Inuktitut ilinnianngikkuit soraarsitaassaatit!
Atorfilittat aqqanillit taamanili inuktitut oqaatsinik sapaatip akunneranut marloriarlutik atuartalerput. Imaanngilaq tamarmik inuktitorpiaq oqalussinnaanngortut, Paul Okaliliulli nuannaarutigeqaa nammineq oqaatsini atorlugit pingaarutilinnik oqaloqatigisinnaanngoramigit, atorfilittallu ilaat naalakkersuisut ataatsimiinneranni inuktitut paasinarluartumik allaat saqqummiisalersimasoq.
-Oqaatsinik ilinniarnertik qanoq soqutigitigigaat malugalugu nuannerluinnarpoq, Paul Okalik aviisimut Nunatsiaq Newsimut, oqarpoq.
Qaffasissumik atorfillit inuiaqatiminnut soqutiginninnerat nuannaarutigeqaa. Isumaqarporlu innuttaasut naalakkersuisut allaffissornerullu tungaatigut tamanna aamma soqutigigaat.
Oqaatsinilli pikkorissartitsinissap iluatsinnissaa aamma akikitsuinnaasimanngilaq. Iqalunni oqaasileriviup, Pirurvik Centre-p, pikkorissartitsinerit ineriartortinneqarnissaat isumagisimavaa, taassumalu aningaasartuutaasa saniatigut atorfillip ataatsip pikkorissarnermi peqataanera 20.000 koruuneqarsimalluni. Paul Okalik isumaqarpoq aningaasat atorluarneqartut.
