ullut tunisilluarfiit maanna qangiupput. Siorna sinneqartoorutit koruunit hunnorujutusindiupput. Aningaasartuutit matussuserneqareermata, aningaasat ikittunnguit sinneruttut, kulturimut agguaanneqarput.
Helena Jensenilli kingumut qiviarnermini, juullip nipitittagaanut atatillugu pisartorpassuit puigunaatsitai arlaliupput.
- Dronningip juullimi Nipitittagaliaa 1983-imeersoq, Taartumi qaamaneq, eqqaamaqaara. Taanna tunisaaqaaq ingerlaannangajallu nungulluni. Ukiut ingerlaneranni kalaallit eqqumiitsuliortut pikkorissorsuit, soorlu Aka Høegh aamma Miki Jacobsen, juullip nipilitagaannik aamma titartaasuupput.
Juullip Nipitittagaa katersugaasivimmut
Juullip Nipitittagaata aningaasaateqarfia ukiup tulliani, pigisat nalillit isumagineqareerpata, matuinneqassaaq. Soorlu Juullip Nipitittagaata illua tunineqassaaq, isertinneqartullu siunertanut pitsaasunut agguaanneqarumaarput.
Soorunami julemærkeliaasimasut titartagartavii puigorneqaanngillat.
50-it taakku kalaallit kulturikkut kingornussarsiaannut ilaalereernikuupput.
- Ilisimavinngilara titartagartaviisa qanoq pineqarnissaat, kisianni katersugaasivimmut tunniukkusuppavut. Imaassinnaavoq nunatta katersugaasivianut imaluunniit nunatta eqqumiitsulianik saqqummersitsivissaanut tunniunneqartut. Suli isumaqatigiissuteqarfeqanngilagut, Helena Jensen oqarpoq.
Juullip Nipitittagaata nittartagaanut iserluni suli juullip nipitittagarsisoqarsinnaassaaq.