Kalaallit folketingimi ilaasortat isumaqatigiittut: Inatsisitigut ataataqanngitsut taarsiiffigineqartussaapput
![](/sites/default/files/styles/image_934x467/public/article_images/aaja_aki.jpg?itok=etcuAfp8)
Kalaallit folketingimut ilaasortaatitaa, Inuit Ataqatigiinneersup, Aaja Chemnitz Larsenip aamma Siumumeersup Aki-Matilda Høegh-Damiup inatsisitigut ataataqanngitsut taarsiivigineqarnissamik piumasaqarnerat taperserpaat.
Inatsisitigut ataataqanngitsut 27-t danskit naalagaaffiannit immikkut 125.000 koruuninik taarsiiffigineqarnissamik piumasaqaateqarput. Taakku eqqartuussissuserisoq, Mads Pramming aamma meeqqanut misileraatigineqarsimasunut eqqartuussissuserisuusoq eqqartuussissuserisoraat.
Inatsisitigut ataataqanngitsut pillugit suliaq
- Børne- og Socialministeriet-miit 2016-mi nalunaarusiami erserpoq piffissami 1911-miit 1974-imut Kalaallit Nunaanni inatsisitigut ataataqanngitsut inuit 8000 missaanniittut.
- Nalunaarusiaq taanna naapertorlugu 2016-imi inatsisitigut ataataqanngistut 5000 missaanniipput.
- 2011-mi atuagaq ”Kampen for en far” Kalaallit Nunaanni inuiaqatigiinni aalassatsitsivoq. Tassaavoq Anne Sofie Hardenberg-ip ataatani danskiusoq najortiginagu peroriartornerminik oqaluttuaa.
- Katuffik Ataata inatsisitigut atataqanngitsunut 2010-mi pilersineqarpoq.
- 2014-imi inatsisitigut allannguineqarpoq imaalerlugu inatsisitigut ataataqanngitsut periarfissillugit ataatassarsiuisinnaalersillugit ataataminnillu kingornussisunngortissinnaalerlugit, kingornussassat agguaanneqareeersimanngippata.
- Inatsimmik allannguisoqartinnagu taamanikkut Naalakkersuisut aamma Grønlandsudvalgip kissaatigaat inatsisitigut ataataqanngitsut kingornussisussaanngitsut aningaasatigut taarsiiffigineqassasut. Taamani danskit naalakkersuisuinit itigartitsissutigineqarpoq.
- Aningaasaqarnermut 2019-imut inatsimmi inatsisitigut ataataqanngitsunut suliniutinut atugassat koruunit 4,7 milliuunit immikoortinneqarput 2019-2023-mut paasissutissiinermut suliniutinut, katsorsarneqarnissamut suliniutinut aamma inatsisitigut siunnersorneqarnermut atugassat.
Tigusiffiit: Folketinget, Børne- og Socialministeriet, KNR.g
Inatsisitigut ataataqanngitsuuneq tassaavoq kina ataatarinerlugu pisinnaatitaaffeqarsimannginneq.
Nunatsinni inatsisit naapertorlugit meeqqat nunatta kitaani 1963-ip siornatigut uersakkat nunattalu sinnerani 1974-ip siornatigut uersakkat ataatami kinaaneranik paasiniaanissamut pisinnaatitaaffeqanngillat imaluunniit ataatami kinguliaanik kinguliaqalernissamut kingornussinissamullu pisinnaatitaaffeqanngillat.
Aaja Chemnitz Larsenip (IA) aamma Aki-Matilda Høegh Damip (SIU) danskit naalagaaffiannit taarsiisoqarnissaata anguneqarnissaa sulissutiginiarpaat.
- Qaqugukkulluunniit eqqunngitsumik pineqarsimagaanni taamannak piumasaqartoqarsinnaanera inissaminiippoq, Aki-Matilda Høegh-Dam oqarpoq.
