Pineqaatissiineq imaluunniit pillaaneq: Eqqartuussinerni allanngortoqarnavianngilaq

‘Taamaattumik eqqortuutinneqarpoq‘

Pinerluuteqarsimasut Pinerluttulerinermik Inatsimmik unioqqutitsisimasutut eqqartuunneqaraangata oqaaseqatigiit eqqartuussinermi oqaatigineqartartut taama oqaasertaqarput. 

Pinerluttulerinermik inatsit aallaavigalugu eqqartuussutit partiit sakkukigaat, taamaammallu  inatsisip danskit pillaanermik inatsisaannik taarserneqarnissaa Demokraatiit angorusuppaat. Inunnut pinerliinerit soorlu kinguaassiutitigut innarliinerit, nakuusernerit, toqutsinerit imaluunniit toqutseriarnerit annermik eqqarsaatigineqarlutik.

Eqqartuussineq pillaanermik inatsimmik imaluunniit pinerluttulerinermik inatsimmik tunngaveqarluni ingerlanneqaraluarpat annerusumik allaanerussuteqarnavianngitsoq, inini eqqartuussiviusartuni ulluinnarni sulisartut isumaqarput.

- Periutsinut atuuttunut annerusumik allannguutaannavianngilaq. eqqartuussissuserisoq illersuisoq Finn Meinel oqarpoq. 

- Pinerluttulerinermik inatsit aallaavigalugu eqqartuussisarpugut, pisut suliamut tunngasut eqqartuussinermi saqqummersut isummerfigisarpagut. Taannalu tunngavigalugu sulianut ataasiakkaanut inerniliinerit naatsorsuutigineqarsinnaasut iliuuseqarnerillu assigiinngitsut nalilersortarpagut, taanna oqarpoq.

- Pinerluttulerinermik inatsit imaluunniit pillaanermut inatsit aallaavigalugu eqqartuussinersugut apeqqutaavallaarnavianngilaq, taanna naqissusiivoq. 

Uppernarsaasussaaneq allanngornavianngilaq

Inimi eqqartuussiviusartumi illersuisup akiani issiasartut aperigaanni, pinerluttulerinermik inatsit imaluunniit pillaanermik inatsit aallaaavigalugu eqqartuussisoqarnera annerusumik aamma allannguutaanavianngitsoq, Kalaallit Nunaanni Politiini unnerluussisussaatitaasut pisortaata Mariam Kahalilip oqaatigaa: 

- Inatsimmi siullermi aappaanniluunniit allassimasut tunngavigineqarnersut, unnerluussisussaatitaasut Inatsimmik unioqqutitsisoqarsimaneranik naliliiniarneranni allannguutaanavianngillat, taanna oqarpoq. 

Pinerluuteqarsimasut pinerluumminnik sakkortunerusumik eqqartuunneqartalernissaat politikerinit anguniarneqarpat, inatsisip pillaanermut inatsisinngortinnissaanut peqqutissaqanngitsoq eqqartuussissuserisoq illersuisoq Finn Meinel aamma tikkuaavoq.

- Pillaanermik inatsimmik atuiniarnermi anguniarneqarsorisakka pinerluttulerinermi inatsimmi maanna atuuttumiipput. Inatsit ajunngitsumik ullumikkut atorneqarpoq, eqqartuussinermilu suleqataasut taanna aallaavigalugu sulisinnaalluarput, taamaammat pillaanermik inatsimmik imaluunniit pinerluttulerinermik inatsimmik taaguuteqarnera allannguutaavallaarnavianngissoraara. 

Sinaakkutit imaluunniit eqqartuusseriaaseq? 

Politikkikkut siunnersuut tassunga assingusoq Siumumeersumit Kuno Fenckerimit saqqummiunneqarpoq. 

Pillaanermut inatsisip nutaap eqqunneqarnissaa taassuma kissaatiginngilaa, pinerluttulernermulli inatsimmi atuuttumi pillaanermik sinaakkusiisoqartalernissaa kissaatigaa. Taamaaliornikkullu pinerluutinik assigiinngitsunik pineqaatissiinermi aalajangersimasunik sinaakkuteqartoqarsinnaalissaaq.

