Tusagassiuut: Danmark USA-mit saassunneqaratarnissamut januaarimi piareersartoq
Danmark Amerikamiut Kalaallit Nunaannut saassusseratarsinnaanerannut januaarimi piareersarpoq.
Danskit sakkutuui Kalaallit Nunaannut timmisartumik tikiunneqaramik Nuummi Kangerlussuarmilu mittarfinnik qaartitsinissamut qaartartunik nassataqarput.
DR danskit naalakkersuisuinit, sakkutuut naalagaannit kiisalu atorfilittanit qaffasissumik inissisimaffilinnit aamma Danmarkimi, Frankrigimi Tysklandimilu paasissutissiisunik tunngaveqarluni taama allappoq.
Qaartartut USA-p præsidentiata Donald Trumpip Kalaallit Nunaat sakkutuulersornikkut tiguarnialissagaluarpagu Amerikamiut sakkutuuisa timmisartuinut nunamut missinnaatitsinnginnissaannut atortussatut nassarneqarput.
Sakkutuut sorsuttoqalissagaluarpat innarligaasunut aalersuisinnaajumallutik danskit blodbankiinit aammik aalersuinissamut atugassanik aamma nassarput.
DR-ip paasissutissaatai naapertorlugit oqaluttuaq tusarfiit aqqaneq-marluk kinaassutsiminnik isertuussisut tunngavigalugit oqaluttuarineqarpoq. Taakku arlaannalluunniit saassussinissamik pilersaarutit pillugit paasissutissanik tigussaasunik pigisaqanngilaq, arlallilli USA-p qaqugukkulluunniit saassussisinnaanera ernummatigaat.
Tusarliisut Kalaallit Nunaat pillugu pissutsit suli ima pissanganartigisutut mianernartigisutullu nalileraat, kinaassutsiminnik isertuussillutik taamaallaat oqaaseqarsinnaallutik, DR allappoq.
Pissutsinut maleruutiinnarniarlutik aalajangertut
Danmarkittaaq ajornartorsiorneq pissutigalugu Europami ilini qaninnerulerai, paasissutissiisut nassuiaapput.
Donald Trumpip præsidentitut qinigaaqqammernerani naalagaaffeqatigiinnerup illersornissaanut Europami iligiilernissaq anguniarlugu Danmarkip Frankrig, Tyskland nunallu avannarliit politikkikkut tapersersorneqarniarluni saaffigai.
Danmarkip USA-mik aaqqiaginngissuteqarnerup annertusinissaanik pinaveersaartitsiitigaluni Amerikamiut saassussinissaanut nakkaannarusunngitsoq, tusarfiit arlallit oqarput.
- Danmarkimi politikkikkut siuttut, Illersornissaqarfik isumannaallisaanikkullu suliaqartut pissutsinut maleruutiinnarniarlutik aalajangerput, franskeq atorfilittaq oqarpoq.
Frankrigip Natomilu Europami ilit allat arlallit sakkutuut Kalaallit Nunaannut januarimi aallartippaat.
Sverige, Norge, Tyskland, Tuluit Nunaat, Holland, Finland, Belgia Frankrigilu sakkutuunik ataatsimik amerlanerusunilluunniit aallartitsipput.
- Danmarkip piumasai tamangajaasa iliuuserisinnaavagut, franskeq atorfilittaq DR-imut oqarpoq.
/ritzau/
