Inatsisitigut ataataqanngitsut pillugit: Danskit naalakkersuisui nipaapput partiillu allat nalornipput
![](/sites/default/files/styles/image_934x467/public/article_images/49199983_2278431619037930_1270268583888289792_n.jpg?itok=OTUVOjUn)
Inatsisitigut ataataqanngitsut 27-it ataatsimoorlutik maanna danskit naalagaaffianut piumasaqarput. 2014 sioqqullugu kina ataataginerlugu paasisinnaatitaaasimannginnamikku taarsiivigineqarusupput.
Danskilli naalakkersuisui suliaq pillugu suli maannamut oqaatsimik ataasinnguamilluunniit oqaaseqanngillat.
KNR-ip paasissutissaatai naapertorlugit inatsisitigut ataataqanngitsut eqqartuussisuserisuata Mads Pramminngip taarsiivigineqarnissamik piumasaqaat tallimanngormat statsministeriamut nassiuppaa. Suliarlu maanna Social- og Ældreministeriamiippoq, taakkulu KNR-ip oqaaseqartitsiniarluni saaffiginnissutaanut suli qisuariaateqanngillat.
Naalakkersuisuutitaqartut Socialdemokratit nunarput pillugu oqaaseqartartuat Kasper Roug isumaqarpoq taarsivigineqarnissamik piumasaqaat naalakkersuinikkut aalajangiiffigineqarani eqqartuussiveqarfimmi aalajangiivigineqartariaqartoq. KNR-imut sms-erluni ima allappoq:
- Suliaq pineqartoq eqqartuussiveqarfimmi suliarineqartussaammat Immikkut oqaasissaqarfiginngilara.
AAMMA ATUARUK Inatsisitigut ataataqanngitsut danskit naalagaaffianit taarsiiffigineqarnissamik piumasaqaateqartut
Naalakkersuisoqatigiit tapersersortaanni Radikale Venstrekkunni nunarput pillugu oqaaseqartartup siornatigullu nunanut allanut ministeriusimasup Martin Lidegaardip suliaq ”immikkuaaluttorpassuaqarluni paasiuminaatsuusoq” oqaatigaa. Partiilu suliamut tamakkiisumik isummernissamut suli piareersimanngilaq.
- Suliat inunnit aallartinneqartut peqqissaarullugit misissorneqartariaqarput. Naalakkersuisoqatigiit suliamik sukumiisumik isiginnittariaqarput, Martin Lidegaard KNR-imut taama oqarpoq.
SF piumasaqaatitaqanngitsumik tapersiivoq
SF-ikkulli allarluinnarmik oqaasissaqarput. Taakku nunarput pillugu oqaaseqartartuat Karsten Hønge isumaqarpoq, naalagaaffik massakkorluinnaq akiliisariaqartoq.
- Inuit taarsiivigineqarusuttut iluunngarlunga tapersersorpakka. Qanoq pineqarsimanerat akuersaaarneqarsinnanngilluinnnarpoq, taanna oqarpoq.
AAMMA ATUARUK Kalaallit folketingimi ilaasortat isumaqatigiittut: Inatsisitigut ataataqanngitsut taarsiiffigineqartussaapput
Taanna isumaqarpoq naalagaaffik aningaasatigut taarsiisariaqartoq aamma pisortatigoortumik utoqqatsertariaqartoq, soorlu ministeriuneq Mette Frederiksen meeqqanut misileraataasimasunut ukioq manna taamaaliortoq.
- Danmark kukkusimassappat kanngunassaaq, kisianni taava nassueruteqarluta utoqqatsertariaqarpugut taarsiillutalu, Karsten Hønge oqarpoq.
Venstre: Inatsisitigut ataataqanngitsut misiginneqatigaagut
Venstrep nunarput pillugu oqaaseqartartua Christoffer Melson inatsisitigut ataataqanngitsunut oqaluttuaanullu misiginneqataavoq.
- Inatsisitigut ataataqanngitsut kissaateqarnerat paasisinnaalluarpara misiginneqatigalugillu, pisorlu soorunami ilungersunartutut isigaarput. Kina ataataginerlugu paasitinneqarsinnaannginneq sumiginnaanerujussuartut misinnarpoq, taanna oqarpoq.
Taassumali naalagaaffiup eqqartuussisuseriusuisa aalajangiinissaat utaqqeqqaarusuppaa.
- Siullermik inatsisitigut qanoq inerneqarnissaa pillugu ministereqarfiup naliliinissaa utaqqeqqaarusuppara. Eqqartuussiveqarfiup naliliinera politikeritut siumungaaq ilisimaneqarsinnaangilaq.
AAMMA ATUARUK Inatsisitigut ataataqanngitsut taasiiffigineqarniarnerat pillugu: Taarsiissuteqarneq anniaataarutsitsinavianngilaq
Naalakkersuisoqatigiit socialedemokratiskiusut allatut periuseqarnerat taassuma erseqqissarpaa. Qanga pisimasunik isiginninnerat allaanerusoq, soorlu meeqqat misileraataasimasut aamma nukappiaqqat ”Godhavn”-imi angerlarsimaffeqarsimasut utoqqatserfigineqarlutillu taarsiivigineqartut.
Naalagaaffiulli utoqqatsernerata pissusissamisut malitsigisaanik taarsiinermik kinguneqartarnissaa qaqugukkut atuuttassanersoq inatsisitigut ersarinnerusumik aamma qulakkeerusuppaa.
Taamaammat kalaallit inatsisitigut ataataqanngitsut taarsiivigineqarnissamik piumasaqarnerat eqqartuusivimmi aalajangiivigineqartariaqartoq Melson isumaqarpoq.
Kalaallit Danskillu inatsisitigut assigiinngitsumik pineqarsimammata taarsiinissaq tunngavissaqarsinnaasoq Dansk Folkepartiip nunarput pillugu oqaaseqartartua Søren Espersen isumaqarpoq.