Eqqaartuussinernili tamanna aamma annerusumik allannguutaanavianngitsoq Politiini unnerluussisussaatitaasut pisortaat Mariam Khalil isumaqarpoq.

Pinerluttulerinermut inatsimmi aalajangersimasumik ullumikkut sinaakkuteqanngikkaluartoq eqqartuussiveqarfiit eqqartuusseriaatsinik attuuttunik malitaqartarput.  

- Sinaakkutivut eqqartuussiveqarfinnit ilisimaneqarluarput. Taamaammallu periutsinut annerusumik kinguneqarnavianngilaq. Aalajangersakkat ataasiakkaat qanoq ittuuniissaannik pillaanermilu sinaakkutit qanoq ittuunissaanik politikerit kissaateqarnerannik ersersitsinerussaaq, taanna oqarpoq. 

Suliat assingusut ullumikkut aallaavigineqartarput, taakkulu aallaavigalugit pineqaatissiissutip sakkortussusissaa tulluarsarlugu nalilersuisoqartarpoq, Mariam Khalil nassuiaavoq. 

- Oqarutta toqutsineq pineqartoq, taava toqutsisoqarsimaneranik eqqartuussinerni pereersuni pineqaatissiissutit isiginiarneqartarput. Taakkulu aallaavigalugit unnerluussisussaatitaasut, assersuutigalugu toqutsisoqarsimaneranik suliami, pineqaatissiissutissamik piumasaqartarput. 

Eqqartuussissuserisoq illersuisoq Finn Meinel tassunga isumaqataavoq. 

- Suliap uppernarsiarniarnerani qanoq inissisimanera pillugu, pisuutinneqarunillu naatsorsuutigisinnaasai pillugit sullitavut ullumikkut oqaluttuutereertarpagut, taamaaliortarpugullu eqqartuusseriaatsimik atuuttumik aallaavissaqaratta. 

Kinguneqartitsinerit oqaatsinit pingaarnerupput

Pillaanermut inatsit imaluunniit pillaanermi sinaakkutit politikerinit eqqunneqarpata, oqaaseq 'pillaaneq' kalaallit nunanni inatsisilerinermi siullermeersumik aamma atorneqalissaaq. Oqaaseq taanna eqqartuussiveqarnermut attuumassuteqartinneqanngilaq, oqaaserli 'pineqaatissiissut' eqqartuussutaasarluni. 

Ataasiakkaanilli eqqartuussinermi oqaatsit annerusumik pingaaruteqanngillat. Unnerluussaasorpassuarnik piffissap ingerlanerani illersuisutut sullissisoq Finn Meinel naqissusiivoq. 

- Oqaatsit arlaannaalluunniit, tassa pillaaneq imaluunniit pineqaatissiissut atorneqaraluarpata annerusumik allannguutaanavianngilaq. Pillarneqaratik pineqaatissinneqarnertik ajunngitsutut isiginavianngilaat, pineqaatissinneqarsimasunut inissisarfimmut inissinneqaraluarunik, nakkutigisassanngortinneqaraluarunik imaluunniit akiliisussanngortinneqaraluarunik sunniutaa assigiimmat.

- Taaguusersuinermi pillaaneq atorneqaraluarpat sullitamut allaanerussuteqanngilaq, Finn Meinel oqarpoq. 

Naatsumillu oqaatigissagaanni inatsisit arlaannaataluunniit atorneqarnera unnerluussisussaatitaasunut, illersuisunut imaluunniit unnerluunneqartunut allannguutaanavianngilaq. 

Pillaanermik inatsisip atorneqalernissaa aalajangiunneqassanersoq oqaatigiuminaappoq, siusippallaarmammi. Partiit taakku marluk siunnersuutaat politikkikkut suliarineqaqqaassapput, sulinerlu marlunngormat aallartippoq siunnersuutit Inatsisartut ataatsimiittarfianni oqallisigineqarmata ataatsimiititaliamullu ingerlateqqinneqarlutik.