Inga-Dora: Erik Jensen qinersinerup kingorna siulittaasuussaaq - Kim Kielsenip taaguunneqarnera apeqqutaanani

Erik Jensen Siumumut marlunngorpat qinersereernermi siulittaasuussaaq, qinersisartut Kim Kielsenimut tapersersuinerat apeqqutaatinnagu. Siumup siulittaasuata tulliata aappaa, Inga-Dora G. Markussen taama erseqissaavoq.
Marlunngorpat qinersereernermi kina taaguunneqrnerpaanersoq apeqqutaatinnagu, Erik Jensen Siumumut siulittaasuusoq nalornisaasariaqanngilluinnarpoqSiumup siulittaasuata tulliata aappaa, Inga-Dora G. Markussen taama erseqissaavoq. Assi © : Vestnordisk Råd
apriilip 05-at 2021 15:51

Siumumi Inatsisartunut marlunngorpat qinersereernermi kina siulittasuussanersoq, partiip siuttuini apeqqutaanngilluinarpoq.

Tamanna Siumup siulersuisuiniittup, siulittaasuata tulliata aappaata, Inga-Dora G. Markussenip KNR-imut erseqissarpaa.

- Erik Jensen Siumumi marlunngorpat qinersinerup kingorna inernera apeqqutatinnagu siulittaasuusssaq.

Siumup siulittaasorisimasaa, Kim Kielsen, Erik Jensenimit taaguunneqarneroriataassagaluarpat, kina partiimi siuttuussanersoq, tamat oqallineranni nalornissutaasupilussuugaluarpoq.

Minnerunngitsumik Kim Kielsen Naalakkersusuni siulittaasooqqikkumalluni arlaleriarluni oqartarmat. Aamma naak Siumup siorna novemberimi ataatsimeersuarnerani ajorsarami ima oqaraluarluni:      

- Oqiliallak. Taavalu aamma oqaatigerusuppara massakkut nuannarisannik tassa periarfissamik pissarsilerpunga, tassa pinngortitamiinnerunissara.

Kisianni tusagassiuutini, inuit attaveqatigiittarfiini tamallu oqallinneranni paatsiveerusimaarneqartoq, Inga-Dora G. Markussenip nassuerutigaa.

- Paasisinnaaqaara, partiitsinni taamatut inissisimasoqarnera tusagassiuutini eqqartorneqaqattaarmat, taanna oqarpoq nangillunilu:

- Kisianni naqissuseqqiinnassavara, Siumup ataatsimeersuarnera tassaavoq Siumumi qullasinnerpaamik inissisimasoq, tassanilu qinerneqartut, tassa siulittaasoq taakkulu siulersuisuunerit qinersinerup kingorna allanngornavianngillat.

Tassalu Erik Jensen naliginnaasumik ataatsimeersuarnissat tulliata, pilersaarutaasutut 2023-mi pisussap, tungaanut siulittaasuuvoq.

Kielsen: Qinersisut kina siulittaasuusanersoq aalajangissavaat

Taamali oqarneq siulittaasuusimasup Kim Kielsenip oqaatigisimasaanit allaaneroqaaq.

Allaammi påskimut aqaguttoq KNR-imut ima oqarpoq:

- Innuttaasut taasinermikkut kina Siumumi siulittaasussatut arlaatigulluunniit, naalakkersuisut siulittaasussatut innersuunneqassanersoq tassani takutikkumaarpaa amerlanerussuteqassagutta.

Kim Kielsen qinersisartut pisinnaatippanni nunarput sioqqissallugu piareersimalluni ilisimatitsivoq.

AAMMA ATUARUK Kim Kielsen: Qineqqusaarneq allaanerungaatsiartoq

Sooq siulittaasuusimasup Erik Jensenip partiimut siulittaasuunera - Naalakkersuisunngorumaartunilu siulittaasunngorsinnaanera - tamat tusaasaannik tapersersunnginneraa, Inga-Dora G. Markussenip akissallugu merseraa.

- Uanga taanna akisinnaanngilara. Inuttaa nammineq akisariaqarpat.

Kim Kielsen ataasinngornermi oqaaseqartinniarparput, tamannali suli iluatsinngikkallarpoq.