Aaja Chemnitz Larsenip (IA) inatsisitigut ataataqanngitsut pillugit suliaq meeqqat misileraataasimasut pillugit suliatulli eqqartuussivimmut suliassanngortinneqarnissaa ilimagaa. Danskit naalakkersuisuisa meeqqat misileraatigineqarsimasut taarsiivigineqarnissamik piumasaqaateqarnerat 2021-mi itigartitsissutiginikuuaat, tamatumalu kingorna eqqartuussivitsigoortinneqarluni.
Suliaq isumaqatigiittoqarneranik inerneqarpoq.
- Danskit naalakkersuisuisa politikkikkut aaqqiissuteqarniarnissaq ammaffiginngikkaat isumaqarpunga, inatsisitigullu eqqartuussivitsigooqqaarluni aatsaat aaqqiissuteqartoqarsinnaasoraara, Aaja Chemnitz Larsen oqarpoq.
Kikkut tamarmik taarsiivigineqarnissamut pisinnaatitaaffeqartut
Taarsiivigineqarnissamut piumasaqaat iluatsissappat tamanna nunatsinni inatsisitigut ataataqanngitsunut allanut danskit naalagaaffiannit taarsiivigineqarniarnissamut periarfissiissaaq.
Aki-Matilda Høegh-Damip oqarnera naapertorlugu inatsisitigut ataataqanngitsut tamarmik taarsiivigineqarnissamik pisinnaatitaaffeqarput.
- Pingaaruteqarpoq eqqunngitsumik pineqarsimagaanni taamannak aamma inatsisitigut illersorsinnaanissaq taava apeqqutaanngilaq inuit qassit taamannak qinnuteqarnersut, apeqqutaanerpaavoq eqqortumik iliorluni aningaasalerfigineqaraanni taamannak. Aningaasat taakkua annikitsuararsuugamik eqqarsaatigissagaanni qanoq innarliitigisimanersoq taamannak immikkoortitsineq.
Aaja Chemnitz Larsenip inatsisitigut ataataqanngitsut ataataminnit kingornussisimanngitsut pingaartumik taarsiivigineqarnissaat erseqqissaatigaa.
AAMMA ATUARUK Inatsisitigut ataataqanngitsut danskit naalagaaffianit taarsiiffigineqarnissamik piumasaqaateqartut
Kingornussisinnaanermut pisinnaatitaaffik pillugu inatsit 2014-imi allanngortinneqarpoq, taamaalillutik inatsisitigut ataataqanngitsut ataatassarsiuinermik aallartitsisinnaalerlutillu kingornussisinnaatitaalerput. Inatsisilli inatsisitigut ataataqanngitsut kingornussassat agguaanneqareersimanngippata aatsaat kingornussisinnaasut erseqqissaatigaa.
- Ilaat assigiinngitsunik pissuteqarlutik ataataminnik kingornussisussaatitaagaluarlutik kingornussinikuunngillat. Isumaqarpunga taakku taarsiivigineqarnissaat immikkut pingaarnerutinneqartariaqartoq, Aaja Chemnitz Larsen oqarpoq.
AAMMA ATUARUK Inatsisitigut ataataqanngitsuulluni peroriartortoq: Ataatama ernerigaminga miserratigiuaannarpaa
KNR-ip danskit isumaginninnermut ministeriat, Astrid Kragh danskit naalagaaffiat inatsisitigut ataataqanngitsunut aningaasanik taarseerusussanersoq apeqquteqarfigaa.
Isumaginninnermullu ministerip akissuteqartinnissaa taamani periarfissaavoq.
Taanna allakkatigut ima akissuteqarpoq:
- Qularutissaanngilaq qangaanerusoq kukkusoqartarsimasoq, taakkulu ilinniarfigissavavut. Taamaattumik eqqorluinnarpoq meeqqat pillugit inatsit 2014-imi allanngortinneqarmat inatsisitigut ataataqanngitsut ataataqarnerminnik aalajangiiffigineqarsinnaalermata taamalu ilaatigut ataataminnik kingornussinnaalerlutik.