Partiip siuttui kiffartuussinissamut isumaqatigiissut pillugu isumaqatigiinngitsut, akisussaaffilli pillugu isumaqatigiittut
Siumup USA-mut Danmarkimullu illersornissamut isumaqatigiissutip 1951-imeersup isumaqatigiinniutigineqaqqinnissaa qineqqusaarutigaa. Nunatsinnilu aningaasaqarnikkut atugassarititaasut pitsaanerunissaat Siumut aamma kissaatigaa.
Tamanna kiffartuussinermut isumaqatigiissutit ullumikkut 28 milliardit koruuninik aningaasartaqartut aqqutigalugit ilaatigut pissaaq, sakkutooqarfik kalaallinit amerikamiunillu aserfallatsaalineqarluni nakkutigineqarpoq.
Nunatsinni sakkutooqarfeqartoqartillugu, kiffartuussinissamut isumaqatigiissummi nunatsinni suliffeqarfiit piginnittuussasut, Siumut siulittaasua Aleqa Hammond (S) isumaqarpoq.
- Nunatsinninngaanniit piumasaqaatitaqarpoq, basemi isumaqatigiissut ingerlanneqarniassappat, Kalaallit Nunaata kriteeria tassalu piumasaqaatit nunatsinninngaanniit atuutissasut taavalu aamma nunatsinninngaanniit suliffeqarfiit tassaassasut taakkua basemut isumaqatigiissummik piginnittussanngortussat, Aleqa Hammond (S) oqarpoq.
Isumaqatigiissut Amerikamiut suliffeqarfiannut, Exelis Servicesimut 2015-imi unnerluutigineqarmat politikkikkut oqallisigineqangaatsiarpoq, taanna danskinit / kalaallinit suliffeqarfiutigineqarani Amerikamiut suliffeqarfiutaattut nalunaarsorneqareersumut suliaqarfiunngitsutulli pasineqartumut unnerluutigineqarpoq.
Taamannallu pisoqaqqinnginnissaa qulakkeerneqassappat nunatsinni suliffeqarfiit qulakkeerneqassasut Siumup siulittaasuata ilanngullugu oqaatigaa.
- Kalaallit Nunaanni piusussaammat sunaluunniit suliffeqarfik aamma sakkutooqarfiit Kalaallit Nunaata piumasaqaataanik naammassinnittuussapput, namminersorlutik oqartussallu suliffeqarnermut tunngatillugu inatsisaannut naapertuutissallutik, Aleqa Hammond (S) oqarpoq.
USA-p præsidentia apeqqutaasoq
Atassutip siulittaasuata USA-p præsidentia Donald Trump qanoq isummerluni oqaaseqarumaarnersoq apeqqutaatippaa.
- Apeqqutaavoq USA-mi massakkut præsidentiat taama inuk naatsorsuutigiuminaatsigisoq, tamassumunnga namminneq paariniarsarissaneraat imaluunniit taamannak periarfissiissutitut tunniunniarneraa, Atassutip siulittaasua Aqqalu C. Jerimiassen (A) oqarpoq.
Kiffartuussinissamut isumaqatigiissut nunatsinnit akisussaaffigineqaqqilissappat, neqeroortitseriaaseq qanoq ittoq atorneqassanersoq aamma apeqqutaalluinnartoq misissueqqissaartoqarsinnaasorlu taassuma ilanngullugu oqaatigaa.
- CVR-ini nalunaarsorsimanikkut taakkua tamarmik suliffeqarfiit misissorneqarsinnaapput piginnittuiit qanoq inissisimanersut piginnittuiillu allaqqasui malillugit taakua nunatsinni angerlarsimaffeqarpata tassuuna eqqanaarneqartussaavoq, Aqqalu C. Jerimiassen (A) oqarpoq.
Inuit Ataqatigiinnit taperserneqartoq
USA-p Pituffimmi sakkutooqarfeqarnera aningaasaqarnikkut iluaqutitaqartariaqartoq Siumut oqariartuutigaa, tamannalu aamma Inuit Ataqatigiinnit taperserneqarpoq.
- Naatsumik oqaatigalugu nunatsinni nunallu killerni illersoqatigiinnermi tunniussaqaqataanitsinni nunatsinni atuutsitsinerput aningaasarsiornikkut iluaqutigisariaqarparput, Múte B. Egede (IA) oqarpoq.
Taamaammallu nunatta sammineqangaatsiarnerani nunatut piumasaqaateqarnissaq aamma pisariaqartoq taassuma ilanngullugu oqaatigaa.
- Taamaammallu nunatta atorneqarnerani aamma uagut iluaqutissinneqarnissatsinnut isumaqarpunga oqaloqatigiinnerit ersarissumik iligiit akunnerminni, pingaartumik nunatta USA-llu akornanni toqqammaviliinikkut tamanna suliassaasoq, Inuit Ataqatigiit siulittaasuat oqarpoq.
Naleqqap kalaallinit tiguneqarnissaa qulakkeerusukkaat
Naleqqap kiffartuussinissamut isumaqatigiissutip kalaallit assannut uteqqinnissaa qulakkeerusullugu, Naleqqap siulittaasuata oqaatigaa.
Kisianni tamanna pitinnagu inuit kalaallillu inuiaqatigiit kinaassusaat Danmarkimit akuerineqartariaqartoq, taanna isumaqarpoq.
- Aappaattut kalaallinut inuiaqatigiinnut kinaassuseqalernissarput aallartipparput, aamma inatsisiliortalerpugut oqarluni tamanna kalaallinut iluaqutaasariaqartoq. Taamaattoqarnissaata tungaanut tassaassapput danskit suliffeqarfiutaat USA-mik Kalaallit Nunaannillu isumaqatigiissuteqarnikkut iluanaaruteqartartut, taanna oqarpoq nangillunilu:
- Ullumikkut maani advokatit allaffeqarfianni postboksimik allamik pissarsisarput, soorlu kingullermik taamaaliorsimasut, tassanngaannarlu kalaallit suliffeqarfiutigilerpaat, Pele Broberg (N) oqarpoq.
Demokraatit danskit naalakkersuisuinik suleqateqarusuttut
Jens-Frederik Nielsenip (D) illersornissamut isumaqatigiissutip isumaqatiginninniutigeqqinnera imminermi taama periarfissiisinnaanngitsoq oqaatigaa.
- Kisianni Demokraatit illersornissamut, sakkussiornermut sillimaniarnerunermut isumaa aallaqqaammullu ersarilluinnarpoq, Jens-Frederik Nielsen (D) oqarpoq, nangillunilu:
- Akisussaaffiup ilaanik tigusinissaq piareersimaffigissavarput, akisussaaffeqarnerulerluta, kisianni sunniutaasinnaasunik sapinngisamik qulakkeerinissarput qulakkiissavarput, soorlu kiffartuussinissamut isumaqatigiissutinut aamma illersornissamut tapiissuteqarnissamut tunngatillugu.
Taamaattumik Demokraatit danskit naalakkersuisuinik suleqateqarusupput, illersornissarmi nunatsinnit suli akisussaaffigineqanngilaq.
- Tamanna folketingimut ilaasortaatigiligassatta suliassarissavaa, taassuma danskit partiivi ingerlaavartumik oqaloqatigisassavai.
- Kalaallit Nunaannut tunngatillugu nipit nukittussapput. Tamanna folketingimut qinigaatitaqassagutta qinigaatitatta soorunami eqqumaffigilluinnassavaa, Jens-Frederik Nielsen (D) oqarpoq.
