Siumut tunuliaqutaralugu Folketingimut qinigassanngortittup, Aka Hansenip Facebookiminut marlunngornermi isernermi nalinginnaanngitsoqartoq paasivaa. Taanna saqqummersitanut oqaaseqarsinnaananilu inunnut allakkamik nassiussaqarsinnaanngilaq.

Tamatuma saniatigut taassuma Facebookikkut pisortatigoortumik quppernera nassaassaanngilaq. Taassuma politikkikkut pingaartitani tassani saqqummiuttarpai.

- Takoqqaarakku soorunamilimi ernumalerpunga. Matumani qineqqusaarninni sapaatip akunnerani kingullermi sunniuteqarsinnaanera soorunami ernumassutigaara, taanna oqarpoq.

Folketingimut marsip 24-anni qinersisoqartussaavoq, tassa kalaallit marluk Folketingimiilernissaat taasissutigissavarput.

Aka Hansen folketingimut qineqqusaartuni Facebookimik ajornartorsiuteqartuni kisimiinngilaq. Aamma Doris Jakobsen Jensen Aka Hansenitulli Siumut tunuliaqutaralugu qinigassanngortittoq kiisalu Naleqqamit qinigassanngortittoq Najannguaq Hegelund Facebookimit aamma mattunneqarput.

Ajornartoornerup atornerlunneqarnissaa pilerineqartoq

Doris Jakobsen Jensenip oqarnera naapertorlugu taanna Facebookikkut pisortatigoortumik quppernermini 10.000-it sinnerlugit malinnaasoqarpoq. Taassumali quppernera sapaatip akunnerata siuliani nassaassaajunnaariataarpoq, sulilu ammaqqinneqarani.

Tamatuma saniatigut namminerisaminik quppernera – Aka Hansenip qupperneratulli killilerneqarpoq –  taamaalillunilu saqqummersitanut ippassaq tikillugu oqaasertaliisinnaanani. Taannali suli saqqummersitsisinnaavoq.

- Qineqqusaarnermi ilarujussua inoqatinut attaveqaatitigut pisarpoq, soorunami pasitsannartoqarpoq. Taamaattoqaraangammi qineqqusaarnermut innarliisarpoq, taanna oqarpoq.

Doris Jakobsen Jensenip oqarnera naapertorlugu tamanna ajornartorsiutaavoq, qineqqusaartut nunatsinni angalasuummata, qineqqusaarnerup ilarujussua inoqatinut attaveqaatikkut pimmat. 

Najannguaq Hegelund qineqqusaarneq tamaat Facebookini ajornartorsiutigaa. Taanna namminerisamik quppernerminit aamma pisortatigoortumik quppernerminit ullut 30-t ingerlaneranni sisamariarluni mattunneqarpoq.

Tamanna siullermik Folketingimut qinigassanngortinnerminik nalunaaruteqarnissaanut ulloq ataaseq sioqqullugu pivoq. Tamatuma kingorna pingasoriarluni killiligaavoq, taamaalilluni saqqummersinneqartunut oqaasertaliisinnaanani.

Najannguaq Hegelundip quppernini tamaasa piffissami matumani iserfigisinnaavai. Aka Hansenilli quppernera killilerneqarsimasoq nalunaarfigineqarpoq, taannalu marsip 24-ata – tassa ullormi qinersisoqarnissaata tungaanut oqaasertaliisinnaatinneqanngikkallarpoq.

Folketingimut qinigassanngortittut pingasut Facebookiminnik qineqqusaarnerup nalaani ajornartorsiuteqarnerat nalinginnaasuunngitsoq, hybridimik sorsunneq aamma digitalikkut paasissutissanik eqqunngitsunik sorsunneq pillugu Københavnip Universitetiani ilisimatusartoq, Christiern Santos Okholm oqarpoq.

Taassuma nunatsinni paasissutissanik eqqunngitsunik siammarterineq politikkikkut akuliunneq annertusiartuinnartut erseqqissaatigaa.

- Nunarsuarmi politikkikkut tatisimanninneq pissutigalugu Kalaallit Nunaat anguniarneqarneruleriartuinnarpoq, taanna oqarpoq.

Christiern Santos Okholmip oqarnera naapertorlugu, nunatsinni politikerit paasissutissanik siammarterinermi eqqorniarneqarnerat qularutissaanngilaq.   Assi © : KNR / Markus Valentin

Tamanna Amerikamiut præsidentiata, Donald Trumpip Kalaallit Nunaata USA-mut ilaalernissaanik kissaateqartuarnerata kinguneraa.

- Naalagaaffeqatigiit USA-llu akornanni aaqqiagiinnginnerup tamanna sakkortullunilu ajornartorsiutaangaatsiartoq takutippaa. Aaqqiagiinngissutaasoq Natop suliniaqatigiiffittut piuneranik aamma naleqaratarsinnaagaluarpoq, tamanna Natop avataaniittut atorluassallugu soqutiginartippaat, Christiern Santos Okholm oqarpoq.

Avissaartuutsitsinerulerusuttut

IA-mit politikerip, Inatsisartunut ilaasortap, Folketingimut aamma qinigassanngortittup, Nivi Rosingip (IA) inoqatinut attaveqaammi TikTokimi quppernini Inatsisartunut qinersisoqarnissaanut aamma ajornartorsiutigaa. Taassuma politikkikkut oqariartuutini TikTokimini 20.000-it missaannik malinnaasoqarfimminut siaruarternerusarpai.

Nivi Rosingip qineqqusaarnerup nalaani videoliat saqqummersitani killilersuiffiusut nalaappaa, taamaalillutik videot misissorneqaqqaarlutik tamanut saqqummiunneqarsinnaasarput.

Nivi Rosingip TikTokimi quppernini Inatsisartunut qinersisoqarnissaanut ajornartorsiutigaa. Assi © : KNR / Markus Valentin

Tamatuma saniatigut videoliai pisarnertulli amerlasuunit takuneqarneq ajorput – allatut oqaatigalugu saqqummiussai siammarterneqarpallaanngitsoortarput.

Taassuma ajornartorsiutaasoq qinersinerup kingorna aaqqeqqittoq, Nivi Rosingip oqaatigaa. Taassumalu TikTokimi quppernini folketingimut qineqqusaarnermi ajornartorsiutigisimanngilaa.

Christiern Santos Okholmip oqarnera naapertorlugu nunatsinni politikerit paasissutissatigut sunniiviginiarneqarnerunerat qularutissaannginnerarpaa.

Inoqatinut attaveqaatit politikkikkut oqallinnermi nunatsinnilu qineqqusaarnermi pingaaruteqarluinnarneranni eqqugaaqqajaanerupput.

- Nunarsuarmi pissutsit maanna ilungersunartut inunnut avissaartuutsitsinerulerusuttunut periarfissarpassuarnik ammaapput, Christiern Santos Okholm oqarpoq.

Taassuma tamatuma saniatigut Amerikamiut naalagaaffeqatigiinnut eqquisinnaasumik “eqqissiviilliortitsinerunissamik” soqutiginninnerusinnaanerat mattunneqarsinnaanngilaq, ilisimatusartoq oqarpoq.

Taamaammat taassuma politikerit inoqatinut attaveqaatiminnik illersuiniarlutik immikkut ittumik mianersuussinissaannik kaammattuuteqarfigai.

Aka Hansenip oqariartuutini saqqummiukkumallugit Facebookimi quppernini qinersinissamut ullut arfiniliinnanngortut saqqummeqqinnissaa neriuutigaa.

- Tupinnartumik pisoqarnissaa neriuutigaara, taanna oqarpoq.