Inatsisitigut isumannaatsuuneq nunatsinni tusiapippoq

Nunatsinni eqqartuussiveqarfik suli "annertuunik unammilligasaqarpoq". Pinerlineqarsimasut pinerluttulerinermillu inatsimmik unioqqutitsisimasutut unnerluunneqartut atugaat misissoreerlugit, eqqartuussisuserisut siunnersuisooqatigiivi Advokatrådi taama naliliivoq.

Allattoq Nicole Sander Bertelsen

maajip 17-at 2024 13:30

Nutserisoq Alice Sørensen

Pinerluttulerinermik inatsimmi suliani pinerlineqartut unnerluunneqartullu eqqartuliorfigineqartuaannanngillat.

Nunatsinni inatsiseqarnikkut isumannaatsumik ingerlasoqarnersoq nalunaarusiarereerlugu Advokatrådi taama inerniliivoq.

Inatsisilerituumik illersuisoqarnissamut tamatta assigiimmik periarfissaqannginnerput eqqartuussisuserisut siunnersuisooqatigiivisa Advokatrådip tikkuarpaa. Assersuutigalugu Nuummi najugallit sianeriammi illoqarfinni nunaqarfinnilu allani najugalinnut sanilliullugit illersorteqarnissaminnut periarfissagissaarnerupput.

Sanngiinnerit illersorlugit

Sumi najugaqarneq apeqqutaatinnagu illersorteqarnissamut pisinnaatitaaffiit assigiimmik ilaatigut periarfissaasussaapput. Pingaartumik innuttaasut sanngiinnerit, meeqqat inuusuttutllu illersorneqarnissaat pingaaruteqartoq siunnersuisooqatigiit oqaatigaat.

Eqqaartuussisuserisoq illersuisoq susarpa?

Pinerlineqarsimaguit pisut ilaanni eqqartuussisuserisumik illersuisoqarsinnaavutit. Suliap ingerlanneqarnerani eqqartuussisuserisumit illersorneqarlutit akeqanngitsumik ikiorneqarsinnaavutit soqutigisatillu taassuminnga qulakkeerniarneqassapput.

Eqqartuussisuserisoq illersorti imaaliorsinnaavoq:

Politiit suliamik misissuinerani, suliarlu eqqartuussivimmi suliarineqassappat illersortip ikliorlutillu siunnersorsinnaavaatit.

Pinerlussimasup ilinnik attaviginninniarnissaa annilaangagigukku illersuisup siunnersorsinnaavaatit.

Suliap ingerlanneqarnissaa pillugu nassuiaassinnaavaatit, ilisimannittutullu nassuiaateqaleruit eqqartuussivimmut ilagalutit.

Taarsiivigineqarnissannut ikiorsinnaavaatit, taarseeqqusissutissat kisillugit eqqartuussisoqassappallu tassani saqqummiullugu, aamma Taarsinissannik Aalajangiisartunut saqqummiullugu.

Tusarfik: Anklagemyndigheden.dk

- Assersuutigalugu Danmarkimi meeqqat inuusuttullu ajornerusunik atugaqarput, illersorteqarnissamut tapersersorteqarnissamullu periarfissaqannginnamik, Martin Lavesen Advokatrådimi siulittaasoq oqarpoq.

Aamma atuarukKalaallit Nunaani pinerluttulerinermut inatsit pillaanermut inatsimmik taarserneqassava?

Illersorteqannginneq toqqissisimannginnermik pilersitsisarpoq, eqqartuussiviullu inerniliussinnaasarigalua allaanerusinnaasarluni, taanna oqarpoq.

Isorisarialik

Tamattali illersorteqarnissamut periarfissaqannginnerput siunnersuisooqatigiit "isornartorujussuartut" isigaat, taanna naqissusiivoq.

Aaqqiissutissatullu innersuussutini siunnersuisooqatigiit ingerlateqqitaanni tamanna pingaartinneqarpoq.

Kikkut tamarmik illersorteqarnissamut pisinnaatitaaffeqarnerat, innersuussutinit 29-usunit pingaarnerpaatut Martin Lavesenimit isigineqarpoq, kisianni:

- Danmarkimi pissutsinik atuutitsiniaanermik kissaateqannginnerput oqaatigissallugu aamma pingaaruteqarpoq, taanna naqissusiivoq.

Danskit isaanniunngitsoq

Nunat qanoq issutsimikkut assigiinngissutaat, inatsisilerituut eqqartuussisullu ilinniarsimasut amerlassusaasa assigiinngissutaat eqqarsaatigulugit Kalaallit Nunaata Danmarkillu sanillersuunneqarsinnaannginnerat Martin Lavesenip ilisimavaa.

Aamma atuarukPineqaatissiineq imaluunniit pillaaneq: Eqqartuussinerni allanngortoqarnavianngilaq

- Danskit isaat atornaveersaarpakka, taamaaliortoqarsinnaasorinnginnakku, Martin Lavesen oqarpoq.

Illersorteqarnissamut periarfissat assigiinnissaat siunnersuisooqatigiit innersuussutigaat, tamatuma saniatigut meeqqat sanngiinnerusullu inuiaqatigiinnit illersorneqarnerunissaat aamma innersuussutigaat. Ukiullu kingulliit arfineq-pingasut ingerlanerini siuariartoqarsimanera aamma erseqqissarpaat.

- Ukiuni kingullerni inatsisitigut isumannaatsuuneq annertuumik pitsanngoriarsimasoq paasivarput, Martin Lavesen oqarpoq.

Suliassat amerlagaluartut qaamaneqarpoq

Annertuunilli unammilligassaqarnera aamma nassuerutigaa, unammilligassallu allat taakkartorlugit.

Ilaatigut inatsisilerituunik amigaateqarneq, nunaqarfinnilu inatsisitigut siunnersorneqarsinnaanermik amigaateqarneq oqaatigai.

Nunatsinni inatsisitigut isumannaatsuuneq pillugu nalunaarusiaq 44-nik quppernilik, aaqqiissutissatut innersuussutinik katillugit 29-nik imaqarpoq.

Nalunaarusiarli atuutsinneqalersussanik allattuiffittut naammassisatut isigineqarani oqallinnermi tunngavissatut isigineqassasoq, Martin Lavesen naqissusiivoq.

2024-miit 2027-p tungaanut Kalaallit Nunaanni Savalimmiunilu eqqartuussiveqarfiit nukittorsarneqarnissaannut aningaasaliissutit 58,8 millionit koruunit illuartinneqarnissaat Danskit naalakkersuisusa Folketingillu 2023-mi novembarimi isumaqatigiissutigigaat Ritzau allappoq.